THE JESUIT RELATIONS
AND
ALLIED DOCUMENTS
Vol. VII

[164] CHAPITRE X. 6

DE LEURS HABITS & DE LEURS ORNEMENTS.

C'ESTOIT la pensée d'Aristote, que le mõde auoit fait cõme trois pas, pour [165] arriuer à la perfection qu'il possedoit de son temps. Au premier les hommes se contentoient de la vie, ne recherchants purement & simplement que les choses necessaires & vtiles pour sa conseruation. Au second ils ont conjoint le delectable auec le necessaire, & la bienseance auec la necessité. On a trouué premierement les viures, puis les assaisonnements, on s'est couuert au cõmencement contre la rigueur du temps, & par apres on a donné de la grace & de la gentillesse aux habits, on a fait des maisons aux premiers siecles simplement pour s'en seruir, & par apres on les a fait encore pour estre veuës. Au troisiéme pas les hommes d'esprit voyans que le monde iouyssoit des choses necessaires & douces pour la vie, ils se sont a donnez à la contemplation des choses naturelles, & à la recherche des sciences, si bien que la grande Republique des hommes s'est petit à petit perfectionnée, la necessité marchant deuant, la bien-seance & la douceur venant apres, & les sciences tenant la dernier rang.

Or ie veux dire que nos Sauuages Montagnais & errans, ne sont encore [166] qu'au premier degré des trois que ie viẽs de toucher, ils ne pensent qu'à viure, ils mãgent pour ne point mourir, ils se couurent pour 8 banir le froid, non pour paroistre, la grace, la bienseance, la connoissance des arts, les sciences naturelles, & beaucoup moins les veritez surnaturelles, n'ont point encore de logis en cét hemisphere, du moins en ces contrées. Ce peuple ne croit pas qu'il y ait autre science au monde, que de viure & de mãger, voila toute leur Philosophie. Ils s'estõnent de ce que nous faisons cas de nos liures, puisque leur connoissance ne nous donne point dequoy bannir la faim, ils ne peuuent comprendre ce que nous demandons à Dieu en nos prieres. Demande luy, me disoient-ils, des Originaux, des Ours & des Castors, dis luy que tu en veux manger; & quand ie leur disois que ce la estoit peu de chose, qu'il y auoit biẽ d'autres richesses à demãder, ils se rioyent, que pourrois tu, me repondoient-ils souhaitter de meilleur, que de manger tõ saoul de ces bonnes viandes? Bref ils n'ont que la vie, encore ne l'ont-ils pas toute entiere, puisque la famine les tuë assez souuent.

[167] Iugez maintenant qu'elle peut-estre la gentillesse de leurs habits, la noblesse & la richesse de leurs ornements, vous prẽdriez plaisir de les voir en cõpagnie: pendant l'Hiuer toutes sortes d'habits leurs sont propres, & tout est commun tant aux femmes comme aux hommes: il n'y a point de difformité en leurs vestemens, tout est bon, pourueu qu'il soit biẽ chaud. Ils sont couuerts propremẽt, quand ils le sont commodement; dõnez leur vn chaperon, vne homme le portera aussi bien qu'vne femme, il n'y a habit de fol dont ils ne se seruent sagement, s'ils s'en peuuent seruir chaudement: ils ne sont point comme ces Seigneurs qui s'attachent à vne couleur. Depuis qu'ils prattiquent nos Europeans, ils sont plus bigarrez que 10 des Suisses. I'ay veu vne petite fille de six ans vestuë de la casaque de son pere, qui estoit vn grand homme, il ne falut point de Tailleur pour luy mettre cét habit dans sa iustesse, on le ramasse à l'entour du corps, & on le lie comme vn fagot. L'vn a vn bonnet rouge, l'autre vn bõnet verd, l'autre vn gris, tous faits, nõ à la mode de la Cour, mais à la mode de la commodité. L'autre aura [168] vn chapeau que si les bords l'empeschent, ils les couppent.

Les femmes ont pour robbe vne camisolle ou vn capot, ou vne casaque, ou vne castelogne, ou quelque peau dont ils s'enueloppent, se lians en autãt d'endroits qu'il est necessaire, pour fermer les aduenuës au vent? L'vn porte vn bas de cuir, l'autre de drap, pour le present ils couppent leurs vieilles couuertures ou castellongnes, pour faire des mãches & des bas de chausses. Ie vous laisse à penser si cela est bien vuidé & bien tiré; en vn mot ie reïtere ce que i'ay desia dit, leur proprieté est leur commodité, & comme ils ne se couurent que contre l'injure du tẽps, si tost que l'air est chaud, ou qu'ils entrènt dans leurs Cabanes, ils iettent leurs atours à bas, les hõmes restãs tous nuds, à la reserue d'vn brayer qui leur cache ce qui ne peut estre veu sans vergongne. Pour les femmes elles quittent leur bonnet, leurs manches & bas de chausses, le reste du corps demeurant couuert. Voila l'equipage des Sauuages, pour le present qu'ils communiquent auec nos François.

Ce peuple va tousi[o]urs teste nuë, hormis [169] dans les plus grands froids, encore y en a-il plusieurs qui ne se couurient iamais, ce qui me fait conjecturer que fort peu se seruoient de bõnets, auant qu'ils communiquassent auec nos Europeãs, aussi n'en sçauroient 12 ils faire, ains ils les traittent tous faits, ou du moins les font tailler à nos François. Voila pour leur coiffure, qui n'est autre que leurs cheueux, tant aux hommes qu'aux femmes, & mesme aux enfans; car ils sont testes nuës dans leur maillot.

Leurs robbes sont faictes de peaux d'Elans, d'Ours, & d'autres animaux. Les plus riches en leur estime sont faites des peaux d'vne espece de petit animal noir, qui se trouue aux Hurons, il est de la grandeur d'vn Lapin, le poil est doux & luisant, il entre bien vne soixantaine de ces peaux dans vne robbe, ils attachẽt les queuës de ces animaux aux bas, pour seruir de franges, & les testes au haut pour seruir d'vne espece de rebord. La figure de leur robbe est quasi quarrée, les femmes les peignent, tirant des raïes du haut en bas, ces raïes sont également distantes & larges, enuiron de deux pouces vous diriez du passement.

[170] Les hommes portent leurs robbes en deux façons: quand il fait vn peu chaud ils ne s'en enueloppent point, mais ils la portent sur vn bras, & sous l'autre, ou bien estendu sur leur dos, retenue par deux petites cordes de peaux, qu'ils lient dessus leur poictrine; ce qui n'empesche pas qu'ils ne paroissent quasi tous nuds. Quand il fait froid, ils la passent tous, hommes & femmes, sous vn bras & dessus l'epaule de l'autre, puis la croisent & s'en enueloppent assez commodémẽt contre le froid, mais maussadement; car s'estans liez sous la poictrine, ils la retroussent, puis ils se lient & se garrottẽt vers la ceinture, ou vers le milieu du corps, ce retroussement leur faisant vn gros ventre ou vne grosse pance, dans laquelle ils mettent leurs petites besongnes. I'ay veu representer vn Caresme prenant sur vn theatre en 14 France, on luy bastit vn ventre iustement comme en portent nos Sauuages & Sauuagesses pendant l'Hiuer.

Or comme ces robbes ne couurent point leurs bras, il se font des manches de mesme[s] peaux, & tirent dessus ces rayes dõt i'ay parlé, quelquefois de lõg, [171] quelquefois en rond: ces manches sont fort larges par haut, couurant les épaules, & se venans quasi ioindre derriere le dos, deux petites cordes les tiennent liées deuant & derriere, mais auec si peu de grace, qu'il n'y a fagot d'espine qui ne soit mieux trouffé qu'vne femme emmitouflée dedans ces peaux. Remarquez qu'il n'y a point de distinction, de l'habit d'vn homme à celuy d'vne femme, sinon que la femme est tousiours couuerte de sa robbe, & les hommes la quittent ou la portent à la legere, quand il fait chaud comme i'ay dit.

Leurs bas de chausses sont de poil [peau] d'Orignac passée sans poil, c'est la nature & non l'art, qui en a trouué la façon, ils sont tout d'vne venuë, suffit que le pied & la jambe y passent, pour estre biẽ faits, ils n'ont point l'inuention d'y mettre des coins, ils sont faits comme des bas à botter, retenus sous le pied, auec vne petite cordelette. La cousture qui n'est quasi qu'vn faux fil, ne se treuue pas derriere les jambes, mais entre-deux; les cousans, ils laissent passer vn rebord de la peau mesme, qu'ils découpent en frange, apres laquelle ils attachent par [172] fois quelques matachias; ces bas sont assez longs, notamment pardeuant; car ils laissent vne piece qui passe bien haut, & qui couure vne grande partie de la cuisse, au plus haut de cette piece sont attachées de petites cordes, qu'ils lient à vne ceinture de peau, qu'ils portẽt tous dessus leurs chairs.

16 Leurs souliers ne sont pas durs comme les nostres, aussi n'ont-ils pas l'industrie de taner le cuir: nos gands de cerf, sont d'vne peau plus ferme ou du moins aussi ferme que leurs peaux d'Orignac, dont ils font leurs souliers, encore faut il qu'ils attendent que ces peaux ayent seruy de robbes, & qu'elles soient toutes grasses, autrement leurs souliers se retireroient à la moindre approche du feu, ce qu'ils ne laissent pas de faire tous gras qu'ils soient quãd on les chauffe vu peu de trop prés. Au reste, ils boiuent l'eau comme vne éponge, si biẽ que les Sauuages ne s'en feruẽt pas contre cét Element, mais bien cõtre la neige & contre le froid. Ce sont les femmes qui sont cousturieres & cordonnieres, il ne leur coute rien pour apprendre ce mestier, encore moins pour auoir des [173] lettres de maistrise; vn enfant qui sçauroit vn peu coudre en seroit à la premiere veuë, tant il y a d'inuention.

Ils les font fort amples & fort capables, notamment l'Hiuer, pour les garnir contre le froid, ils se seruent ordinairement d'vne peau de Lieure, ou d'vne piece de quelque couuerture, pliée en deux & trois doubles. Ils mettent auec cela du poil d'Orignac, & puis ayans enueloppé leurs pieds de ces haillons, ils chauffent leurs souliers, & par fois deux paires l'vne dessus l'autre, ils les lient & les arrestent sur le coudepié, auec vne petite corde, qui regne tout à l'entour des coins du Soulier. Pendant les neiges nous nous seruons tous, François & Sauuages de cette forte de chaussure, afin de pouuoir marcher sur des Raquettes; l'Hiuer passé nous reprenons nos souliers François, & eux vont pieds nuds.

Voila non pas tout ce qui se peut dire de leurs habits & de leurs ornements, mais ce que i'en ay veu 18, & qui me vient pour l'heure en la pensée; i'oubliois à dire, que ceux qui peuuent auoir ou troquer des chemises de nos François, s'en feruent à la nouuelle façon: car au lieu [174] de les mettre comme nous par dessous, ils les mettent par dessus tous leurs habits, & comme iamais ils ne les essuyent, elles sont en moins de rien grasses comme des torchons de cuisine, c'est ce qu'ils demandent, car l'eau, disent-ils, coule là dessus, & ne penetre pas iusqu'à leurs robbes.

CHAPITRE XI.

20 DE LA LANGUE DES SAUUAGES MONTAGNAIS.

I'ESCRIUY l'an passé, que leur langue estoit tres-riche & tres-pauure; toute pleine d'abondance & de disette; la pauureté paroist en mille articles. Tous les mots de pieté, de deuotion, de vertu; tous les termes dont on se sert pour expliquer les biens de l'autre [vie]; le langage des Theologiens, des Philosophes, des Mathematiciens, des Medecins, en vn mot de tous les hommes doctes; toutes les paroles qui concernent la police & le gouuernement d'vne ville, d'vne Prouince, d'vn Empire; tout ce qui touche la iustice, la recompense & le chastimẽt, les noms d'vne infinité d'arts, qui sont en nostre Europe, d'vne infinité de fleurs [175] d'arbres & de fruits, d'vne infinité d'animaux de mille & mille inuentions, de mille beautez & de mille richesses; tout cela ne se trouue point ny dãs la pensée, ny dans la bouche des Sauuages, n'ayans ny vraye religion ny connoissance des vertus, ny police, ny gouuernement, ny Royaume, ny Republique, ny sciences, ny rien de tout ce que ie viens de dire, & par consequent, toutes les paroles, tous les termes, tous les mots & tous les noms qui touche ce monde de biens & de grandeurs, doiuent estre defalquez de leur dictionaire; voila vne grande disette. Tournons maintenant la medaille, & faisons voir que cette langue regorge de richesses.

22 Premierement ie trouue vne infinité de noms propres parmy eux, que ie ne puis expliquer en nostre françois, que par circumlocutions.

Secondement, ils ont de Verbes que ie nomme absolus, dont ny les Grecs, ny les Latins, ny nous, ny les langues d'Europe, dont ie ne me suis enquis, n'ont riẽ de semblable, par exemple ce Verbe Nimitison, signifie absolument ie mange, sans dire quoy, car si vous determinez, la [176] chose que vous mangez, il se faut seruir d'vn autre Verbe.

Tiercement, ils ont des Verbes differents, pour signifier l'action enuers vne chose animée, & enuers vne chose inanimée, encore bien qu'ils conjoignent auec les choses animées, quelques nombres des choses sans ame, cõme le petun, les pommes, &c. donnons des exemples. Ie vois vn homme, Niouapaman iriniou, ie vois vne pierre, niouabatẽ, ainsi en Grec, en Latin, & en François, c'est vn mesme Verbe, pour dire ie vois vn homme, vne pierre, & toute autre chose. Ie frappe vn chiẽ ni noutinau attimou, ie frappe vn bois, ninoutinen misticou. Ce n'est pas tout: car si l'actiõ se termine à plusieurs choses animées, il faut vn autre Verbe, ie vois des hõmes niouapamaoueth irinioueth, ninoutinaoueth attimoueth, & ainsi de tous les autres.

En quatriéme lieu, ils ont des Verbes propres pour signifier l'action qui se termine à la personne reciproque, & d'autres encore qui se terminent aux choses qui luy appartiennent, & l'on ne pût se seruir des Verbes enuers les autres personnes non reciproques sans parler impropremẽt. Ie me fais entẽdre le Ver[be] [177] nitaouin, signifie, ie me sers de quelque chose, nitaouin agouniscouehon, ie me sers d'vn bonnet: que si ie viens à dire, ie me sers de son bonnet, sçauoir est du bonnet de l'homme, dont on parle, il 24 faut changer de verbe, & dire Nitaouiouan outagoumiscouhon: que si c'est vne chose animée il faut encor changer le verbe, par exemple, ie me sers de son chien, nitaouiouan õtaimai, & remarquez que tous ces verbes ont leurs meufs, leurs temps, & leurs personnes, & que leurs conjugaisons sont dissemblables s'ils different de terminaisons. Ceste abondance n'est point dãs les langues d'Europe, ie le sçay de quelques vnes, ie le coniecture des autres.

En cinquiesme lieu, ils se seruent d'autres mots sur la terre, d'autres mots sur l'eau pour signifier la mesme chose. Voicy comment, Ie veux dire, i'arriuay hier, si c'est par terre, il faut dire nitagochinin outagouchi, si c'est par eau, il faut dire nimichagan outagouchi: ie veux dire, i'ay esté mouillé de la pluye, si ç'a esté cheminant sur terre, il faut dire nikimiouanoutan, si c'est faisant chemin, par eau nikhimiouanutan, ie vay querir [178] quelque chose, si c'est par terre, il faut dire ninaten, si c'est par eau ninahen: si c'est vne chose animée & par terre, il faut dire ninatau: si c'est vne chose animée & par eau, il faut dire ninahouau: si c'est vne chose animée qui appartienne à quelqu'vn, il faut dire ninahimouau: si elle n'est pas animée niuahimouau, quelle varieté? nous n'auons en François pour tout cela qu'vn seul mot, ie vay querir, auquel on adiouste pour distinction par eau, ou par terre.

En sixiesme lieu, vn seul de nos adiectifs en François se conioint auec tous nos substantifs, par exemple, nous disons le pain est froid, le petun est froid, ce fer est froid; mais en nostre Sauuage ces adiectifs changent selon les diuerses especes des substantifs, tabiscau assini, la pierre est froide, tacabisisiou nouspouagan, mon petunoir est froid, takhisiou khichtemau, 26 ce petun est froid, tacascouan misticou, le bois est froid, si c'est quelque grande piece tacascouchan misticou, le bois est froid, siicatchiou attimou, ce chien a froid; voila vne estrange abondance.

Remarquez en passant, que tous ces [179] adiectifs, voire mesme que tous les noms substantifs se conjuguent comme les verbes Latins impersonnels, par exemple, tabiscau assini, la pierre est froide, tabiscaban, elle estoit froide, cata tabiscan, elle sera froide, & ainsi du reste Noutaoui, c'est vn nom substantif, qui signifie mon pere, noutaouiban, c'estoit mon pere, ou bien deffunct mon pere Cata noutaoui, il sera mon pere, si on pouuoit se seruir de ces termes.

En septiesme lieu ils ont vne richesse si importune qu'elle me iette quasi dans la creance que ie seray pauure toute ma vie en leur langue. Quand vous cognoissez toutes les parties d'Oraison des langues qui florissent en nostre Europe, & que vous sçauez comme il les faut lier ensemble, vous sçauez la langue, il n'en est pas de mesme en la langue de nos Sauuages, peuplez vostre memoire de tous les mots qui signifient chaque chose en particulier, apprenez le noeud ou la Syntaxe qui les allie, vous n'estes encor qu'vn ignorant, vous pourrez bien auec cela vous faire entendre des Sauuages, quoy que non pas tousiours, mais vous ne les entendez [180] pas: la raison est, qu'outre les noms de chaque chose en particulier ils ont vne infinité de mots qui signifient plusieurs choses ensemble: si ie veux dire en Françoîs le vent pousse la neige, suffit que i'aye cognoissance de ces trois mots, du vent, du verbe, ie pousse, & de la neige, & que ie les sçache conioindre, il n'en est pas de mesme icy. Ie sçay comme on dit le vent routin, 28 comme on dit il pousse vne chose noble comme est la neige en l'estime des Sauuages, c'est rakhineou, ie sçay comme on dit la neige, c'est couné, que si ie veux conioindre ces trois mots Routin rakhineou couné, les Sauuages ne m'entendront pas, que s'ils m'entendent ils se mettront à rire, pource qu'ils ne parlent pas comme cela, se seruans de ce seul mot piouan, pour dire le vent pousse ou fait voler la neige: de mesme le verbe nisiicatchin signifie i'ay froid, ce nom nissitai signifie mes pieds, si ie dis nisiicat chin nissitai pour dire i'ay froid aux pieds, ils pourront bien m'entendre, mais ie ne les entẽdray pas quãd ils dirõt Nitatagouasisin, qui est le propre mot pour dire i'ay froid aux pieds: & ce qui [181] tuë vne memoire, ce mot n'est parent, ny allié, ny n'a point d'affinité en sa consonance auec les deux autres, d'où prouiẽt que ie les fais souuẽt rire en parlant, en voulant suiure l'œconomie de la langue Latine, ou Françoise, ne sçachant point ces mots qui signifient plusieurs choses ensemble? D'icy prouient encore, que bien souuent ie ne les entends pas, quoy qu'ils m'entendent: car ne se seruans pas des mots qui signifient vne chose simple en particulier, mais de ceux qui en signifient beaucoup à la fois, moy ne sçachant que ces premiers, & non encor à demy, ie ne les sçaurois entendre s'ils n'ont de l'esprit pour varier & choisir les mots plus communs, car alors ie tasche de m'en demesler.

C'est assez pour monstrer l'abondance de leur langue, si ie la sçauois parfaitement i'en parlerois auec plus d'asseurance; ie croy qu'ils ont d'autres richesses que ie n'ay peu encor découurir iusques icy.

I'oubliois à dire que nos Montagnais n'ont pas tant de lettres en leur Alphabeth, que nous en auons au 30 nostre, ils confondent le B. & le P. ils confondent [182] aussi le C. le G. & le K. c'est à dire que deux Sauuages prononçans vn mesme mot, vous croiriez que l'vn prononce vn B. & que l'autre prononce vn P. que l'vn dit vn C. ou vn K. & l'autre vn G. ils n'ont point les lettres F, L, V consonante, X. Z. ils prononcent vn R. au lieu d'vn L. ils diront Monsieur du Pressi pour Monsieur du Plessi, ils prononcent vn P. au lieu d'vn V. consonante, Monsieur Olipier pour Monsieur Oliuier; mais comme ils ont la langue assez bien penduë, ils prendroient bientost nostre prononciation si on les instruisoit, notamment les enfans.

Le P. Brebeuf m'a dit que les Hurons n'ont point de M. dequoy ie m'estonne: car ceste lettre me semble quasi naturelle, tant l'vsage en est grand.

Que si pour conclusion de ce Chapitre V. R. me demande si i'ay beaucoup auancé dans la cognoissance de ceste langue pendant mon hyuernement auec ces Barbares, ie luy diray ingenuëment que non: en voicy les raisons.

Premierement, le deffaut de ma memoire que ne fut iamais bien excellente, [183] & qui se va deseichant tous les iours. O l'excellent homme pour ces pays icy que le Pere Brebeuf, sa memoire tres-heureuse, sa douceur tres-aymable, feront de grands fruicts dedans les Hurons.

Secondement, la malice du sorcier qui defendoit par fois qu'on m'enseignast.

Tiercement, la perfidie de l'Apostat, qui contre sa promesse, & nonobstant les offres que ie luy faisois, ne m'a iamais voulu enseigner, voire sa déloyauté est venuë iusques à ce point de me donner exprez vn mot d'vne signification pour vn autre.

32 En quatriesme lieu, la famine a esté long temps nostre hostesse, ie n'osois quasi en sa presence interroger nos Sauuages, leur estomach n'est pas de la nature des tonneaux qui resonnẽt d'autant mieux qu'ils sont vuides, il ressemble au tambour, plus il est bandé mieux il parle.

En cinquiesme lieu, mes maladies m'ont fait quitter le soing des langues de la terre pour penser au langage de l'autre vie où ie pensois aller.

[184] En sixiesme lieu enfin la difficulté de ceste langue qui n'est pas petite, comme on peut coniecturer de ce que i'ay dit, n'a pas esté vn petit obstacle pour empescher vue pauure memoire comme la mienne d'aller bien loing. Ie iargonne neantmoins, & à force de crier ie me fais entendre.

Vn point me toucheroit viuement, n'estoit que i'estime qu'il ne faut pas marcher deuant Dieu, mais qu'il faut le fuiure, & se contenter de sa propre bassesse; c'est que ie ne croy quasi pas pouuoir iamais parler les langues des Sauuages auec autant de liberté qu'il seroit necessaire pour leur prescher, & répondre sur le champ sans broncher à leurs demandes & à leurs obiections, estant notamment occupé comme i'ay esté iusques à present. Vray que Dieu peut faire d'vne roche vn enfant d'Abraham. Qu'il soit beny à iamais par toutes les langues des nations de la terre.

[185] CHAPITRE XII.

34 DE CE QU'IL FAUT SOUFFRIR HYUERNANT AUEC LES SAUUAGES.

EPICTETE dit que celuy qui veut aller aux bains publics, se doit au prealable figurer toutes les insolences qui s'y commettent, afin que se trouuant engagé dans la risée d'vn tas de canailles, qui luy laueront mieux la teste que les pieds, il ne perde rien de la grauité & de la modestie d'vn homme sage. Ie dirois volontiers le mesme à qui Dieu donne les pensées, & les desirs de passer les mers, pour venir chercher & instruire les Sauuages: c'est en leur faueur que ie coucheray ce Chapitre, afin qu'ayant cogneu l'ennemy qu'ils auront en teste, ils ne s'oublient pas de se munir des armes necessaires pour le combat, notamment d'vn patience de fer ou de bronze, ou plustost d'vne patience toute d'or, pour supporter, fortement & amoureusement les grands trauaux qu'il faut souffrir parmy ces peuples. Commençons [186] par la maison qu'ils doiuent habiter s'il[s] les veulent suiure.

Pour conceuoir la beauté de cest edifice, il en faut décrire la structure; i'en parleray auec science: car i'ay souuent aydé à la dresser. Estans donc arriuez au lieu où nous deuions camper; les femmes armées de haches s'en alloient çà & là dans ces grandes forests coupper du bois pour la charpente de l'hostellerie où nous voulions loger, ce pendant les hommes en ayans designé le plan, vuidoient la neige auec leurs 36 raquilles, ou auec des pelles qu'ils font & portent exprez pour ce fujet: figurez vous donc vn grand rond, ou vn quarré dans la neige, haute de deux, de trois, ou de quatre pieds, selon les temps, ou les lieux où on cabane; ceste profondeur nous faisoit vne muraille blanche, qui nous enuironnoit de tous costez, excepté par l'endroit où on la fendoit pour faire la porte: la charpente apportée, qui consiste en quelque vingt ou trente perches, plus ou moins, selon la grandeur de la cabane, on la plante, non sur la terre, mais sur le haut de la neige, puis on iette sur ces perches qui s'approchent [187] vn petit par en haut, deux ou trois rouleaux d'écorces cousuës ensemble, commençant par le bas, & voila la maison faite, on couure la terre, comme aussi ceste muraille de neige qui regne tout à l'entour de la cabane, de petites branches de pin, & pour derniere perfection, on attache vne méchante peau à deux perches pour seruir de porte, dont les iambages font la neige mesme. Voyons maintenant en détail toutes les commoditez de ce beau Louure.

Vous ne sçauriez demeurer debout dans ceste maison, tant pour sa bassesse, que pour la fumée qui suffoqueroit, & par consequent il faut estre tousiours couché ou assis sur la platte terre, c'est la posture ordinaire des Sauuages: de sortir de hors, le froid, la neige, le danger de s'égarer dans ces grãds bois, vous font rentrer plus vite que le vent, & vous tiennent en prison dans vn cachot, qui n'a ny clef ny serrure.

Ce cachot, outre la posture fascheuse qu'il y faut tenir sur vn lict de terre, a quatre grandes incommoditez, le froid, le chaud, la fumée & les chiens: [188] Pour le froid vous auez la teste à la neige, il 38 n'y a qu'vne branche de pin entre deux, bien souuent rien que vostre bonnet, les vents ont liberté d'entrer par mille endroicts: car ne vous figurez pas que ces écorces soient iointes comme vn papier colé sur vn chassis, elles ressemblent bien souuent l'herbe à mille pertuis, sinon que leurs trous & leurs ouuertures sont vn peu plus grandes, & quand il n'y auroit que l'ouuerture d'en haut, qui sert de fenestre & de cheminée tout ensemble, le plus gros hyuer de France y pourroit tous les iours passer tout entier sans empressement. La nuict estant couché ie contemplois par ceste ouuerture & les Estoilles & la Lune, autant à découuert que si i'eusse esté en pleine campagne.

Or cependant le froid ne m'a pas tant tourmenté que la chaleur du feu, vn petit lieu, comme sont leurs cabanes s'échauffe aisément par vn bon feu, qui me rotissoit par fois & me grilloit de tous costez, à raison que la cabane estant trop estroitre, ie ne sçauois comment me deffendre de son ardeur, d'aller à droite ou a gauche, vous ne sçauriez: [189] car les Sauuages qui vous sont voisins occupent vos costez, de reculer en arriere, vous rencontrez ceste muraille de neige, ou les écorces de la cabane qui vous bornent, ie ne sçauois en quelle posture me mettre, de m'estendre, la place estoit si estroite que mes iambes eussent esté à moitié dans le feu; de me tenir en ploton, & tousiours racourcy cõme ils font, ie ne pouuois pas si long temps qu'eux: mes habits ont esté tout rostis & tout bruslez. Vous me demanderez peut estre si la neige que nous auions au dos ne se fondoit point quand on faisoit bon feu: ie dis que non, que si par fois la chaleur l'amolissoit tant soit peu, le froid la durcissoit en glace. Or ie diray neantmoins que le 40 froid ny le chaud n'ont rien de [in]tolerable, & qu'on trouue quelque remede à ces deux maux.

Mais pour la fumée, ie vous confesse que c'est vn martyre, elle me tuoit, & me faisoit pleurer incessament sans que i'eusse ny douleur ny tristesse dans le coeur, elle nous terrassoit par fois tous tant que nous estions dans la cabane, c'est à dire qu'il falloit mettre la [190] bouche contre terre pour pouuoir respirer: car encor que les Sauuages soient accoustumez à ce tourment, si est-ce que par fois il redoubloit auec telle violence, qu'ils estoient contraincts aussi bien que moy de se coucher sur le ventre, & de manger quasi la terre pour ne point boire la fumée: i'ay quelquefois demeuré plusieurs heures en ceste situation, notamment dans les plus grands froids, & lors qu'il neigeoit: car c'estoit en ces temps là que la fumée nous assailloit auec plus de fureur, nous saisissant à la gorge, aux naseaux, & aux yeux: que ce breuuage est amer! que ceste odeur est forte! que ceste vapeur est nuisible à la veuë! i'ay creu plusieurs fois que ie m'en allois estre aueugle, les yeux me cuisoient comme feu, ils me pleuroient ou distilloient comme vn alambic, ie ne voyois plus rien que confusément, à la façon de ce bon homme, qui disoit, video homines velut arbores ambulantes. Ie disois les Pseaumes de mon Breuiaire comme ie pouuois, les sçachans à demy par coeur, i'attendois que la douleur me donnast vn peu de relasche pour reciter les leçons, & quãd [191] ie venois à les lire elles me sembloient écrites en lettres de feu, ou d'écarlatte, i'ay souuent fermé mon liure n'y voyant rien que confusion qui me blessoit la veüe.

Quelqu'vn me dira que ie deuois sortir de ce trou enfumé, & prendre l'air, & ie luy répondray, que 42 l'air estoit ordinairement en ce temps-là si froid, que les arbres qui ont la peau plus dure que celle de l'homme, & le corps plus solide, ne luy pouuoient resister, se fendans iusques au coeur faisans vn bruit comme d'vn mousquet en s'éclatans: ie sortois neantmoins quelque fois de ceste taniere, fuyant la rage de la fumée pour me mettre à la mercy du froid, contre lequel ie taschois de m'armer, m'enueloppant de ma couuerture comme vn Irlandois, & en cet equipage assis sur la neige, ou sur quelque arbre abbatu, ie recitois mes Heures: le mal estoit que la neige n'auoit pas plus de pitié de mes yeux que la fumée.

Pour les chiens que i'ay dit estre l'vne des incommoditez des maisons des Sauuages, ie ne sçay si ie les dois blasmer: car ils m'ont rendu par fois de bons [192] seruices, vray qu'ils tiroient de moy la mesme courtoisie qu'ils me prestoient, si bien que nous nous entr'aydions les vns les autres, faisans l'emblesme de mutuum auxilium, ces pauures bestes ne pouuans subsister à l'air, hors la cabane se venoient coucher tantost sur mes épaules, tantost sur mes pieds, & comme ie n'auois qu'vne simple castalogne pour me seruir de mattelas & de couuerture tout ensemble, ie n'estois pas marry de cet abry, leurs rendans volontiers vne partie de la chaleur que ie tirois d'eux: il est vray que comme ils estoient grands & en grand nombre, ils me pressoient par fois & m'importunoient si fort, qu'en me donnant vn peu de chaleur, ils me déroboient tout mon sommeil, cela estoit cause que bien souuant ie les chassois, en quoy il m'arriua certaine nuict vn traict de confusion & de risée: car vn Sauuage s'estant ietté sur moy en dormant, moy croyant que ce fust vn chien, rencontrant en main vn baston, ie le frappe m'écriant, Aché, Aché, qui sont les mots 44 dont ils se seruent pour chasser les chiens, mon homme s'éueille bien estonné pensant que [193] tout fut perdu; mais s'estant pris garde d'où venoient les coups: tu n'as point d'esprit, me dit-il, ce n'est pas vn chien, c'est moy: à ces paroles ie ne sçay qui resta le plus estonné de nous deux, ie quittay doucement mon baston, bien marry de l'auoir trouué si pres de moy.

Retournons à nos chiens, ces animaux estans affamez, d'autant qu'ils n'auoient pas de quoy mãger non plus que nous, ne faisoient qu'aller & venir, roder par tout dans la cabane: or comme on est souuẽt couché aussi bien qu'assis dans ces maisons d'écorce, ils nous passoient souuent & sur la face & sur le ventre, & si souuent, & auec telle importunité, qu'estant las de crier & de les chasser, ie me couurois quelque fois la face, puis ie leur donnois liberté de passer par où ils voudroient: s'il arriuoit qu'on leur iettait vn os, aussitoit s'estoit de courre apres à qui l'auroit, culbutans tous ceux qu'ils rencontroient assis, s'ils ne se tenoient bien fermes; ils m'ont par fois renuersé & mon écuelle d'écorce, & tout ce qui estoit dedans sur ma sotane. Ie sousriois quand il y suruenoit quelque querelle parmy-eux lors que [194] nous disnions: car il n'y auoit celuy qui ne tint son plat à deux belles mains contre la terre, qui seruoit de table, de siege & de lict, & aux hommes & aux chiens: c'est de là que prouenoit la grãde incommodité que nous receuions de ces animaux, qui portoient le nez dans nos écuelles plustost que nous n'y portions la main. C'est assez dit des incommoditez des maisons des Sauuages, parlons de leurs viures.

Au commencement que ie fus auec eux, comme ils ne salent ny leurs boüillons ny leurs viandes, & que la saleté mesme fait leur cuisine, ie ne pouuois manger 46 de leur salmigondies, ie me contentois d'vn peu de galette & d'vn peu d'anguille bouccanée, iusques là que mon hoste me tançoit de ce que ie mangeois si peu, ie m'affamay deuant que la famine nous acceüillist, cependant nos Sauuages faisoient tous les iours des festins, en sorte que nous nous vismes en peu de temps sans pain, sans farine, & sans anguilles, & sans aucun moyen d'estre secourus: car outre que nous estions fort auant dans les bois, & que nous fussions morts mille fois deuant [195] que d'arriuer aux demeures des François, nous hyuernions de là le grãd fleuue qu'on ne peut trauerser en ce temps là pour le grand nombre de glaces qu'il charie incessamment, & qui mettroient en pieces non seulement vne chalouppe, mais vn grand vaisseau, pour la chasse, comme les neiges n'estoient pas profondes à proportion des autres années, ils ne pouuoiẽt pas prendre l'Elan, si bien qu'ils n'apportoient que quelques Castors, & quelques Porcs epics, mais en si petit nombre, & si peu souuent, que cela seruoit plustost pour ne point mourir que pour viure. Mon hoste me disoit dans ces grandes disettes. Chibiné aye l'ame dure resiste à la faim, tu seras par fois deux iours, quelque fois trois ou quatre sans manger, ne te laisse point abbattre, prẽd courage, quand la neige sera venuë nous mangerons: nostre Seigneur n'a pas voulu qu'ils fussent si long temps sans rien prendre; mais pour l'ordinaire nous mangions vne fois en deux iours, voire assez souuent ayans mangé vn Castor le matin, le lendemain au soir nous mangions vn Porc-epic gros comme [196] vn Cochon de laict: c'estoit peu à dixneuf personnes que nous estions, il est vray; mais ce peu suffisoit pour ne point mourir. Quand ie pouuois 48 auoir vne peau d'Anguille pour ma iournée sur la fin de nos viures, ie me tenois pour bien déieuné, bien disné, & bien soupé.

Au commencement ie m'estois seruy d'vne de ces peaux pour refaire vne sotane de toille que i'auois sur moy, ayãt oublié de porter des pieces, mais voyãt que la faim me pressoit si fort, ie mangeay mes pieces, & si ma sotane eust esté de mesme estoffe, ie vous répond que ie l'eusse rapportée bien courte en la maison: ie mangeois bien les vieilles peaux d'Orignac, qui sont bien plus dures que les peaux d'Anguilles, i'allois dans les bois brouter le bout des arbres & ronger les écorces plus tendres, comme ie remarqueray dans le iournal. Les Sauuages qui nous estoient voisins, souffroient encore plus que nous, quelques-vns nous venans voir, nous disoient que leurs camarades estoient morts de faim, i'en vy qui n'auoient mangé qu'vne fois en cinq iours, & qui se tenoient bien heureux quand ils trouuoient de quoy [197] disner au bout de deux, ils estoient faits comme des squelets, n'ayans plus que la peau sur les os, nous faisions par fois de bons repas; mais pour vn bon disner, nous nous passions trois fois de souper. Vn ieune Sauuage de nostre cabane, mourant de faim, comme ie diray au Chapitre suiuant, ils me demandoient souuent si ie ne craignois point, si ie n'auois point peur de la mort, & voyans que ie me monstrois assez asseuré ils s'en estonnoient, notamment en certain temps que ie les vis quasi tomber dans le desespoir. Quand ils viennent iusques-là, ils ioüent pour ainsi dire à sauue qui peut, ils iettent leurs écorces, & leur bagage, ils abandonnent les vns les autres, & perdans le soin du public, c'est à qui trouuera de quoy viure pour soy; alors les enfans, les femmes, en 50 vn mot ceux qui ne sçauroient chasser meurent de froid & de faim, s'ils en fussent venus à ceste extremité ie serois mort des premiers.

Voila ce qu'il faut preuoir auant que de se mettre à leur suitte: car encor qu'ils ne soient pas tous les ans pressez de ceste famine, ils en courent tous les [198] ans les dangers puis qu'ils n'ont point à manger, ou fort peu, s'il n'y a beaucoup de neige & beaucoup d'Orignaux, ce qui n'arriue pas tousiours.

Que si vous me demandez maintenant quels estoient mes sentimens dans les afres de la mort, & d'vne mort si langoureuse comme est celle qui prouient de la famine, ie vous diray que i'ay de la peine à répondre; neantmoins afin que ceux qui liront ce Chapitre, n'apprehendent point de nous venir secourir, ie puis asseurer auec verité que ce temps de famine m'a esté vn temps d'abondance. Ayant recogneu que nous commençions à floter entre l'esperance de la vie & la crainte de la mort, ie fis mon conte que Dieu m'auoit condamné à mourir de faim pour mes pechez, & baisant mille fois la main qui auoit minuté ma sentence, i'en attendois l'execution auec vne paix & une ioye qu'on peut bien sentir, mais qu'on ne peut décrire: ie confesse qu'on souffre, & qu'il se faut resoudre à la Croix: mais Dieu fait gloire d'ayder vne ame quand elle n'est plus secouruë des creatures. Poursuiuons nostre chemin.

[199] Apres ceste famine nous eusmes quelques bons iours, la neige qui n'estoit que trop haute pour auoir froid, mais trop basse pour prendre l'Orignac, s'estant grandement accreuë sur la fin de Ianuier, nos Chasseurs prirent quelques Orignaux, dont ils firent seicherie: or soit que mon intemperance, ou que ce boucan dur comme du bois, & sale comme les 52 ruës fut contraire à mon estomach, ie tombay malade au beau commencement de Feurier, me voila donc contraint de demeurer tousiours couché sur la terre froide, ce n'estoit pas pour me guerir des tranchées fort sensibles qui me tourmentoient, & qui me contraignoient de sortir à toute heure iour & nuict, m'engageant à chaque sortie dedans les neiges iusques aux genoux, & parfois quasi iusques à la ceinture, notamment au commencement que nous nous estions cabanez en quelque endroit, ces douleurs sensibles me durerent enuiron huict ou dix iours, comme aussi vn grand mal d'estomach, & vne foiblesse de coeur qui se répandoit par tout le corps, ie guary de ceste maladie, non pas tout à fait: car ie ne fis [200] que traisner iusques à la my-Caresme que le mal me reprit. Ie dis cecy pour faire voir le peu de secours qu'on doit attendre des Sauuages quand on est malade: estant vn iour pressé de la soif ie demanday vn peu d'eau, on me répondit qu'il n'y en auoit point & qu'on me donneroit de la neige fonduë si i'en voulois: comme ce breuuage estoit contraire à mon mal, ie fis entendre à mon hoste que i'auois veu vn lac nõ pas loing de là, & que i'en eusse bien voulu auoir vn peu d'eau, il fit la sourde oreille à cause que le chemin estoit vn peu fascheux, si bien que non seulement ceste fois; mais encore en tous les endroits que quelque fleuue ou quelque ruisseau estoit vn peu trop esloigné de nostre cabane, il falloit boire de ceste neige fonduë dans vne chaudiere, dont le cuiure estoit moins épais que la saleté: qui voudra sçauoir l'amertume de ce breuuage qu'il le tire d'vn vaisseau sortant de la fumée & qu'il en gouste.

Quant à la nourriture, ils partagent le malade comme les autres; s'ils prennent de la chair fresche, 54 ils luy en donnent sa part s'il en veut, s'il ne la mange, [201] pour lors on ne se met pas en peine de luy en garder vn petit morceau quand il voudra manger, on luy donnera de ce qu'il y aura pour lors en la cabane, c'est à dire du boucan & non pas du meilleur: car ils le reseruent pour les festins, si bien qu'vn pauure malade est contraint bien souuent de manger parmy eux, ce qui luy feroit horreur dans la santé mesme s'il estoit auec nos François. Vne ame bien alterée de la soif du Fils de Dieu, ie veux dire des souffrances, trouueroit icy dequoy se rassasier.

Il me reste encore à parler de leur conuersation, pour faire entierement cognoistre ce qu'on peut souffrir auec ce peuple. Ie m'estois mis en la compagnie de mon hoste & du Renegat, à condition que nous n'hyuerneriõs point auec le Sorcier, que ie cognoissois pour tres-meschant homme, ils m'auoient accordé ces conditions, mais ils furent infidelles, ne gardans ny l'vne ny l'autre: ils m'engagerent donc auec ce pretendu Magicien, comme ie diray cy apres; or ce miserable homme, & la fumée m'ont esté les deux plus grands tourmens [202] que i'aye enduré parmy ces Barbares: ny le froid, ny le chaud, ny l'incommodité des chiens, ny coucher à l'air, ny dormir sur vn lict de terre, ny la posture qu'il faut tousiours tenir dans leurs cabanes, se ramassans en peloton, ou se couchans, ou s'asseans sans siege & sans mattelas, ny la faim, ny la soif, ny la pauuerté & saleté de leur boucan, ny la maladie, tout cela ne m'a semblé que ieu à comparaison de la fumée & de la malice du Sorcier, auec lequel i'ay tousiours esté en très mauuaise intelligence pour les raisons suiuantes.

Premierement, pource que m'ayant inuité d'hyuerner 56 auec luy, ie l'auois éconduy, dequoy il se ressentoit fort, voyant que ie faisois plus d'estat de mon hoste, son cadet, que de luy.

Secondement, pource que ie ne pouuois assouuir sa cõuoitise, ie n'auois rien qu'il ne me demandast, il m'a fait fort souuent quitter mon manteau de dessus mes espaules pour s'en couurir: or ne pouuant pas satisfaire à toutes ses demandes, il me voyoit de mauuais oeil, voire mesme quand ie luy eusse donné tout le peu que i'auois, ie n'eusse peu gagner [203] son amitié: car nous auions bien d'autres sujets de diuorce.

En trois[i]esme lieu, voyant qu'il faisoit du Prophete, amusant ce peuple par mille sottises qu'il inuente à mon aduis tous les iours, ie ne laissois perdre aucune occasion de le conuaincre de niaiserie & puerilité, mettant au iour l'impertinence de ses superstitions: or c'estoit luy arracher l'ame du corps par violence: car comme il ne sçauroit plus chasser, il fait plus que iamais du Prophete & du Magicien pour conseruer son credit, & pour auoir les bons morceaux, si bien qu'esbranlant son authorité qui se va perdant tous les iours, ie le touchois à la prunelle de l'œil, & luy rauissois les delices de son Paradis, qui sont les plaisirs de la gueule.

En quatriesme lieu, se voulant recrer à mes dépens, il me faisoit par fois escrire en sa langue des choses sales, m'assurant qu'il n'y auoit rien de mauuais, puis il me faisoit prononcer ces impudences, que ie n'entendois pas deuant les Sauuages: quelques femmes m'ayans aduerty de ceste malice, ie luy dis que ie ne salirois plus mon papier ny ma [204] bouche, de ces vilaines paroles, il ne laissa pas de me commander de lire en la presence de toute la cabane, & de quelques 58 Sauuages qui estoient suruenus, quelque chose qu'il m'auoit dicté, ie luy répondis que l'Apostat m'en donnat l'interpretation, & puis que ie lirois, ce Renegat refusant de le faire, ie refusay aussi de lire, le Sorcier me le commande auec empire, c'est à dire auec de grosses paroles, ie le prie au commencement auec grande douceur de m'en dispenser: mais comme il ne vouloit pas estre éconduit deuant les Sauuages, il me presse fort & me fait presser par mon hoste qui fit du fasché: enfin recognoissant que mes excuses n'auoiẽt plus de lieu, ie luy parle d'vn accent fort haut, & apres luy auoir reproché ses lubricitez, ie luy addresse ces paroles: Me voicy en ton pouuoir, tu me peux massacrer, mais tu ne sçaurois me contraindre de proferer des paroles impudiques: elles ne sont pas telles, me dit-il, Pourquoy donc, luy dis-je, ne m'en veut-on pas donner l'interpretation? il sortit de ceste meslée fort vlceré.

En cinquiesme lieu, voyant que mon [205] hoste m'aymoit, il eut peur que cet amour ne le priuast de quelque friand morceau, ie taschay de luy oster ceste apprehension, témoignant publiquement que ie ne viuois pas pour manger, mais que ie mangeois pour viure, & qu'il importoit peu quoy qu'on me donnast, pourueu que i'en eusse assez pour ne point mourir: il me repartit nettement, qu'il n'estoit pas de mon aduis, mais qu'il faisoit profession d'estre friand, d'aymer les bons morceaux, & qu'on l'obligeoit fort quand on luy en presentoit: or iaçoit que mon hoste ne luy donnast aucun sujet de craindre en cet endroit, si est ce qu'il m'attaquoit quasi en tous les repas, comme s'il eut eu peur de perdre la preseance, ceste apprehension augmentoit sa haine.

En sixiesme lieu, comme il voyoit que les Sauuages 60 des autres cabanes me portoient quelque respect, cognoissant d'ailleurs que i'estois grand ennemy de ses impostures, & que si i'entrois dans l'esprit de ses oüailles, que ie le perdrois de fond en comble, il faisoit son possible pour me détruire, & pour me rendre ridicule en la creance de son peuple.

[206] En septiesme lieu, adioustez à tout cecy l'auersion que luy & tous les Sauuages de Tadoussac ont eu iusques icy des François depuis le commerce des Anglois, & coniecturez quel traictement ie peux auoir receu de ces Barbares, qui adorent ce miserable Sorcier, contre lequel le plus souuent i'auois guerre declarée. I'ay creu cent fois que ie ne sortirois iamais de ceste meslée que par les portes de la mort. Il m'a traité fort indignement, il est vray, mais ie m'estonne qu'il n'a pis fait, veu qu'il est idolatre de ces superstitiõs, que ie combattois de toutes mes forces. De raconter par le menu toutes ses attaques, ses risées, ses gausseries, ses mépris, ie ferois vn Liure pour vn Chapitre, suffit de dire qu'il s'attaquoit mesme par fois à Dieu pour me déplaire, & qu'il s'efforçoit de me rendre la risée des petits & des grands, me décriant dans les autres cabanes aussi bien que dans la nostre, il n'eut neantmoins iamais le credit d'animer contre moy les Sauuages nos voisins, ils baissoient la teste quand ils entendoient les benedictiõs qu'il me donnoit. Pour les domestiques incitez par [207] son exemple, & appuyez de son authorité, ils me chargeoient incessamment de mille brocards, & de mille injures, ie me suis veu en tel estat, que pour ne les aigrir, ou ne leur donner occasion de se fascher, ie passois les iours entiers sans ouurir la bouche. Croyez moy si ie n'ay rapporté autre fruict des Sauuages, i'ay pour le moins appris beaucoup d'injures en leur 62 langue, ils me disoient à tout bout de champ eca titou, eca titou nama khitirinisin, tais toy, tais toy, tu n'as point d'esprit. Achineou, il est orgueilleux, Moucachtechiou, il fait du compagnon, sasegau il est superbe, cou attimou il ressemble à vn Chien, cou mascoua il ressemble à vn Ours, cou ouabouchou ouichtoui il est barbu comme vn Lieure, attimonai oukhimau il est Capitaine des Chiens, cou oucousimas ouchtigonan il a la teste faite comme vn citroüille, matchiriniou il est difforme, il est laid, khichcouebeon il est yure; voila les couleurs dont ils me peignoient, & de quantité d'autres que i'obmets: le bon est qu'ils ne pensoient pas quelquesfois que ie les entendisse, & me voyans sous-rire ils demeuroient confus, du moins ceux qui ne chantoiẽt [208] ces airs que pour complaire au Sorcier: les enfans m'estoient fort importuns me faisans mille niches, m'imposans silence quand ie voulois parler. Quand mon hoste estoit au logis i'auois quelque relache, & quand le Sorcier s'absentoit i'estois dans la bonace maniant les grands & les petits quasi comme ie voulois. Voila vne bonne partie des choses qu'on doit souffrir parmy ces peuples: cecy ne doit épouuenter personne, les bons soldats s'animent à la veuë de leur sang & de leurs playes, Dieu est plus grand que nostre cœur, on ne tombe pas tousiours dans la famine, on ne rencontre pas tousiours des Sorciers, ou des iongleurs de l'humeur de celuy-cy: en vn mot si nous pouuions sçauoir la langue & la reduire en preceptes il ne seroit plus de besoin de suiure ces Barbares. Pour les nations stables, d'où nous attendons le plus grand fruict, nous pouuons auoir nostre cabane à part, & par consequent nous deliurer d'vne partie de ces grandes incommoditez: mais finissons ce Chapitre, autrement ie me voy en danger d'estre 64 aussi importun que cet imposteur [209] que ie recommande aux prieres de tous ceux qui liront cecy, ie coucheray au Chapitre suiuant quelques entretiens que i'ay eu auec luy, lors que nous estions dans quelque tréue.

CHAPITRE XIII.

66 CONTENANT VN IOURNAL DES CHOSES QUI N'ONT PEU ESTRE COUCHÉES SOUS LES CHAPITRES PRECEDENS.

SI ce Chapitre estoit le premier dans ceste relation, il donneroit quelque lumiere à tous les suiuans: mais ie luy ay donné le dernier rang, pource qu'il se grossira tous les iours iusques au depart des vaisseaux, par le rencontre des choses plus remarquables qui pourront arriuer, n'estant qu'vn memoire en forme de Iournal, de tout ce qui n'a peu estre logé dans les Chapitres precedens.

Apres le depart de nos François qui sortirent de la rade de Kebec, le 16. d'Aoust de l'an passé 1633. pour tirer à Tadoussac, & de là en France, cherchant [210] l'occasion de conuerser auec les sauuages, pour apprendre leur langue; ie me transportay delà le grand fleuue de sainct Laurens dans vne cabane de fueillages, & allois tous les iours à l'escole dans celles des sauuages, qui nous enuironnoient, alleché par l'esperance que i'auois, sinon de reduire le Renegat à son deuoir, du moins de tirer de luy quelque cognoissance de sa langue: ce miserable estoit nouuellement arriué de Tadoussac, où il s'estoit mõstré fort contraire aux François, la faim qui pressoit l'Apostat & ses freres, les fit monter à Kebec pour trouuer dequoy viure: estãs donc occupez à leur pesche, i'estois fort souuent en leur cabane, inuitant par fois le Renegat 68 de venir vne autre fois hyuerner auec nous dans nostre maisonnette, il s'y fust aysément accordé n'estoit qu'il auoit pris femme d'vne autre nation que la sienne, & qu'il ne la pouuoit pas renuoyer pour lors: voyant donc qu'il ne me pouuoit pas suiure, ie luy iettay quelque propos de passer l'hyuer auec luy, mais sur ces entrefaictes vne furieuse tempeste nous ayant battu en ruine certaine nuict, le [211] Pere de Noüe, deux de nos hommes, & moy, dans nostre cabane, ie fus saisy d'vne grosse fiéure, qui me fit chercher nostre petite maisonnette pour y trouuer la santé.

L'Apostat ayant veu mon inclination traicta de mon dessein auec ses freres, il en auoit trois, l'vn nommé Carigonan, & surnommé des François l'Espousée, pource qu'il fait le grand comme vne espousée, c'est le plus fameux sorcier, ou manitousiou, (c'est ainsi qu'ils appellent ces iongleurs) de tout le pays, c'est celuy dont i'ay fort parlé cy-dessus: l'autre se nómme Mestigoït, ieune homme âgé de quelque trente-cinq ou quarante ans, braue Chasseur, & d'vn bon naturel: le troisiesme se nommoit Sasousinat, c'est le plus heureux de tous: car il est maintenant au Ciel, estãt mort bon Chrestien, comme ie l'ay fait voir au Chapitre second. Le sorcier ayant appris du Renegat que ie voulois hyuerner auec les Sauuages, me vint voir sur la fin de ma maladie, & m'inuita de prendre sa cabane, me donnant pour raison qu'il aymoit les bons, pource qu'il estoit bon, qu'il auoit [212] tousiours esté bon dés sa tendre ieunesse: il me demanda si Iesus ne m'auoit parlé de la maladie qui le trauailloit: viens, me disoit-il, auec moy, & tu me feras viure maintenant: ie suis en danger de mourir: 70 or comme ie le cognoissois comme vn homme tres-impudent, ie l'éconduy le plus doucement qu'il me fut possible, & tirant à part l'Apostat, qui taschoit de m'auoir de son costé, ayant tesmoigné au Pere de Noüe quelque desir de retourner à Dieu, ie luy dy que i'hyuernerois volontiers auec luy, & auec son frere Mestigoït, à condition que nous n'irions point de la le grand fleuue, que le sorcier ne seroit point en nostre compagnie, & que luy qui entend bien la langue Françoise m'enseigneroit: ils m'accorderent tous deux ces trois conditions, mais ils n'en tindrent pas vne.

Le iour du départ estant pris, ie leur donnay pour mon viure vne barrique de galette, que nous empruntasmes au magazin de ces Messieurs, vn sac de farine, & des espics de bled d'Inde, quelques pruneaux, & quelques naueaux, [213] ils me presserent fort de porter vn peu de vin, mais ie n'y voulois point entendre, craignant qu'ils ne s'enyurassent: toutesfois m'ayans promis qu'ils n'y toucheroient point sans ma permission, & les ayant asseuré qu'au cas qu'ils le fissent, que ie le ietterois dans la mer, ie suiuy l'inclination de ceux qui me conseillerent d'en porter vn petit barillet; ie promis en outre à Mestigoït que ie le prenois pour mon hoste: car l'Apostat n'est pas Chasseur, & n'a aucune conduite, que ie luy ferois quelque present au retour, comme i'ay fait: c'est l'attente de ces viures qui leur fait desirer d'auoir vn François auec eux.

Ie m'embarquay donc en leur chalouppe, iustement le 18. d'Octobre, faisant profession de petit écolier à mesme iour que i'auois autrefois fait profession de maistre de nos écoles, estãt allé prendre congé de 72 Monsieur nostre Gouuerneur, il me recommãda tres-particulieremẽt aux Sauuages, mon hoste luy repartit, si le Pere meurt ie mourray auec luy, & iamais plus on ne me reuerra en ce pays icy, nos Frãçois me tesmoignoient [214] tout plein de regret de mon depart, veu les dangers esquels on s'engage en la fuitte de ces Barbares. Les Adieu faits de part & d'autre, nous fismes voile enuiron les dix heures du matin, i'estois seul de François auec vingt Sauuages, comptant les hommes, les femmes, & les enfans, le vent & la marée nous fauorisans, nous allasmes descendre au delà de l'Isle d'Orleans dans vne autre Isle nommée des Sauuages Ca ouahascoumagakhe, ie ne sçay si la beauté du iour se respandoit dessus ceste Isle, mais ie la trouuay fort agreable.

Si tost que nous eusmes mis pied à terre, mon hoste prend vne harquebuse qu'il a acheté des Anglois, & s'en va chercher nostre souper: cependant les femmes se mettent à bastir la maison où nous deuions loger. Or l'Apostat s'estãt pris garde que tout le monde estoit occupé, s'en retourna à la chalouppe qui estoit à l'anchre, prit le petit barillet de vin & en beut auec tel excez, que s'estãt enyuré comme vne souppe, il tomba dedans l'eau, & se pensa noyer: enfin il en sortit apres auoir bien barbotté, il s'en vint vers le lieu où on dressoit la cabane, [215] criant & hurlant comme vn demoniaque, il arrache les perches, frappe sur les écorces de la cabane, pour tout briser: les femmes le voyant dans ces fougues s'enfuyent dans le bois, qui deçà qui delà, mon Sauuage que ie nomme ordinairemẽt mon hoste, faisoit boüillir dans vn chauderon quelques oyseaux qu'il auoit tuez: cet yurogne suruenãt rompt la cramaillere, & renuerse 74 tout dans les cendres: à tout cela pas vn ne fait mine d'estre fasché, aussi est ce folie de se battre contre vn fol, mon hoste ramasse ses petits oyseaux, les va luy-mesme lauer à la riuiere, puise de l'eau, & remet la chaudiere sur le feu, les femmes voyant que cét homme enragé couroit ça & là sur le bord de l'Isle, écumant comme vn possedé, viennent viste prendre leurs écorces, & les emportent en vn lieu écarté, de peur qu'il ne les mette en pieces comme il auoit commencé: à peine eurent-elles le loysir de les rouler qu'il parut aupres d'elles tout forcené, & ne sçachant sur qui descharger sa fureur: car elles disparurent incontinent à la faueur de la nuict qui commençoit à nous cacher, il s'en vint [216] par le feu qui se descouuroit par sa clarté, & voulant mettre la main sur la chaudiere pour la renuerser vne autre fois, mon hoste son frere, plus habile que luy, la prit & luy ietta au nez toute boüillante comme elle estoit, ie vous laisse à penser quelle contenance tenoit ce pauure homme, se voyant pris à la chaude, iamais il ne fut si bien laué, il changea de peau en la face, & en tout l'estomach, pleust à Dieu que son ame eust changé aussi bien que son corps: il redouble ses hurlemens, arrache le reste des perches, qui estoient encor debout: mon hoste m'a dit depuis qu'il demandoit vne hache pour me tuer, ie ne sçay s'il la demanda en effect, car ie n'entendois pas son langage, mais ie sçay bien que me presentant à luy pour l'arrester il me dit, parlant François, Retirez-vous, ce n'est pas à vous à qui i'en veux, laissez-moy faire, puis me tirant par la sotane, Allons, disoit-il, embarquons-nous dans un canot, retournons en vostre maison, vous ne cognoissez pas ces gens cy, ce qu'ils en font, c'est 76 pour le ventre, ils ne se soucient pas de vous, mais de vos viures, [217] à cela ie répondois tout bas à part moy, in vino veritas.

La nuict s'auançant bien fort ie me retiray dedans le bois pour fuir l'importunité de cet yurongne, & pour prendre quelque repos; comme ie faisois mes prieres aupres d'vn arbre, la femme qui faisoit le ménage de mon hoste me vint trouuer, & ramassant quelques feüilles d'arbres tombées, me dit; couche toy là, & ne fais point de bruit, puis m'ayant ietté vne écorce pour me couurir, elle se retira: voila donc mon premier giste à l'enseigne de la Lune qui me découuroit de tous costez, me voila passé Cheualier dés le premier iour de mon entrée en ceste Academie, la pluye suruenant vn peu auant minuict, me donna quelque apprehension d'estre moüillé, mais elle ne dura pas long temps: le lendemain matin ie trouuay que mon lict, quoy qu'on ne l'eut point remué depuis la creation du monde, n'estoit point si dure qu'il m'empeschat de dormir.

Le iour suiuant ie voulu ietter le barillet & le reste du vin dans la riuiere, comme ie leurs auois dit que ie ferois, [218] au cas qu'on en abusast, mon hoste me saisissant par le milieu du corps, s'écria eca toute, eca toute, ne fais pas cela, ne fais pas cela, ne vois tu pas que Petrichtich (c'est ainsi qu'ils nomment le Renegat par derision) n'a point d'esprit, que c'est vn chien, ie te promets qu'on ne touchera plus au barillet que tu ne sois present: ie m'arrestay auec resolution d'en faire largesse, afin de me deliurer de la crainte qu'vn peu de vin ne nous fit boire beaucoup d'eau: car s'ils se fussent enyurez pendant que nous faisions voile, c'estoit pour nous perdre.

78 Nous voulions sortir le matin de ceste Isle; mais la marée se retirant, plustost que nous ne pensions, nostre Chalouppe s'échoüa: si bien qu'il fallut attendre la marée du soir, en laquelle nous nous embarquasmes, & voguans à la faueur de la Lune aussi bien que du vent, nous abordasmes vne autre Isle nommée Ca ouapascounagate. Comme nous arriuasmes sur la minuict, nos gens ne prirent pas la peine de nous bastir vne maison, si bien que nous couchasmes au mesme lict, & logeasmes à la mesme enseigne que la nuict precedente, [219] abriez des arbres & du ciel.

Le lendemain nous quittasmes ceste Isle pour entrer dans vne autre appellée Ca chibariouachcate, nous la pourrions nommer l'Isle aux Oyes blanches, car i'y en vis plus de mille en vne bande.

Le iour d'apres nous la voulions quitter, mais nous fusmes contraints pour le mauuais temps de relascher au bout de ceste mesme Isle, elle est deserte comme tout le pays, c'est à dire qu'elle n'a des habitans qu'en passant, ce peuple n'ayant point de demeure assurée: elle est bordée de rochers si gros, si hauts, & si entrecouppez & peuplée neantmoins de Cedres & de Pins si proprement, qu'vn Peintre tiendroit à faueur d'en auoir la veüe pour tirer l'idée d'vn desert affreux pour ses precipices, & tres agreable pour la varieté de quantité d'arbres qu'on diroit auoir esté plantez par la main de l'art plustost que de la Nature. Comme elle est entre-taillée de bayes pleines de vases, il s'y retire si grande quantité de gibier & de plusieurs especes que ie n'ay point veu en France, qu'il le faut quasi voir pour le croire.

[220] Sortans de ceste Isle au gibier nous nauigeasmes tout le iour & vinsmes descendre sur la nuict 80 dans vne petite Islette nommé Atisaoucanich etagoukhi, c'est à dire lieu où se trouue la teinture, ie me doute que nos gens luy donnerent ce nom, pource qu'ils y trouuerent de petites racines rouges, dont ils se seruent pour teindre leurs Matachias. I'appellerois volontiers ce lieu l'Islette mal-heureuse: car nous y souffrismes beaucoup huict iours durant que les tempestes nous y retindrent prisonniers. Il estoit nuict quand nous l'abordasmes, la pluye & les vents nous attaquoient, & ce pendant à peine peut on trouuer cinq ou six perches pour seruir de poultres à nostre bastiment, qui fut si petit, si estroit, & si decouuert, & par vn temps si fascheux, voulant euiter vne incommodité on tomboit dans deux autres, il se falloit racourcir, ou se rouler en herisson, sur peine de se brusler la moitié du corps pour nostre souper, & pour nostre disner tout ensemble: car nous n'auions point mangé depuis le matin, mon hoste fit ietter à chacun vn morceau de la galette que ie luy auois [221] donnée, m'aduertissant que nous mangerions sans boire, car l'eau de ce grand fleuue commence en ce lieu d'estre salée, le lendemain nous recueillismes de l'eau de pluye, tombée dans des roches fort sales, & la beusmes auec autant de plaisir qu'on boit le vin d'Aï en France.

Ils auoient laissé nostre Chaloupe à l'anchre dans un grand courant de marée, ie les aduerty qu'elle n'estoit pas bien, & qu'il la falloit mettre à l'abry derriere l'Islette; mais comme nous n'attendions qu'vn bon vent pour partir, ils n'en tindrent conte. La nuict la tempeste redoublant, on eust dit que les vents deuoient deraciner nostre Islete, mon hoste se doutant de ce qui arriua éueille l'Apostat, & le presse de le venir ayder à sauuer nostre Chaloupe, qui s'alloit 82 perdre: or soit que ce miserable fust paresseux, ou qu'il eust peur des ondes, iamais il ne se voulut leuer, donnant pour tout réponse, qu'il estoit las: dans ce retardement les vents rompent l'amare, ou la corde de l'anchre, & en vn instant font disparoistre nostre Chaloupe, mon hoste voyant ce beau [222] ménage, me vint dire Nicanis, mon bien-aymé, la Chalouppe est perduë, les vents qui l'ont enleuée la briseront contre les roches qui nous enuironnent de tous costez. Qui n'eust entré en verue contre ce Renegat, dont la negligence nous iettoit dans des peines inexplicables, veu qu'il y auoit quantité de paquets dans nostre bagage, & beaucoup d'enfans à porter. Mon hoste cependant, tout barbare & tout sauuage qu'il est, ne se troubla point à cet accident, ains craignant que cela ne m'attristast, il me dit, Nicanis, mon bien-aymé, n'es-tu point fasché de ceste perte, qui nous causera de grands trauaux? ie n'en suis pas bien ayse, luy repartis-ie, ne t'en attriste point, me fit-il: car la fascherie ameine la tristesse, & la tristesse ameine la maladie, Petrichtich n'a point d'esprit, s'il m'eust voulu secourir ce malheur ne fust point suruenu, voyla tous les reproches qu'on luy fit. Veritablement cela me confond, que l'interest de la fanté arreste la cholere, & la fascherie d'vn Barbare, & que la loy de Dieu, que son bon plaisir, que l'espoir de ses grandes recompenses, que la crainte de ses [223] chastimens, que nostre propre paix & consolation ne puisse seruir de bride à l'impatience & à la cholere d'vn Chrestien.

Au malheur susdit en suruint vn autre, nous auions outre la Chaloupe vn petit Canot d'écorce, la marée se grossissant plus qu'à l'ordinaire par le souffle des 84 vents nous le déroba, nous voila prisonniers plus que iamais, ie ne vis ny larmes ny plaintes, non pas mesme parmy les femmes, sur le dos desquelles ce desastre tomboit plus particulierement, à raison qu'elles sont comme les bestes de voiture, portant ordinairement le bagage des Sauuages, au contraire tout le monde se mit à rire.

Le iour venu, car ce fut la nuict que la tempeste commit ce larcin, nous courusmes tous sur les riues du fleuue, pour apprendre par nos yeux des nouuelles de nostre pauure Chaloupe, & de nostre Canot, nous vismes l'vn & l'autre échoüez fort loing de nous, la Chaloupe parmy des roches, & le Canot au bord du bois de la terre continente, chacun pensoit que tout estoit en pieces: si tost que la mer se fut retirée les [224] vns courrent vers la Chaloupe, les autres vers le Canot, chose estrange; rien ne se trouua endommagé, i'en demeuray tout estonné: car de cent vaisseaux fussent-ils d'vn bois aussi dur que le bronze, à peine s'en sauueroit-il pas vn dans ces grands coups de vent & sur des roches.

Pendant que les vents nous tenoient prisonniers dans ceste malheureuse Islete, vne partie de nos gens s'en allerent visiter quelques Sauuages qui estoient à cinq ou six lieuës de nous, si bien qu'il ne resta que les femmes & les enfans, & L'hiroquois dans nostre cabane. La nuict vne femme estant sortie s'en reuint toute effarée criant qu'elle auoit oüy le Manitou, ou le diable, voila l'allarme dans nostre camp, tout le monde remply de peur garde vn profond silence, Ie demanday d'où procedoit ceste épouuente: car ie n'auois pas entendu ce qu'auoit dit ceste femme, eca titou, eca titou, me dit on, Manitou, tais-toy, tais-toy, c'est le diable: ie me mis à rire, & me leuant en pied 86 ie sors de la cabane, & pour les asseurer i'appelle en leur langage le Manitou, criant tout haut que ie [225] ne le craignois pas, & qu'il n'oseroit venir où i'estois: puis ayant fait quelques tours dans nostre Islete, ie rentray, & leur dis, ne craignez point, le diable ne vous fera aucun mal tant que ie seray auec vous, il craint ceux qui croyent en Dieu, si vous y voulez croire il s'enfuïra de vous. Eux bien estonnez, me demandent si ie ne le craignois point, ie repars pour les deliurer de leur peur, que ie n'en craignois pas vne centaine, ils se mirent tous à rire, se rasseurans petit à petit: or voyant qu'ils auoient ietté de l'anguille dans le feu i'en demanday la raison, tais-toy, me firent-ils, nous donnons à manger au diable afin qu'il ne nous fasse point de mal.

Mon hoste à son retour ayant sceu ceste histoire, me remercia fort de ce que i'auois rasseuré tous ses gens, me demandant si en effet ie n'auois point de peur du Manitou, ou du diable, & si ie le cognoissois bien, que pour eux qu'ils le craignoient plus que la foudre; Ie luy répondis, que s'il vouloit croire, & obeïr à celuy qui a tout fait, que le Manitou n'auroit nul pouuoir sur luy: pour nous qu'estans assistez de celuy que [226] nous adorions, le diable auoit plus de peur de nous, que nous n'auions de luy; il s'estonna, & me dit qu'il eust bien voulu que i'eusse eu cognoissance de sa langue: car figurez vous que nous nous faisions entendre l'vn l'autre plus par les yeux, & par les mains, que par la bouche.

Ie dressay quelques prieres en leur langue, auec l'ayde de l'Apostat: or comme le Sorcier n'estoit pas encore venu, ie les recitois le matin, & auant nos repas, eux-mesmes m'en faisans souuenir, & prenans 88 plaisir à les ouīr prononcer; si ce miserable Magicien ne fust point venu auec nous ces Barbares auroient pris grand plaisir de m'écouter: mon hoste me faisoit mille questions, me demandant pourquoy nous mouriõs, où alloient nos ames, si la nuit estoit vniuerselle par tout le monde, & choses semblables, se monstrant fort attentif à mes réponses. Changeons de discours.

Ie remarquay en ce lieu cy, que les ieunes femmes ne mangent point dans le plat de leurs marys: i'en demanday la raison, le Renegat me dit que les ieunes [227] filles à marier, & les femmes qui n'auoient point encore d'enfans, n'auoient rien en maniement, & qu'on leur faisoit leur part comme aux enfans, de là vient que sa femme mesme me dit vn iour, Dis à mon mary qu'il me donne bien à manger: mais ne luy dis pas que ie t'ay prié de luy dire.

Pendant certaine nuict, tout le monde estant dans vn profond sommeil, ie me mis à entretenir ce pauure miserable Renegat, ie luy fis voir qu'estant en nostre maison, rien de tout ce que nous auions ne luy manquoit, qu'il y pouuoit passer sa vie doucement, & qu'en quittant Dieu il s'estoit ietté dans vne vie de beste, qui enfin abboutiroit à l'enfer, s'il n'ouuroit les yeux, que l'eternité estoit bien longue, & que d'estre à iamais compagnon des diables, c'estoit vn long terme. Ie voy bien, me fit-il, que ie ne fais pas bien; mais mon malheur est que ie n'ay pas l'esprit assez fort pour demeurer ferme dans vne resolution, ie croy tout ce qu'on me dit; quand i'ay esté auec les Anglois, ie me suis laissé aller à leurs discours; quand ie suis auec les Sauuages ie fais comme eux; [228] quand ie suis auec vous ie tiens vostre creance pour veritable, pleut 90 à Dieu que ie fusse mort quand i'estois malade en France, ie serois maintenant sauué, tant que i'auray des parens ie ne feray iamais rien qui vaille: car quand ie veux demeurer auec vous, mes freres me disent que ie pouriray demeurant tousiours en vn endroit, cela est cause que ie quitte tout pour les suiure. Ie luy apportay toutes les raisons, & luy fis toutes les offres que ie peus pour l'affermir: mais son frere le Sorcier qui sera bien tost auec nous renuersera tous mes desseins, car il manie comme il veut ce pauure Apostat.

Le trentiesme iour d'Octobre nous sortismes de ceste malheureuse Islete, & vinsmes aborder sur la nuict dans vne autre Isle qui porte vn nom quasi aussi grand comme elle est, car elle n'a pas demy lieuë de tour, & voicy comme nos Sauuages me dirẽt qu'elle se nommoit, Ca pacoucachtechokhi chachagou achiganikhi, Ca pakhitaouananiouikhi, ie croy qu'ils forgent ces noms sur le champ, ceste Isle n'est quasi qu'vn grand rocher affreux, comme elle n'a point de fontaine d'eau douce nous fusmes contrains de [129 i.e., 229] boire des eauës de pluyes fort sales que nous ramassions dans des fondrieres, & sur des roches; on ietta le voile de nostre chalouppe sur des perches quand nous y arriuasmes, & nous nous mismes à l'abry là dessous, nostre lict estoit blanc & verd, c'est à dire qu'il y auoit si peu de branches de pin dessous nous, que nous touchiõs la neige en plusieurs endroits, laquelle auoit commencé depuis trois iours à couurir la terre d'vn habit blanc.

Nous trouuasmes en ce lieu la cabane d'vn Sauuage, que nostre hoste cherchoit, nommé Ekhennabamate, il apprit de luy que son frere le Sorcier estoit 92 passé depuis peu, & qu'ayant eu le vent contraire, il n'estoit pas loing, il n'attendit pas qu'il fut iour tout à fait pour le suiure, son Canot poussé par trois rameurs alloit comme le vent: bref le beau premier iour de Nouembre dedié à la memoire de tous les Saincts, il nous ramena ce Demon, i'entends ce Sorcier. Ie fus bien estonné quand ie le vis: car ie ne l'attendois pas, me figurant que mon hoste estoit allé à la chasse, fut-il ainsi, & que ceste miserable proye [230] luy eust eschappé des mains.

Si tost qu'il fut arriué ce n'estoient plus que festins dans nos cabanes, nous n'auions plus que fort peu de viures de reste, ces Barbares les mangeoient auec autant de paix & d'asseurance, comme si les animaux qu'ils deuoient chasser eussent esté renfermez dans vne estable.

Mon hoste faisant vn iour festin à son tour, les conuiez me firent signe que ie haranguasse en leur langue, ils auoiẽt enuie de rire: car ie prononce le Sauuage comme vn Alemant prononce le François, leur voulant donner ce contentement, ie me mis à discourir, & eux à s'éclatter de rire: eux bien aises de gausser, & moy bien ioyeux d'apprendre à parler: Ie leur dis pour conclusion, que i'estois vn enfant, & que les enfans faisoient rire leurs peres par leur begayement: mais qu'au reste ie deuiendrois grand dans quelques années, & qu'alors sçachant leur langue ie leur ferois voir qu'eux-mesmes sont enfans en plusieurs choses, ignorans de belles veritez, dont ie leur parlerois, & sur l'heure mesme ie leur demãday si la Lune estoit [231] aussi hautemẽt logée que les Estoilles, si elle estoit en mesme Ciel, où alloit le Soleil quãd il nous quittoit, quelle figure auoit la terre, (si ie sçauois leur 94 langue en perfection ie leur proposerois tousiours quelque verité naturelle deuant que de parler des points de nostre creãce: car i'ay remarqué que ces curiositez les rendent attentifs) pour ne m'éloigner de mon discours, l'vn d'eux prenant la parole apres m'auoir ingenuëment confessé qu'ils ne pouuoient répondre à ces questions, me dit: mais comment pourrois-tu toy mesme cognoistre ces choses, puis que nous les ignorons? ie tiray aussi tost vn petit cadran que i'auios dans ma pouche, ie l'ouure, & luy mettant en main, ie luy dis: nous voyla dans la nuict profonde, le Soleil ne nous paroist plus, dis moy maintenãt enuisageant ce que ie te presente, en quelle part du monde il est; designe moy le lieu où il se doit demain leuer, où il se doit coucher, où il sera en son midy, marque moy les endroits du Ciel, où il ne va iamais: mon homme répondit des yeux me regardant sans dire mot: ie prens le cadran & luy fais [232] voir en peu de mots tout ce que ie venois de proposer, adioustant en suitte; hé bien comment se peut-il faire que ie cognoisse ces choses, & que vous les ignoriez? i'ay bien d'autres veritez plus grandes à vous dire quand ie sçauray parler. Tu as de l'esprit, me dirent-ils, tu sçauras bien tost nostre langue, ils se sont trompez.

Ce que i'escris dans ce iournal n'a point d'autre suitte, que la suitte du temps, voila pourquoy ie passeray souuent du coq à l'asne, comme on dit, c'est à dire que quittant vne remarque ie passeray à vne autre qui ne luy a point de rapport, le temps seul seruant de liaison à mon discours.

Comme l'arc & la fleche semble des armes inuentées par la Nature, puis que toutes les Nations de la terre en ont trouué l'vsage, de mesme vous diriez 96 qu'il y a de certains petits ieux que les enfans trouuent sans qu'on leur enseigne; les petits Sauuages ioüent à se cacher aussi bien que les petits François, ils font quantité d'autres traits d'enfance, que i'ay remarqué en nostre Europe, entre autres i'ay veu les petits Parisiens [233] ietter vne balle d'arquebuse en l'air, & la receuoir auec vn baston vn petit creusé, les petits Sauuages montagnards font le mesme, se seruans d'vn petit faisseau de branches de Pin, qu'ils reçoiuent ou picquent en l'air auec vn baston pointu: les petits Hiroquois ont le mesme passe-temps iettans vn osselet percé qu'ils enlassent en l'air dans vn autre petit os: vn ieune homme de ceste nation me le dit, voyant ioüer les enfans montagnards.

Mõ Sauuage & le Sorcier son frere, ayãt appris qu'il y auoit quãtité de Mõtagnais és enuirõs du lieu où ils vouloiẽt hyuerner, prirent resolution de passer du costé du Nord, craignans que nous ne nous affamassions les vns les autres: les voyla donc resolus d'aller où m'auoit promis mon hoste & le Renegat; mais à peine auiõs nous fait trois lieuës sur le grand fleuue pour le trauerser, que nous rencontrasmes quatre canots qui nous ramenerent au Sud, disans que la chasse n'estoit pas bonne du costé du Nord, si bien que ie fus contraint de demeurer auec le sorcier, & d'hyuerner au delà de la grande riuiere, quoy que ie peusse [234] alleguer au contraire. Ie voyois bien les dangers dans lesquels ils me iettoient, mais ie ne voyois point d'autre remede que de se confier en Dieu, & le laisser faire.

Si tost que les nouueaux Sauuages venus dans ces quatre canots eurent mis pied à terre, mon hoste leur fit vn bãquet d'anguilles boucanées, car nous n'auions 98 déja plus de pain. A peine ces conuiés furent-ils de retour en leur cabane, qu'ils dresserent vn festin de pois qu'ils auoient acheté passans à Kebec, mais afin que vous voyez les excez de ce peuple, au sortir de ce banquet, on vint à vn troisiesme, que le sorcier auoit preparé, composé d'anguilles, & de la farine que i'auois donnée à mon hoste: cet homme me pressa fort d'estre de la partie, il auoit fait faire vn retranchemẽt dans nostre cabane auec des peaux, & des couuertures, tous les conuiez entrerent là dedans, on me donna ma part dans vne petite écuelle, mais comme ie n'estois pas encor tout à fait accoustumé à manger de leur boüillies si sales & si fades, apres en auoir gousté i'en voulu donner le reste à la parẽte de mon hoste, [235] aussi tost on me dit Khita, Khita, mange tout, mange tout, acoumagouchan, c'est vn festin à tout manger, ie me mis à rire, & leur dis qu'ils ioüoient à se faire creuer, veu qu'ayans desia esté à deux festins, ils en faisoient vn troisiesme à ne rien laisser, mon hoste m'entendant me dit, que dis tu Nicanis? Ie dis que ie ne sçaurois tout manger, donne moy, ce fit-il, ton écuelle ie t'ayderay, luy ayant presenté il auala tout ce qui estoit dedans en deux tours de gueule, tirant vne langue longue de la main pour la lecher au fond & par tout, afin qu'il n'y restast rien.

Quand ils furent saouls quasi iusqu'à creuer, le Sorcier prit son tambour & inuita tout le monde à chanter, celuy là chantoit le mieux qui heurloit le plus fort; à la fin de leur tintamarre les voyans d'vne humeur assez gaye, ie leur demanday permission de parler, cela m'estant accordé, ie commençay à leur déclarer l'affection que ie leur portois, vous voyez, disois-ie, de quel amour ie fuis porté en vostre endroit, i'ay 100 non seulement quitté mon pays, qui est beau, & bien agreable pour venir dans vos [236] neiges & dans vos grands bois; mais encore ie m'esloigne de la petite maison que nous auons en vos terres pour vous suiure & pour apprendre vostre langue. Ie vous chery plus que mes freres puis que ie les ay quittez pour vostre amour, c'est celuy qui a tout fait qui me donne ceste affection enuers vous, c'est luy qui creé le premier homme d'où nous sommes tous issus, voyla pourquoy n'ayans qu'vn mesme pere nous sommes tous freres, & nous deuons tous recognoistre vn mesme Seigneur & vn mesme Capitaine, nous deuons tous croire en luy, & obeïr à ses volontez, Le Sorcier m'arrestant dit tout haut, quand ie le verray, ie croiray en luy, autrement non, le moyen de croyre en celuy qu'on ne void pas? Ie luy répondis, quand tu me dis que ton pere, ou l'vn de tes amis a tenu quelque discours, ie croy ce qu'il a dit, me figurant qu'il n'est point menteur, & ce pendant ie n'ay iamais veu ton pere: de plus tu crois qu'il y a vn Manitou & tu ne l'as pas veu. Tu crois qu'il y a des Khichicouakhi, ou des Genies du iour, & tu ne les a pas veus: d'autres les ont veus, me dit-il, Tu ne me sçaurois dire, luy reparty-ie, [237] ny quand, ny comment, ny en quelle façon, ou en quel endroit on les a veus, & moy ie te puis dire commẽt se nommoient ceux qui ont veu le Fils de Dieu en terre, quand il l'ont veu, & en quel lieu, ce qu'ils ont faict, & en quels pays ils ont esté. Ton Dieu, me fit-il, n'est point venu en nostre pays, voila pourquoy nous ne croyons point en luy, fais que ie le voye, & ie croiray en luy. Escoute moy & tu le verras, luy repliquay-ie, Nous auons deux sortes de veuë, la veuë des yeux du corps, & la veuë des 102 yeux de l'ame, ce que tu vois des yeux de l'ame peut estre aussi certain que ce que tu vois des yeux du corps: Non, dit-il, ie ne vois rien sinon des yeux du corps, si ce n'est en dormãt, mais tu n'approuue pas nos songes. Escoute moy iusqu'au bout, luy fis-ie, Quand tu passe deuant vne cabane delaissée, que tu vois encor toutes les perches en rond, que tu vois l'aire de la cabane tapissée de branches de Pin, quand tu vois le fouyer qui fume encore, n'est-il pas vray que tu cognois asseurément, & que tu vois bien qu'il y a eu là des Sauuages? & que ces perches & tout le [238] reste que vous laissez quand vous decabanez, ne se sont point rassemblées par cas fortuit? ouy, me dit-il, or ie dis le mesme quand tu vois la beauté & la grandeur de ce monde, que le Soleil tourne incessamment sans s'arrester, que les saisons retournent en leur temps, & que tous les Astres gardent si bien leur ordre, tu vois bien que les hommes n'ont point fait ces merueilles, & qu'ils ne les gouuernent pas, il faut donc qu'il y ait quelqu'vn plus noble que les hommes qui ait basty & qui gouuerne ceste grande maison: or c'est celuy là que nous appellons Dieu, qui void tout, & que nous ne voyons pas maintenant; mais nous le verrons apres la mort, & nous serons bien-heureux à iamais auec luy si nous l'aymons & si nous luy obeïssons. Tu ne sçais ce que tu dis, me repart-il, apprends à parler & nous t'entendrons.

Là dessus ie priay l'Apostat de déduire mes raisons & de les expliquer en Sauuage: car i'en voyois de fort attentifs: mais ce miserable Renegat, craignant de deplaire à son frere, ne voulut iamais ouurir la bouche. Ie le prie, [239] ie le coniure auec toute douceur, en fin ie redouble ma voix, & le menace de 104 la part de Dieu, luy protestant qu'il seroit responsable de l'ame de la femme de son frere le Sorcier, laquelle ie voyois fort malade, & pour laquelle i'estois entré en discours, esperant que si les Sauuages goustoient mes raisons, qu'ils me permettroient aisément de l'instruire; ce coeur de bronze ne flechit iamais, ny à mes prieres, ny à mes menaces; Ie prie Dieu qu'il luy fasse misericorde, mon hoste me voyant parler d'vn accent assez haut, me dit, Nicanis ne te fasche point, auec le temps tu parleras comme nous, & tu nous enseigneras ce que tu sçais, nous te presterons l'oreille plus volontiers qu'à cet opiniastre qui n'a point d'esprit, auquel nous n'auons nulle creance, voila les eloges qu'il donnoit à ce Renegat. Ie luy repliquay, si ceste femme se portoit bien ie serois consolé, mais elle est pour mourir dans peu de iours, & son ame faute de cognoistre Dieu sera perduë, que si ton frere me vouloit prester sa parole ie l'instruirois en peu de temps, sa réponse fut que ie le laissasse, & que ie sçauois bien que c'estoit [240] vn lourdaut, pour conclusion on dit les mots qui terminent le festin, & chacun se retira, moy bien dolent de voir ceste ame se perdre en ma presence sans la pouuoir secourir: car le Sorcier ayant commencé à leuer le masque & l'Apostat à m'éconduire en sa cõsideration, toutes les esperances que ie pouuois auoir d'ayder ceste femme malade d'instruire les autres commencerent à s'éuanoüir, i'ay souuent souhaitté qu'vn Sainct fust en ma place pour operer en Sainct, les petites ames crient beaucoup & font peu, il se faut contenter de la bassesse: poursuiuons nostre voyage.

Le douziesme de Nouembre nous commençasmes en fin d'entrer dedans les terres, laissans nos Chalouppes 106 & nos Canots, & quelqu'autre bagage dans l'Isle au grand nom, de laquelle nous sortismes de mer basse, trauersans vne prairie qui la separe du continent: iusques icy nous auons fait chemin dans le pays des poissons, tousiours sur les eauës, ou dans les Isles, doresnauant nous allons entrer dans le Royaume des bestes sauuages, ie veux dire de beaucoup plus d'estẽduë que toute la Frãce.

[241] Les Sauuages passent l'hyuer dedans ces bois, courans çà & là, pour y chercher leur vie; au commencement des neiges ils cherchent le Castor dans des petits fleuues, & le Porc-espic dans les terres quand la neige est profonde ils chassent à l'Orignac & au Caribou, comme i'ay dit.

Nous auons fait dans ces grands bois, depuis le 12. Nouembre de l'an 1633. que nous y entrasmes, iusques au 22. d'Auril de ceste année 1634. que nous retournasmes aux riues du grand fleuue de sainct Laurens, vingt-trois stations, tantost dans des valées fort profondes, puis sur des montagnes fort releuées; quelque fois en plat pays, & tousiours dans la neige: ces forests où i'ay esté sont peuplées de diuerses especes d'arbres, notamment de Pins, de Cedres, & de Sapins. Nous auons trauersé quantité de torrens d'eau, quelques fleuues, plusieurs beaux lacs & estangs marchans sur la glace; mais descendons en particulier & disons deux mots de chaque station, la crainte que i'ay d'estre long me fera retrancher quãtité de choses que i'ay iugé assez legeres, [242] quoy qu'elles puissent donner quelque iour à ces memoires.

A nostre entrée dans les terres nous estions trois cabanes de compagnie, il y auoit dixneuf personnes en la nostre, il y en auoit seize en la cabane du Sauuage 108 nommé Ekhennabamate, & dix dans la cabanne des nouueaux venus. Ie ne conte point les Sauuages qui estoient à quelques lieuës de nous, nous faisions en tout quarante cinq personnes, qui deuions estre nourris de ce qu'il plairoit à la saincte Prouidence du bon Dieu de nous enuoyer; car nos prouisions tiroient par tout à la fin.

Voicy l'ordre que nous gardions leuans le camp, battans la campagne, & dressans nos tentes & nos pauillons. Quand nos gens remarquoient qu'il n'y auoit plus de chasse à quelques trois ou quatre lieuës à l'entour de nous, vn Sauuage qui cognoissoit mieux le chemin du lieu où nous allions, crioit à pleine teste, en vn beau matin hors de la cabane, Escoutez hommes ie m'en vais marquer le chemin pour decabaner demain au point du iour, il prenoit vne hache & marquoit quelques arbres qui [243] nous guidoient: on ne marque le chemin qu'au commencement de l'hyuer: car quand tous les fleuues & les torrens sont glacez & que la neige est haute on ne prend pas ceste peine.

Quand il y a beaucoup de pacquets, ce qui arriue lors qu'ils ont tué grand nombre d'Eslans, les femmes en vont porter vne partie iuīqu'au lieu où l'on doit camper le iour suiuant; quand la neige est haute, ils font des traisnées de bois qui se fend, & qui se leue comme par fueilles assez minces & fort longues, ces traisnées sont fort estroites à raisõ qu'elles se doiuent tirer entre vne infinité d'arbres fort pressez en quelques endroits, mais en recompense elles sont fort longues. Voyant vn iour celle de mon hoste dressée contre vn arbre, à peine peus ie atteindre au milieu estendant le bras autant qu'il me fut possible. Ils 110 lient leur bagage là dessus, & auec vne corde qui leur vient passer sur l'estomach, ils traisnent sur la neige ces chariots sans rouës.

Pour ne m'éloigner dauantage de mon chemin, si tost qu'il est iour chacun se prepare pour déloger, on commence [244] par le desieuner s'il y a dequoy; car par fois on part sans desieuner, on poursuit sans disner & on se couche sans souper, chacun fait son pacquet le mieux qu'il peut, les femmes battent la cabane pour faire tomber la glace & la neige de dessus les écorces qu'elles roulent en faisseaux, le bagage estant plié ils iettent sur leur dos ou sur leurs reins de longs fardeaux qu'ils supportent auec vne corde, qui passe sur leur front, soubs laquelle ils mettent vn morceau d'écorce de peur de se blesser; tout le monde chargé on monte à cheual sur des raquettes qu'on se lie aux pieds afin de ne point enfoncer dans la neige, cela fait on marche en campagne & en montagnes, faisant passer deuant les petits enfans qui partent bien tost & n'arriuent par fois que bien tard, ces pauures petits ont leur pacquet, ou leur traisne pour s'accoustumer de bonne heure à la fatigue, & tascheon de leur donner de l'emulation à qui portera ou traisnera dauantage, de vous depeindre la difficulté des chemins, ie n'ay ny plume ny pinceau qui le puisse faire, il faut auoir veu cét obiect pour le cognoistre, & [245] auoir gousté de ceste viande pour en sçauoir le goust, nous ne faisions que monter & descendre, il nous falloit souuent baisser à demy corps pour passer soubs des arbres quasi tombez, & monter sur d'autres couchez par terre, dont les branches nous faisoient quelques fois tomber assez doucement, mais tousiours froidement, car c'estoit sur la neige. S'il 112 arriuoit quelque dégel, ô Dieu quelle peine! il me sembloit que ie marchois sur vn chemin de verre qui se cassoit à tous coups soubs mes pieds: la neige congelée venant à s'amollir tomboit & s'enfonçoit par esquarres ou grandes pieces, & nous en auions bien souuent iusques aux genoux, quelquefois iusqu'à la ceinture, que s'il y auoit de la peine à tomber, il y en auoit encor plus à se retirer: car nos raquettes se chargeoient de neiges & se rendoient si pesantes, que quand vous veniez à les retirer il vous sembloit qu'on vous tiroit les iambes pour vous démembrer. I'en ay veu qui glissoient tellement soubs des souches enseuelies soubs la neige, qui ne pouuoient tirer ny iambes ny raquettes sans secours: or figurez vous [246] maintenant vne personne chargée comme vn mulet, & iugez si la vie des Sauuages est douce.

En France dans la difficulté des voyages encor trouue-on quelques villages pour se rafraischir, & pour se fortifier; mais les hostelleries que nous rencontrions, & où nous beuuions, n'estoient que des ruisseaux, encor falloit il rompre la glace pour en tirer de l'eau; il est vray que nous ne faisions pas de longues traites, aussi nous eust il esté tout à fait impossible.

Estans arriuez au lieu où nous deuions camper, les femmes alloient couper les perches pour dresser la cabane, les hommes vuidoient la neige, comme ie l'ay plus amplement déduit au Chapitre precedent: or il falloit trauailler à ce bastiment, ou bien trembler de froid trois grosses heures sur la neige en attendant qu'il fut fait, ie mettois par fois la main à l'œuure pour m'échauffer, mais i'estois pour l'ordinaire tellement glacé que le feu seul me pouuoit dégeler; les 114 Sauuages en estoient estonnez: car ils suoient soubs le trauail, leur témoignant quelquefois que i'auois grãd [247] froid, ils me disoient, donne tes mains que nous voyons si tu dis vray, & les trouuans toutes glacées, touchez de compassion ils me donnoient leurs mitaines échauffées, & prenoient les miennes toutes froides: iusque là que mõ hoste apres auoir experimenté cecy plusieurs fois, me dit Nicanis n'hyuerne plus auec les Sauuages, car ils te tuëront; il vouloit dire, comme ie pense, que ie tõberois malade & que ne pouuant estre traisné auec le bagage, qu'on me feroit mourir, ie me mis à rire, & luy reparty qu'il me vouloit épouuenter.

La cabane estant faite, ou sur la nuit, ou vn peu deuant, on parloit de disner & de souper tout ensemble: car sortant le matin apres auoir mangé vn petit morceau, il falloit auoir patience qu'on fut arriué & que l'hostellerie fust faite pour y loger, & pour y manger, mais le pis estoit que ce iour là nos gens n'allans point ordinairement à la chasse, c'estoit pour nous vn iour de ieusne aussi bien qu'vn iour de trauail. C'est trop retarder venons à nostre station.

Nous quittasmes les riues du grand fleuue le 12. de Nouembre, comme i'ay [248] desia dit, & vinsmes cabaner pres d'vn torrent, faisans chemin à la façon que ie viens de dire, chacun portant son fardeau. Tous les Sauuages se mocquoient de moy de ce que ie n'estois pas bon cheual de male, me contentant de porter mon manteau qui estoit assez pesant, vn petit sac où ie mettois mes menuës necessitez & leurs gausseries, qui ne me pesoient pas tant que mon corps, voila ma charge: mon hoste & l'Apostat portoient sur des bastons croisez en forme de brancard la 116 femme du Sorcier qui estoit fort malade, ils la mettoient sur la neige en attendant que la cabane fut faite, où elle passoit plus de trois heures sans feu, & sans iamais se plaindre, & sans monstrer aucun signe d'impatience, ie me mettois plus en peine d'elle qu'elle mesme: car ie criois souuent qu'on fit faire pour le moins vn peu de feu aupres d'elle, mais la réponse estoit qu'elle se chaufferoit la cabane estant faite: ces barbares sont faits à ces souffrances, ils s'attẽdent bien que s'ils tombent malades qu'on les traittera à mesme monnoye. Nous seiournasmes trois iours en ceste station, pendant lesquels [249] voicy vne partie des choses que i'ay marqué dans mon memoire.

C'est icy que les Sauuages consulterent les genies du iour, en la façon que i'ay couché au Chapitre quatriesme: or comme ie m'estois ris de ceste superstition, & qu'à toutes les occasions qui se rencontroient, ie faisois voir que les mysteres du Sorcier n'estoient que ieux d'enfans, m'efforçant de luy rauir ses oüailles pour les rendre auec le temps à celuy qui les a rachetées au prix de son sang, cét homme forcené fit le iour d'apres ceste consulte, que ie vay décrire.

Mõ hoste ayãt inuité au festin tous les Sauuages nos voisins, comme ils estoiẽt desia venus, & assis à l'entour du feu & de la chaudiere, attendans l'ouuerture du banquet, voila que le Sorcier qui estoit couché vis à vis de moy se leue tout à coup, n'ayant point encor parlé depuis la venuë des conuiez, il paroist tout furieux, se iettant sur vne des perches de la cabane pour l'arracher, il la rompt en deux pieces, il roule les yeux en la teste, regardant çà & là comme vn homme hors de soy, puis enuisageant les [250] assistans, il leur dit Iriniticou nama Nitirinisin, ô hommes 118 i'ay perdu l'esprit, ie ne sçay où ie suis, esloignez de moy les haches & les espées, car ie suis hors du sens. A ces paroles tous les Sauuages baissent les yeux en terre, & ie les leue au ciel, d'où i'attendois secours, me figurant que cét homme faisoit l'enragé pour se vanger de moy, en m'ostant la vie, ou du moins pour m'épouuenter, afin de me reprocher par apres que mon Dieu me manquoit au besoin, & de publier parmy les siens, qu'ayant si souuent témoigné que ie ne craignois pas leur Manitou, qui les fait trembler, ie pallissois deuant vn homme. Tant s'en faut que la peur qui dans les dangers d'vne mort naturelle me faisoit quelquefois rentrer dans moy-mesme, me saisit pour lors, qu'au contraire i'enuisageois ce forcené auec autant d'asseurance que si i'eusse eu vne armée à mes costez, me representant que le Dieu que i'adorois pouuoit lier les bras aux fols & aux enragez aussi bien qu'aux demons: qu'au reste si sa Majesté me vouloit ouurir les portes de la mort, par les mains d'vn homme qui faisoit l'endiablé, que [251] sa Prouidence estoit tousiours aymable. Ce Thrason redoublant ces fougues fit mille actions de fol, d'ensorcelé, de demoniaque, tantost il crioit à pleine teste, puis il demeuroit tout court comme épouuanté: il faisoit mine de pleurer, puis il s'éclattoit de rire comme vn diable follet; il chantoit sans regles ny sans mesures, il sifloit comme vn serpent, il hurloit comme vn loup, ou comme vn chien, il faisoit du hibou & du chathuan, tournant les yeux tout effarez dedans sa teste, prenant mille postures, faisant tousiours semblant de chercher quelque chose pour la lancer, i'attendois à tous coups qu'il arrachast quelque perche pour m'en assommer, ou qu'il se iettast sur moy, ie ne laissay 120 pas neantmoins pour luy monstrer que ie ne m'estonnois pas de ses diableries, de faire toutes mes actions à l'ordinaire de lire, d'écrire, de faire mes petites prieres, & l'heure de mon sommeil estant venuë ie me couchay & reposay aussi paisiblement dans son sabbat comme i'eusse fait dans vn profond silence, i'estois déja aussi accoustumé de m'endormir à ses cris, & à ses bruits de [252] tambour, qu'vn enfant aux chansons de sa nourisse.

Le lendemain au soir à mesme heure il sembla vouloir entrer dans les mesmes fougues, & donner vne autrefois l'alarme au camp, disant qu'il perdoit l'esprit, le voyant desia demy fol, il me vint vne pensée qu'il pourroit estre trauaillé de quelque fiévre chaude, ie l'aborde & luy prens le bras pour luy toucher l'artere, il me regarde affreusemẽt, faisant de l'estõné, comme si ie luy eusse apporté des nouuelles de l'autre monde, il roule les yeux çà & là comme vn insensé: luy ayant touché le poulx & le front ie le trouuay frais comme vn poisson, & aussi éloigné de la fiévre comme i'estois de France, cela me confirma dans mon opinion qu'il faisoit de l'enragé pour m'estonner, & pour tirer à compassion tous ses gens qui dans nostre disette luy donnoient ce qu'ils pouuoient auoir de meilleur.

Le 20. du mesme mois de Nouembre ne se trouuans plus de Castors, ny de Porcs-espics en nostre quartier, nous tirasmes pays, & ce fut nostre deuxiesme station, on porta la femme du Sorcier [253] sur vn brancart, & la mit-on, comme i'ay desia dit, dessus la neige en attendant que nostre palais fût dressé, ce pendant ie m'approchay d'elle luy témoignant beaucoup de compassion: il y auoit desia quelques 122 iours que ie taschois de gagner son affection, afin qu'elle me prestast plus volontiers l'oreille, cognoissant bien qu'elle ne pouuoit pas viure long-temps, car elle estoit comme vne squelette, n'ayant quasi plus la force de parler, quand elle appelloit quelqu'vn la nuit, ie me leuois moy mesme, & l'éueillois, ie luy faisois du feu, ie luy demandois ce dont elle auoit besoin, elle me cõmandoit de petites chosettes, comme de fermer les portes ou boucher quelque trou de la cabane qui l'incõmodoit, apres ces menus discours & offices de charité, ie l'aborday, & luy demãday si elle ne vouloit pas bien croire en celuy qui a tout faict, & que son ame apres sa mort seroit bien-heureuse. Au commencement elle me répondit qu'elle n'auoit point veu Dieu, & que ie luy fisse voir, autrement qu'elle ne pouuoit croire en luy, elle auoit tiré ceste réponse de la bouche de sõ mary, Ie luy repartis qu'elle [254] croyoit plusieurs choses qu'elle ne voyoit pas, & qu'au reste son ame seroit bruslée pour vne eternité si elle n'obeïssoit à celuy qui a tout fait; elle s'adoucit petit à petit, & me témoigna qu'elle luy vouloit obeïr, ie n'osois l'entretenir long temps, mais seulement par reprises, ceux qui me voyoient me crians que ie la laissasse.

Sur le soir estãs tous dãs nostre nouuelle cabane, ie m'approchay d'elle, l'appellant par son nom, iamais elle ne me voulut parler en la presence des autres, ie priay le Sorcier de luy dire qu'elle me répondist, & de m'ayder à l'instruire, luy representant qu'il ne pouuoit arriuer que du bien de ceste action, il me répond non plus que la malade, ie m'addresse à l'Apostat le pressant auec de tres humbles prieres de me prester sa parole, point de répõse; ie retourne à la malade, 124 ie l'appelle, ie luy parle, ie luy demande si elle ne vouloit pas aller au Ciel, à tout cela pas vn mot: Ie solicite de rechef le Sorcier son mary, ie luy promets vne chemise & du petun, pourueu qu'il dise à sa femme qu'elle m'écoute, comment veux-tu, me dit-il, que nous [255] croyõs en ton Dieu ne l'ayãs iamais veu? ie t'ay desia respondu à cela, luy fis-je, il n'est pas temps de disputer, cette ame se va perdre pour vn iamais si tu n'en as pitié: Tu vois bien que celuy qui a faict le Ciel pour toy, te veut donner de plus grands biens, que d'aller manger des escorces en vn village qui ne fut iamais, mais aussi te punira il seuerement si tu ne crois en luy, & si tu ne luy obeis. Ne pouuant tirer aucune raison de ce miserable homme, ie pressay encor vne fois la malade, mon hoste me l'entendant nommer par son nom me tança, tais toy me dit-il, ne la nomme point, elle est desia morte, son ame n'est plus dans son corps. C'est vne grande verité que personne ne va à Iesvs-Christ que son pere ne luy tende la main, c'est vn grãd present que la foy, quãd ces pauures Barbares voyẽt qu'vn pauure malade ne parle plus, ou qu'il tombe en syncope, ou en quelque phrenesie, ils disent que son esprit n'est plus dans son corps, si le malade retourne en son bon sens, c'est l'èsprit qui est de retour: en fin quand il est mort il n'en faut plus parler, ny le nommer en aucune façon: pour conclurre ce point, il [256] me fallust retirer sans rien faire.

On tint conseil en ce lieu de ce qu'on deuoit faire pour trouuer à manger, nous estions desia reduits à telle extremité que ie fa[i]sois vn bon repas d'vne peau d'anguille boucannée, que ie iettois aux chiens quelques iours auparauant. Deux choses me toucherent 126 ici le cœur: jettant vne fois vn os, ou vne arreste d'anguille aux chiens, vn petit garçon fut plus habile que le chien, il se jetta sur l'os & le rongea & mangea: vne autre fois vn enfant ayant demandé à manger, comme on luy eust respõdu qu'il n'y en auoit point, ce pauure petit s'en prit à ses yeux, les larmes rouloient sur sa face grosses commes des pois, & ses souspirs & ses sanglots me touchoient de compassion, encor taschoit il de se cacher: c'est vne leçon qu'on fait aux enfans de se monstrer courageux dans la famine.

Le 28. du mesme mois, nous decampasmes pour la troisiesme fois, il neigeoit fort, mais la necessité nous pressant le mauuais temps ne peut nous arrester. Ie fus bien estonné en cette troisiesme demeure que ie ne vis point apporter la malade, ie n'osois demander ce qu'elle [257] estoit deuenuë, car ils ne veulent pas qu'on parle des morts: sur le soir i'accostay le Renegat, ie luy demanday parlant François où estoit ceste pauure femme, s'il ne l'auoit point tuée, voyant qu'elle s'en alloit mourir, cõme il auoit autrefois assommé à coups de bastons vne pauure fille qui tiroit à la mort, ainsi que luy mesme l'auoit raconté à nos François. Non, dit-il, ie ne l'ay pas tuée: qui donc, luy fis ie, est-ce le ieune Hiroquois? Nenny, me répond-il, car il est party de grand matin: c'est donc mon hoste, ou le Sorcier son mary; car elle parloit encor quand ie suis sorty ce matin de la cabane, il baissa la teste, m'aduoüãt tacitement que l'vn des deux l'auoit mise à mort: vn vieillard m'a ceneãtmoins dit depuis, qu'elle mourut de sa mort naturelle vn peu apres que ie fus party, ie m'en rapporte à ce qui en est, quoy que s'en soit ayant refusé de recognoistre le Fils de Dieu pour son Pasteur pendant 128 sa vie, il n'est que trop probable qu'il ne l'a pas recogneuë pour vne de ses oüailles, après sa mort.

I'ay remarqué iusques icy de trois sortes de medecines naturelles parmy les [258] Sauuages, l'vne c'est leur suërie, dont i'ay parlé cy-dessus, l'autre consiste à se taillader legerement la partie du corps qui leur fait mal, la mettant toute en sang qu'ils font sortir de ces decoupeures en assez grande abondance, ils se seruirent vne fois de mon canif pour taillader la teste d'vn enfant de dix iours. La troisiesme de ces medecines est composée de racleure d'écorces interieures de bouleau, du moins cet arbre me sembloit tel, ils font boüillir ces racleures dans de l'eau, qu'ils boiuent par apres pour se faire vomir, ils m'ont souuent voulu donner ceste potion pendant que i'estois malade, mais ie ne la iugeois pas à mon vsage.

Le iour de sainct François Xauier, nostre pretendu Magicien ayant sur le soir battu son tambour, & bien hurlé à l'ordinaire, car il ne manquoit point de nous donner ceste aubade toutes les nuits à nostre premier sommeil, voyant que tout le monde estoit endormy, & cognoissant que ce pauure homme faisoit ce tintamare pour sa guarison. I'entray en discours auec luy, ie commençay par vn témoignage de grand amour [259] en son endroit, & par des loüanges que ie luy iettay comme vne amorce pour le prendre dans les filets de la verité. Ie luy fis entendre que si vn esprit capable des choses grandes comme le sien cognoissoit Dieu, que tous les Sauuages induis par son exemple le voudroient aussi cognoistre, aussi tost il prit l'essor, & se mit à declarer la puissance, l'authorité & le credit qu'il a sur l'esprit de ses compatriotes, il dit que dés sa ieunesse les Sauuages luy donnerent 130 le nom de Khimouchouminau, c'est à dire nostre ayeul & nostre maistre, que tout passe par ses aduis, & que chacun suit ses conseils, ie l'aydois à se loüer le mieux que ie pouuois: car il est vray qu'il a de belles parties pour vn Sauuage: enfin ie luy dis que ie m'estonnois qu'vn homme de iugement ne peut recognoistre le peu de rapport qu'il y a entre ce tintamare & la santé. Quand tu as bien crié & bien battu ton tambour, que fait ce bruit sinon de t'estourdir la teste, pas vn Sauuage n'est malade, qu'on ne luy batte les oreilles de ce tambour, afin qu'il ne meure point, en as-tu veu de dispensez de la mort; ie te veux faire [260] vne proposition: Escoute moy patiemment, luy dis-ie, bas ton tambour dix iours durant, chante & faits chanter les autres tant que tu voudras, fais tout ce qui sera en ton possible pour recouurer ta santé, si tu n'en guary dans ce temps-là, confesse que ton tintamare, que tes hurlemens, & que tes chansons ne te sçauroient remettre en santé, abstiens toy dix autres iours de toutes ces superstitions, quitte ton tambour, & tous ces bruits dereglez, demande au Dieu que i'adore, qu'il te donne sa cognoissance, pense & crois que ton ame doit passer à vne autre vie que celle-cy, efforce toy d'aymer son bien cõme tu ayme le bien de ton corps, & quand tu auras passé ces dix autres derniers iours en ceste façon, ie me retireray trois iours durant en oraison dans vne petite cabane qu'on fera plus auant dans le bois, là ie prieray mon Dieu qu'il te donne la santé du corps & de l'ame, toy seul me viendras voir au temps que ie diray, & tu feras de tout ton cœur les prieres que ie t'enseigneray; promettant à Dieu que s'il luy plaist de te rendre la santé, tu appelleras tous les Sauuages de ce 132 lieu, & en [261] leur presence tu brusleras ton tambour, & toutes les autres badineries dont tu te sers pour les amasser, que tu leur diras que le Dieu des Chrestiens est le vray Dieu, qu'ils croyẽt en luy, & qu'ils luy obeïssent, si tu promets cecy veritablement & de cœur, i'espere que tu seras deliuré de ta maladie, car mon Dieu est tout puissant.

Or comme cét homme est tres desireux de recouurer sa santé, il ouurit les oreilles, & me dit, ton discours est fort bon, i'accepte les conditions que tu me donne; mais commence le premier, retire toy en oraison, & dis à ton Dieu qu'il me guarisse, car c'est par là qu'il faut commencer, & puis ie feray tout ce que tu m'as prescrit: ie ne cõmenceray point, luy reparty-ie, car si tu estois guary, pendant que ie prierois tu attribuerois ta santé à ton tambour, que tu n'aurois pas quitté; & non pas au Dieu que i'adore, lequel seul te peut guarir; non, me dit-il, ie ne croiray pas que cela vienne de mon tambour, i'ay chanté & fait tout ce que ie sçauois, & n'ay peu sauuer la vie à pas vn; moy-mesme estãt malade ie fais ioüer pour me guarir tous [262] les ressorts de mon art, & me voila plus mal que iamais; i'ay employé toutes mes inuentions pour sauuer la vie à mes enfans, notamment au dernier qui est mort depuis peu, & pour conseruer ma femme qui vient de trespasser, tout cela ne m'a point reüssi, & partant si tu me guaris, ie n'attribueray point ma santé à mon tambour, ny à mes chansons. Ie luy répondis que ie ne pouuois pas le guarir; mais que mon Dieu pouuoit tout, qu'au reste il ne falloit point faire de marché auec luy, ny luy prescrire des conditions comme il faisoit, disant qu'il me guarisse premierement, & puis ie croiray en luy: 134 dispose toy, luy fis ie, de ton costé, & sa bonté ne te manquera pas, que s'il ne te donne la santé du corps, il te donnera la santé de l'ame qui est incomparablement plus à priser. Ne me parle point de l'ame, me repart-il, c'est de quoy ie ne me soucie pas: voila (me monstrant sa chair) ce que i'ayme, c'est le corps que ie cheris, pour l'ame ie ne la voy point, en arriue ce qui pourra. As tu de l'esprit, luy fis-ie? tu parle comme les bestes, les chiens n'ayment que les corps; celuy qui a fait le Soleil [263] pour t'éclairer, n'a-il rien preparé de plus grand à ton ame, qu'à l'ame d'vn chien? Si tu n'ayme que ton corps tu perdras le corps & l'ame, si vne beste pouuoit parler elle ne parleroit que de son corps & de sa chair, n'as-tu rien par dessus les bestes qui sont faites pour te seruir? n'ayme-tu que la chair & le sang? ton ame est-elle l'ame d'vn chien que tu la traite auec vn tel mépris? peut estre que tu dis vray, me répond-il, & qu'il y a quelque chose de bon en l'autre vie: mais nous autres en ce pays-cy n'en sçauons rien, que si tu me rends la santé ie feray ce que tu voudras. Ce pauure miserable ne peut iamais releuer sa pensée plus haut que la terre: ne voyant donc aucune disposition en cét esprit superbe, qui croyoit pouuoir obliger Dieu, s'il croyoit en luy, ie le quittay pour lors, & me retiray pour reposer, car il estoit bien auant dans la nuit.

Le 3. de Decembre nous cõmençasmes nostre quatriesme station, ayans délogé sans trompette, mais non pas sans tambour: car le Sorcier n'oublioit iamais le sien, nous plantasmes nostre camp proche d'vn fleuue large & rapide, [264] mais peu profond, ils le nomment Ca pititetchiouetz, il se va dégorger dans le grand 136 fleuue de sainct Laurens, quasi vis à vis de Tadoussac, nos Sauuages n'ayans point icy de viandes pour faire des festins, ils faisoient des banquets de fumée, s'inuitans les vns les autres, dans leurs cabanes, & faisans la ronde à vn petit plat de terre remply de Tabac, chacun en prenoit vne cornetée qu'il reduisoit en fumée, remettant la main au plat s'il vouloit petuner dauantage: l'affection qu'ils portent à ceste herbe est au delà de toute créance, ils s'endormẽt le cabanet en la bouche, ils se leuent par fois la nuit pour petuner, ils s'arrestent souuent en chemin pour le mesme sujet, c'est la premiere action qu'ils font rentrant dans leurs cabanes: ie leur ay battu le fusil pour les faire petuner en ramants dans vn canot, ie leur ay veu souuent manger le baston de leur calumet, n'ayans plus de petun, ie leur ay veu racler & pulueriser vn calumet de bois pour petuner, disons auec compassion qu'ils passent leur vie dans la fumée, & qu'ils tombent à la mort dans le feu.

[265] I'auois porté du petun auec moy, non pour mõ vsage, car ie n'en prends point, i'en donnay largement selon que i'en auois à plusieurs Sauuages; m'en reseruant vne partie pour tirer de l'Apostat quelque mot de sa langue; car il ne m'eust pas dit vne parole qu'en le payãt de ceste monnoye, quand nos gens eurent consommé ce que ie leur auois donné, & ce qu'ils auoient en leur particulier, ie n'auois plus de paix, le Sorcier me pressoit auec vne importunité si audacieuse, que ie ne le pouuois souffrir, tous les autres sembloient me vouloir manger, quand ie leur en refusois: i'auois beau leur dire qu'ils n'auoient point de consideration, que ie leur en auois plus donné trois fois que ie ne m'estois reserué; vous voyez, 138 leur disois-ie, que i'ayme vostre langue, & qu'il faut que ie l'achepte auec cét argent, que s'il me manque on ne m'enseignera pas vn mot, vous voyez que s'il me faut vn verre d'eau, il faut que i'en aille chercher bien loing, ou que ie dõne vn bout de petun à vn enfant pour m'en aller querir; vous me dites que le petun rassasie, si la famine qui nous presse cõtinuë, i'en [266] veux faire l'experience, laissez moy ce peu que i'ay de reserue, il me fut impossible de resister à leur importunité, il fallut tirer iusques au bout, ce ne fut pas sans estonnement de voir des personnes si passionnées pour de la fumée.

Le sixiesme du mesme mois, nous délogeasmes pour la cinquiesme fois, il m'arriua vne disgrace au départ, au lieu de prẽdre le vray chemin, ie me iettay dans vn autre que nos chasseurs auoient fort battu, ie vay donc fort loing sans prendre garde que ie me perdois, ayant fait une longue traitte, ie m'apperceu que mon chemin se diuisoit en cinq ou six autres, qui tiroient qui deçà, qui delà, me voila demeuré tout court, il y auoit vn petit enfant qui m'auoit suiuy, ie ne l'osois quitter, car auss[i]-tost il se mettoit à pleurer, i'enfilay tantost l'vn, tantost l'autre de ces sentiers, & voyant qu'ils tournoient çà & là, & qu'ils n'estoient marquez que d'vne sorte de raquette, ie concluds que ces chemins ne conduisoient point au lieu où mes Sauuages alloient cabaner, ie ne sçauois que faire du petit garçon: car s'estant apperceu de nostre erreur il ne m'osoit [267] perdre de veuë sans se pasmer; d'ailleurs n'ayant qu'enuiron six ans il ne me pouuoit pas suiure, car ie doublois mes pas: ie m'aduisay de luy laisser mon manteau pour marque que ie retournerois, si ie trouuois nostre vray chemin, luy faisant 140 signe qu'il m'attendist, car nous ne nous attendions pas l'vn l'autre: ie iettay donc mon manteau sur la neige, & m'en reuay sur mes brisées criant de temps en temps pour me faire entendre de nos gens, si tant est que le bon chemin ne fust pas loing de moy; ie crie, i'appelle dans ces grands bois, personne ne répond, tout est dans vn profond silence, les arbres mesme ne faisoient aucun bruit, car il ne faisoit point de vent: le froid estoit si violent que ie m'attendois infailliblemẽt de mourir la nuit au cas qu'il me la fallust passer sur la neige, n'ayant ny hache ny fusil pour faire du feu; ie vay, ie viens, ie tourne de tous costez, ie ne trouue rien qui ne m'égare dauantage: la derniere chose que l'homme quitte c'est l'esperance, ie la tenois tousiours par vn petit bout, me figurant à toute heure que i'allois trouuer mon chemin; mais enfin apres [268] auoir bien tourné, voyant que les creatures ne me pouuoient donner aucun secours, ie m'arrestay pour presẽter mes petites prieres au Createur dont ie voyois ces grands bois tout remplis aussi bien que le reste du monde: il me vint vne pensée que ie n'estois pas perdu, puis que Dieu sçauoit bien où i'estois, & ruminant ceste verité en mon esprit, ie tire doucement vers le fleuue que i'auois trauersé au sortir de la cabane, ie crie, i'appelle de rechef, tout le monde estoit desia bien loing; ie commençois desia à laisser cheoir de mes mains le petit filet de l'esperance que i'auois tenu iusques alors, quand i'aduisay quelques vestiges de raquette derriere des broussailles, ie m'y transporte, & vidi vestigia virorum, & mulierum & infantium, en vn mot ie trouue ce que i'auois cherché fort long-temps, au commencement ie n'estois pas asseuré que c'estoit là vn 142 bon chemin, voila pourquoy ie me diligentay de le recognoistre: estant desia bien auancé ie trouue l'Apostat qui nous venoit chercher, il me demanda où estoit ce petit enfant, ie luy repars que ie l'auois laissé [269] aupres de mon manteau: i'ay, me dit-il, trouué vostre manteau & l'ay reporté à la nouuelle cabane; mais ie n'ay point veu l'enfant: me voila bien estonné, de l'aller chercher, c'estoit me perdre vne autre fois; ie prie l'Apostat d'y aller, il fit la sourde oreille, ie tire droit à la cabane pour en donner aduis, où enfin i'arriuay tout brisé & tout moulu pour la difficulté & pour la longueur des chemins que i'auois fait sans trouuer hostellerie que des ruisseaux glacez: si tost que les Sauuages me virent ils me demandent où estoit le petit garçon, crians que ie l'auois perdu, ie leur raconte l'histoire, les asseurants que ie luy auois laissé tout exprez mon manteau pour l'aller retrouuer, mais ayant quitté ce lieu là, ie ne sçauois où l'aller chercher, veu mesmement que ie n'en pouuois plus, n'ayant point mangé depuis le grand matin, & deux ou trois bouchées de boucan tant seulement, on me donna pour reconfort vn peu d'eau glacée, que ie fis chauffer dans vn chaudron fort sale, ce fut tout mon souper: car nos chasseurs n'ayans rien pris il fallut ieusner ce iour là. [270] Pour l'enfant, deux femmes m'ayans ouy depeindre l'endroit où ie l'auois laissé, coniecturant où il auoit tiré, l'allerent chercher, & le trouuerent. Il ne faut pas s'estonner si vn François se perd quelquesfois dans ces forests, i'ay veu de nos plus habiles Sauuages s'y esgarer plus d'vn iour entier.

Le 20. de Decembre, quoy que les Sauuages ne se mettent pas ordinairement en chemin pendant le mauuais 144 temps si fallut-il decabanner durant la pluye, & desloger à petit bruit sans desieuner, la fin [faim] nous faisoit marcher, mais le mal est, qu'elle nous suiuoit par tout où nous allions; car nous ne trouuions par tout, ou fort peu, ou point de chasse: En ceste station, qui fut la sixiesme, le Renegat me vint dire que les Sauuages estoient fort espouuantez, & mon hoste m'abordant tout pensif, me demanda si ie ne sçauois point quelque remede à leur mal-heur, il n'y a pas, me disoit-il, assez de neige pour tuer l'Orignac, des Castors, & des Porcs-espics, nous n'en trouuõs quasi point, que ferons nous? ne sçais tu point ce qui nous doit arriuer? ne sens tu point dans toy-mesme ce qu'il [271] faut faire? Ie luy voulus dire que nostre Dieu estoit tres-bon, & tres-puissant, qu'il falloit que nous eussions recours à sa misericorde, mais cõme ie ne parlois pas bien, ie priay l'Apostat de me seruir de truchement; ce miserable est possedé d'vn diable muet, iamais il ne voulut parler.

Le 24. Decembre, veille de la naissance de nostre Sauueur, nous decampasmes pour la septiesme fois, nous partismes sans manger, nous cheminasmes vn assez long temps; nous trauaillasmes à faire nostre maison, & pour nostre souper N. S. nous donna vn Porc-espic gros comme vn cochon de lait, & vn liéure, c'estoit peu pour dix-huict ou vingt personnes que nous estions, il est vray, mais la saincte Vierge & son glorieux Espoux sainct Ioseph, ne furent pas si bien traictez à mesme iour dans l'estable de Bethleem.

Le lendemain iour de resiouyssance parmy les Chrestiens, pour l'enfant nouueau né, fust pour nous vn iour de ieusne, on ne me donna rien du tout à manger; la faim qui fait sortir le loup du bois, m'y 146 fit entrer plus auant, pour chercher [272] des petits bouts d'arbres que ie mãgeois auec delices, des femmes ayant ietté aux chiens par mesgarde ou autrement, quelques rongneures de peaux dont on fait les cordes des raquettes, ie les ramassay, & en fis vn bon disner, quoy que les chiens mesmes, quand ils auoient tant soit peu à manger, n'en voulussent pas gouster: I'ay souuent mangé, notamment ce mois cy, des raclures d'escorces, des rongneures de peaux, & autres choses semblables, & cependant ie ne m'en suis point trouué mal.

Le mesme iour de Noël ie m'en allay sur le soir visiter nos voisins, nous n'estions plus que deux cabanes, celle du Sauuage Ekhenneabamate auoit tiré d'vn autre costé depuis cinq ou six iours, à raison qu'il n'y auoit pas assez de chasse pour nourrir tout le monde, ie trouuay deux ieunes chasseurs tout tristes, pour n'auoir rien pris ce iour là, ny le precedent, ils estoient comme tous les autres maigres & defaits, taciturnes & fort pensifs, comme gens qui ne pouuoient mourir qu'à regret, cela me toucha le cœur, apres leur auoir dit quelque parole de consolation, & donné quelque [273] esperance de chose meilleure, ie me retiray en ma cabane pour prier Dieu, l'Apostat me demãda quel iour il estoit? il est auiourd'huy la feste de Noël, luy respondis-je; Il fut vn peu touché, & se tournant vers le Sorcier, il luy dit, qu'à tel iour estoit né le Fils de Dieu que nous adorions nommé Iesvs: Remarquant en luy quelque estonnement, ie luy dis que Dieu vsoit ordinairement de largesse en ces bons iours, & que si nous auions recours à luy qu'il nous assisteroit infailliblement; à cela point de parole, mais aussi point de contrarieté: prenant donc 148 l'occasion au poil, ie le priay de me tourner en sa langue deux petites Oraisons, dont i'en dirois l'vne, & les Sauuages l'autre. Esperant que nous serions secourus, l'extremité où nous estions reduits luy fit accorder que de bond, que de volée ce que ie demandois. Ie composay sur l'heure deux petites prieres, qu'il me tourna en Sauuage, me promettant en outre qu'il me seruiroit d'interprete si i'assemblois les Sauuages, me voila fort content. Ie recommande l'affaire à N.S. & le lendemain matin ie dresse vn petit Oratoire, ie pends aux [274] perches de la cabane vne seruiette que i'auois portée, sur laquelle i'attachay vn petit Crucifix & vn Reliquaire, que deux personnes fort Religieuses m'ont enuoyé: ie tire encore quelque Image de mon Breuiaire, cela fait ie fais appeller tous les Sauuages de nos deux cabanes, & ie leur fais entendre tant par mon begayemẽt, que par la bouche d'vn Renegat, que la crainte de mourir de faim faisoit parler, qu'il ne tiendroit qu'à eux qu'ils ne fussent secourus, ie leur dis que nostre Dieu est la bonté mesme, que rien ne luy estoit impossible, qu'encore bien qu'on l'eust mesprisé, que si neantmoins on croyoit, & si on esperoit en luy d'vn bon cœur, qu'il se monstreroit fauorable: Or comme ces pauures gens n'auoient plus d'esperance en leurs arcs, ny en leurs flesches, ils me tesmoignerẽt vn grand contentement de ce que ie les auois assemblez, m'asseurant qu'ils feroient tout ce que ie leur commanderois; ie prens mon papier & leurs lis l'Oraison que ie desirois qu'ils fissent, leur demandant s'ils estoient contens d'addresser au Dieu que i'adorois ces paroles de tout leur cœur, & sans feintise; ils me [275] respondent tous nimiroueritenan, nimiroueritenan, nous en sommes cõtens, nous en sõmes contens. Ie me mets le premier 150 à genoux, & eux tous auec moy, iettans les yeux sur nostre petit Oratoire, le seul Sorcier demeuroit assis, mais luy ayant demandé s'il n'en vouloit pas estre aussi bien que les autres, il fit comme il me voyoit faire, nous estions testes nuës, ioignans tous les mains & les esleuans vers le Ciel, ie commençay donc à faire ceste Oraison tout haut en leur langue.

Mon Seigneur qui auez tout fait, qui voyez tout, & qui cognoissez tout, faites nous misericorde. O Iesvs, fils du Tout-puissant, qui auez pris chair humaine pour nous, qui estes né pour nous d'vne Vierge, qui estes mort pour nous, qui estes resuscité & monté au Ciel pour nous, vous auez promis que si on demandoit quelque chose en vostre nom que vous l'accorderiez: ie vous supplie de tout mon cœur de donner la nourriture à ce pauvre peuple, qui veut croire en vous, & qui vous veut obeïr, ce peuple vous promet entierement que si vous le secourez qu'il croira parfaitement en vous, & qu'il vous obeïra [276] de tout son cœur, Mon Seigneur, exaucez ma prieré, ie vous presente ma vie pour ce peuple tres content de mourir à ce qu'ils viuent, & qu'ils vous cognoissent. Ainsi soit-il.

A ces paroles de mourir pour eux que ie proferois pour gagner leur affection, quoy qu'en effect ie le disois de bon cœur, mon hoste m'arresta & me dit; retranche ces paroles, car nous t'aymons tous, & ne desirons pas que tu meure; ie vous veux témoigner, leur repartis-ie, que ie vous ayme, & que ie donnerois volontiers ma vie pour vostre salut, tant c'est chose grande que d'estre sauué. Apres que i'eus faict ceste Oraison, chacun d'eux à mains iointes, teste nuë, & les genoux en terre, comme i'ay remarqué, profera 152 la suiuante, que ie prononçois deuant-eux fort posément.

Grand Seigneur qui auez fait le ciel & la terre, vous sçauez tout, vous pouuez tout, ie vous promets de tout mon cœur (ie ne sçaurois vous mentir) ie vous promets entierement, que s'il vous plaist nous donner nostre nourriture, que ie vous obeïray cordiallement, que ie croiray asseurément en vous, ie vous [277] promets sans feintise, que ie feray tout ce qu'on me dira deuoir estre fait pour vostre amour, aydez nous, vous le pouuez faire, ie feray asseurément ce qu'on m'enseignera deuoir estre fait pour l'amour de vous, ie le promets sans feintise, ie ne ments pas, ie ne sçaurois vous mentir, aydez nous à croire en vous parfaictement, puis que vous estes mort pour nous. Ainsi soit il.

Ils firent tous ceste priere, & l'Apostat & le Sorcier aussi bien que les autres, c'est à Dieu de iuger de leurs cœurs, ie leur dis après cela qu'ils s'en allassent à la chasse auec confiance, ce qu'ils firent, la plus part témoignans par leur visage & par leurs paroles qu'ils auoient pris plaisir en ceste action; mais auant que d'en voir le succez couchons en leur langue ces deux Oraisons, afin qu'on voye l'œconomie de leurs paroles, & leur façon de s'énoncer.

NouKhimame missi ca Khichitaien missi,

Mon Capitaine tout qui as fait tout,

Khesteritamen missi, ouia batamen chaoueriminan.

qui sçais tout, qui vois, aye pitié de nous.

Iesus oucouchichai missi ca nitaouitát

Iesus Fils out qui a faict

[278] Niran ca outchi, arichiirinicasouien, niran

de nous qui à cause es fait hõme de nous

154 ca outchi, iriniouien iscouechich, niran ca

qui à cause es né d'vne fille de nous, qui

outchi nipien, niran ca outchi ouascoukhi,

à cause es mort de no⁹, qui à cause au ciel

itoutaien; egou Khisitaie, nitichenicassouiniki,

es allé ainsi tu disois en mon nom

Khegoueia netou tamagaouian niga chaoueriKan,

quelque chose si ie suis requis i'ẽ auray pitié,

khitaia mihitin naspich ou mitchimi,

ie te prie entierement la nourriture

a richiriniou miri, ca ouitapouetasc,

à ce peuple dõne qui veux croire en toy,

ca ouipamitasc, arichiriniou khiticou

qui te veux obeyr, ce peuple te dit

naspich, ouitchihien khigatapouetatin

entièrement, si tu m'ayde ie te croyray

naspich, khiga pamtatim naspich, Noukhimame

parfaitemẽt ie t'obeïray entieremẽt mon Capitaine

chaoueritamitaouitou, oui

aye pitié de ce que ie dis, si tu

michoutchi nipousin, iterimien

veux en contrechãge ma mort penser

ouirouau mag iriniouisonan, egou inousin.

quant à eux qu'ils viuent, ainsi soit-il.

Voicy celle qu'ils prononcerent.

[279] KhicheouKhiman ca khichitaien ouascou,

Grand Capitaine qui as faict le Ciel

mag asti, missi khikhisteriten, missi

& la Terre tout tu sçais toute chose,

Khipicoutan, khititin naspich, tanté

tu fais bien ie te dis entierement comment

bona oukhiran? khititin naspich, oui

pourrois-je mẽtir? ie te dis sãs feintise si

miriatchi nimitchiminan, ochitau

156 tu no⁹ veux dõner nostre nourriture tout

tapoué khiga pamitatin, ochitau,

expres asseurement ie t'obeïray tout

tapoué Khiga tapouetatin, Khititin

expres, en verité ie te croiray, ie te le dis

naspich, niga tin missi, Khé eitigaouané;

entieremẽt, ie feray tout ce qu'õ me dira

khir khe, outchi Khian, ouitchihinan,

de toy à cause ie le feray ayde nous

khiga khi ouitchi hinan, naspich niga

tu nous peux ayder absolument ie feray

tin missi, khé eitigaouané khir Khe, outchi

tout ce qu'on me dira de toy à cause

khian, Khititin naspich; nama

ie le feray ie te le dis sans feintise, ie ne

nikhirassin, nama khinita khirassicatin,

mens pas, ie ne te sçaurois mentir,

ouitchihinan khigai tapouetatinan naspich;

ayde nous affin que nous te croyons parfaictemẽt,

[280] ouichihinan mag missi iriniouakhi

ayde nous puis de tous les hõmes

ouetchi nipouané. Egou inousin.

à cause tu es mort, ainsi soit-il.

Nos chasseurs ayans fait leurs prieres s'en allerent, qui deça qui de là chercher dequoy manger, mon hoste & deux ieunes hommes s'en vont voir vne cabane de Castors, qu'ils auoient voulu quitter desesperans d'y rien prendre, il en prit trois pour sa part: l'estant allé voir apres midy, ie luy en vis prendre vn de mes yeux, ses compagnons en prirent aussi ie ne sçay pas combien, le Sorcier estant allé ce iour là à la chasse auec vn sien ieune neueu, prit vn Porc épic, & 158 découurit la piste d'vn Orignac qui fut depuis tué à coup de fleches, contre l'attente de tous tant qu'ils estoient, n'y ayant que fort peu de neige, vn ieune Hiroquois, dont ie parleray cy apres, tua aussi vn fort beau Porc-epic; bref chacun prit quelque chose, il n'y eut que l'Apostat qui reuint les mains vuides, le soir mon hoste apportant trois Castors, comme il rentroit dans la cabane ie luy tendis la main, il s'en vint tout ioyeux vers moy recognoissant le [281] secours de Dieu, & demandant ce qu'il deuoit faire, ie luy dits Nicanis, mon bien-aymé, il faut remercier Dieu qui nous a assisté; voila bien dequoy, dit l'Apostat, nous n'eussions pas laissé de trouuer cela sans l'ayde de Dieu. A ces paroles ie ne sçais quels mouuemens ne sentit mõ coeur, mais si ce traistre m'eust donné vn coup de poignard, il ne m'eust pas plus attristé, il ne falloit que ces paroles pour tout perdre, mon hoste ne laissa point de me dire qu'il feroit ce que ie voudrois, & il se fust mis en deuoir, si le Sorcier ne se fust point ietté à la trauerse: car l'Apostat n'a point d'authorité parmy les Sauuages, ie voulu attendre le festin qu'on deuoit faire, où tous les Sauuages se deuoient trouuer; afin qu'ayant deuant leurs yeux les presens que nostre Seigneur leur auoit fait, ils fussent mieux disposez à recognoistre son assistance; mais comme ie vins à leur vouloir parler, le Renégat fasché de ce que luy seul n'auoit rien pris, non seulement ne me voulut pas ayder, ains au contraire il m'imposa silence me commandant tout nettement de me taire; non feray pas luy dis-ie, si vous estes [282] ingrat les autres ne le seront pas, le Sorcier voyant qu'on estoit assez disposé à m'écouter; croyant que si on me prestoit l'oreille il perdroit autant de son crédit, me dit d'vne 160 façon arrogante, tais-toy, tu n'as point d'esprit, il n'est pas temps de parler, mais de manger; ie luy voulu demander s'il auoit des yeux, s'il ne voyoit pas manifestement le seruice de Dieu, mais il ne me voulut pas écouter; les autres qui estoient dans vn profond silence, voyans que le Sorcier m'estoit contraire, n'oserent pas m'inuiter à parler: si bien que celuy qui faisoit le festin se mit à le distribuer, & les autres à manger; voila mes pourceaux qui deuorent le gland sans regarder celuy qui leur abbat, c'est à qui se réioüira dauantage, ils estoient remplis de contentement & moy de tristesse, si fallut-il bien se remettre à la volonté de Dieu, l'heure de ce peuple n'est pas encore venuë.

Cecy se passa le Lundy, le Mercredy suiuant mon hoste & vn ieune chasseur tuerent à coups de fleches l'Orignac dont ils auoient veu les traces, ils en virent d'autres depuis, mais comme [283] il y auoit fort peu de neige ils n'en peurent iamais approcher à la portée de leurs arcs si tost qu'ils eurẽt ceste proye ils la mirent en pieces, en apportant vne bonne partie dans nos cabannes, & enseuelissans le reste soubs la neige; voila tout le monde en ioye, on fait vn grand banquet où ie fus inuité, voyant les grandes pieces de chair qu'on donnoit à vn chacun, ie demanday à l'Apostat si c'estoit vn festin à mãger tout, & m'ayant dit qu'ouy, il est impossible, luy reparty-ie, que ie mange tout ce qu'on m'a donné, si faut-il bien, me répondit-il, que vous le mangiez, les autres sont assez empeschez à manger leur part, il faut que vous mangiez la vostre: ie luy fais entẽdre que Dieu deffendoit ces excez, & que ie ne le cõmettrois point y allast-il de la vie, ce mechant blasphemateur pour animer les autres 162 contre moy, leur dit que Dieu estoit fasché de ce qu'ils auoient à manger: Ie ne dis pas cela, luy repliquay-ie en Sauuage, mais bien qu'il deffend de manger auec excez, le Sorcier me repart, ie n'ay iamais plus grand bien sinon quand ie suis saoul. Or comme ie ne pouuois venir à [284] bout de ma portion, i'inuite vn Sauuage mon voisin d'en prendre vne partie, luy donnant du petun en recompense de ce qu'il mangeoit pour moy, i'en iette vne autre partie secrettement aux chiens, les Sauuages s'en estans doutez par la querelle qui suruint entre ces animaux, se mirent à crier contre moy, disans que ie cõtaminois leur festin, qu'ils ne prendroient plus rien, & que nous mourrions de faim, les femmes & les enfans ayans sceu cela, me regardoient par apres comme vn tres-meschant homme, me reprochant auec dedain que ie les ferois mourir, & veritablement si Dieu ne nous eust donné rien de long temps, i'estois en danger d'estre mis à mort pour auoir commis vn tel sacrilege: voila, iusques où s'estend leur superstition, pour obuier à cét inconuenient: les autres fois on me fit ma part plus petite, & encore me dit on que ie n'en mãgeasse sinon que ce que ie voudrois, qu'eux mangeroient le reste, mais sur tout que ie me donnasse bien de garde de rien ietter aux chiens.

Le trentiesme du mesme mois de Decembre, nous decabanasmes, faisans [285] chemin nous passasmes sur deux beaux lacs tout glacez; nous tirions vers l'endroit où estoit la cache de nostre Orignac, qui ne dura guere en ceste huictiesme demeure.

Le Sorcier me demanda si en vérité i'aymois l'autre vie que ie luy auois figuré remplie de tous biens, ayant répondu que ie l'aymois en effect; & moy, dit-il, 164ie la haï: car il faut mourir pour y aller, & c'est dequoy ie n'ay point d'enuie, que si i'auois la pensée & la creance que cette vie est miserable, & que l'autre est pleine de delices, ie me tuërois moy-mesme pour me deliurer de l'vne, & ioüir de l'autre: Ie luy repars que Dieu nous defendoit de nous tuer, ny de tuer autruy; & que si nous nous faisions mourir nous descendrions dans la vie de malheur, pour auoir contreuenu à ses cormmandemens: Hé bien, dit il, ne te tuë point toy-mesme, mais moy ie te tuëray pour te faire plaisir, afin que tu ailles au Ciel, & que tu ioüisse des plaisirs que tu dis: Ie me sousris, luy repliquant que ie ne pouuois pas consentir qu'on m'ostast la vie sans pecher: Ie vois bien, me fit-il, en se moquant [286] que tu n'as pas encore enuie de mourir non plus que moy, non pas repliquay-ie en cooperant à ma mort.

En ce mesme temps nos chasseurs ayans poursuiuy vn Orignac, & ne l'ayans peu prendre, l'Apostat se mit à blasphemer, disant aux Sauuages, le Dieu qui est marry quand nous mangeons, est maintenant bien ayse de ce que nous n'auons pas dequoy disner: & voyant vue autre fois qu'on apportoit quelques Porcs-espics, Dieu, disoit-il, se va fascher de ce que nous nous saoulerons. O langue impie que tu seras chastié! esprit brutal que tu seras confus, si Dieu ne te fait misericorde! que les Anges & les sainctes Ames redoublent autant de fois leur Cantique d'honneur & des loüanges, que cét athée le blasphemera; ce pauure miserable ne laisse pas par fois d'auoir quelques craintes de l'enfer, qu'il tasche d'étouffer tant qu'il peut, comme ie le menaçois vn iour de ces tourmens, peut estre, me fit-il, que nous autres n'auons point d'ame, ou que nos ames ne sont pas faites comme 166 les vostres, ou qu'elles ne vont point en mesme [287] endroit: qui est iamais venu de ce pays là pour nous en dire des nouuelles? ie luy reparty qu'õ ne pouuoit voir le Ciel sans cognoistre qu'il y a vn Dieu, qu'on ne peut conceuoir qu'il y a vn Dieu, sans conceuoir qu'il est iuste, & par consequent qu'il rend à vn chacun selon ses œuures, d'où s'ensuiuent de grandes recompenses, ou de grands chastimens: cela est bon, repliqua-il, pour vous autres que Dieu assiste, mais il n'a point soin de nous: car quoy qu'il fasse, nous ne laisserons pas de mourir de faim, ou de trouuer de la chasse; iamais cét esprit hebeté ne peut conceuoir que Dieu gouuerne la grande famille du monde, auec plus de cognoissance & plus de soin qu'vn Roy ne gouuerne son Royaume, & vn pere de famille sa maison; ie serois trop long de rapporter tout ce que ie luy dis sur ses blasphemes & sur ses resueries.

Le quatriesme de Ianuier de ceste année mil six cens trente quatre, nous allasmes faire nostre habitation depuis nostre depart des riues du grand fleuue cherchant tousiours à viure. I'obiectay en cét endroit au Sorcier qu'il n'estoit [288] pas bon Prophete, car il m'auoit asseuré les deux dernieres fois que nous auions decabané, qu'il neigeroit abondamment aussi tost que nous aurions changé de demeure, ce qui se trouua faux, i'ay rapportay cecy à mon hoste pour luy oster vne partie de la creance qu'il a en cét homme qu'il adore, il me répondit que le Sorcier ne m'auoit pas asseuré qu'il neigeroit, mais qu'il en auoit seulement quelque pensée; non, dis-ie, il m'a asseuré qu'il voyoit venir la neige, & qu'elle tomberoit aussi-tost que nous aurions cabané, Khikhirassin, me fit-il, tu as menty, si tost que vous leur dites quelque chose 168 qu'ils ne veulent point accorder ils vous payent de ceste monnoye.

La veille des Rois, mon hoste me dit qu'il auoit fait vn songe qui luy donnoit bien de l'apprehension; i'ay veu, dit-il, en dormant que nous estions reduits en la derniere extremité de la faim, & celuy que tu nous dis qui a tout fait, m'a asseuré que tu tomberas dans vne telle langueur, que ne pouuant plus mettre vn pied deuant l'autre tu mourras seul delaissé au milieu des bois, ie [289] crains que mon songe ne soit que trop veritable: car nous voila autant que iamais dans la necessité faute de neige: i'eu quelque pensée que ce songeur me pouuoit bien ioüer quelque mauuais traict, & m'abandonner tout seul pour faire du Prophete; voila pourquoy ie me seruy de ses armes, opposant altare contra altare, songe contre songe: & moy, luy dis-ie, i'ay songé tout le contraire, car i'ay veu dans mon sommeil deux Orignaux, dont l'vn estoit desia tué, & l'autre encore viuant, bon, dit le Sorcier, voila qui va bien, aye esperance, tu raconte de bonnes nouuelles, en effect i'auois fait ce songe quelques iours auparauant, hé bien, dis ie à mon hoste, lequel de nos deux songes sera trouué veritable, tu dis que nous mourrons de faim, & moy ie dis que non, il se mit à rire. Alors ie luy dis que les songes n'estoient que des mensonges, que ie ne m'appuyois point là dessus, que mon esperance estoit en celuy qui a tout fait, que ie craignois neantmoins qu'il ne nous chastiast, veu qu'aussi tost qu'ils auoient à mãnger, ils se gaussoient de [290] luy notamment l'Apostat, il n'a point d'esprit, dirent-ils, ne prends pas garde à luy.

Le iour que les trois Rois adorerent nostre Seigneur, nous receusmes trois mauuaises nouuelles; La 170premiere, que le ieune Hyroquois estãt allé à la chasse le iour precedent n'estoit point retourné, & comme on sçauoit bien que la faim l'ayant affoibly il ne se pouuoit pas beaucoup éloigner, on creut qu'il estoit mort, ou demeuré en quelque endroit si debile pour n'auoir dequoy manger, que la faim & le froid le tuëroient, en effect il n'a plus paru depuis, quelques vns ont pensé qu'il pourroit bien s'estre efforcé de retourner en son pays; mais que la plus part asseurent qu'il est mort en quelque endroit sur la neige, c'estoit l'vn des trois prisonniers à Tadoussac, dont i'ay parlé és premieres lettres que i'ay enuoyé de ce païs-cy, ses deux compatriotes furent executez à mort auec des cruautez nompareilles, pour luy comme il estoit ieune on luy sauua la vie à la requeste du sieur Emery de Can, que nous priasmes d'interceder [291] pour luy, ce pauure ieune homme s'en souuenoit fort bien, il auoit grande enuie de demeurer en nostre maison; mais le Sorcier á qui il appartenoit ne le voulut iamais donner ny vendre.

La seconde mauuaise nouuelle nous fut apportée par vn ieune Sauuage qui venoit d'vn autre cartier, lequel nous dit qu'vn Sauuage d'vne autre cabane plus esloignée estoit mort de disette, que ses gens estoient fort épouuentez ne trouuans pas de quoy viure, & nous voyant dans la mesme necessité, cela l'estonnoit encore dauantage. La troisiesme fut que nos gens découurisent la piste de plusieurs Sauuages qui nous estoient plus voisins que nous ne pensions, car ils venoient chasser iusques sur nos marches, enleuans nostre proye & nostre vie tout ensemble; ces trois nouuelles abbatirent grandement nos Sauuages, l'alarme estoit par tout, on ne marchoit plus que la 172 teste baissée, ie ne sçay comme i'estois fait, mais ils me paroissoiẽt tous fort maigres, fort pensif, & fort mornes, si l'Apostat m'eust voulu [292] ayder à porter & à gagner le Sorcier, c'estoit bien le temps; mais son diable muet luy lioit sa langue.

Il faut que ie remarque en ce lieu le peu d'estime que font de luy les Sauuages, il est tombé dans vne grande confusion, voulant éuiter vn petit reproche, il a quitté les Chrestiens & le Christianisme, ne pouuãt souffrir quelques brocards des Sauuages, qui se gaussoient par fois de luy de ce qu'il estoit Sedentaire, & non vagabond comme eux, & maintenãt il est leur ioüet & leur fallot, il est esclaue du Sorcier, deuant lequel il n'oseroit branler, ses freres & les autres Sauuages m'ont dit souuent qu'il n'auoit point d'esprit, que c'estoit vn busart, qu'il ressembloit à vn chien, qu'il mourroit de faim si on ne le nourrissoit, qu'il s'égaroit dans les bois comme vn European, les femmes en font leur entretien, si quelque enfant pleuroit n'ayant pas dequoy manger, elles luy disoient, tais-toy, tais-toy, ne pleure point, Petrichtrich, c'est ainsi qu'on le nomme par mocquerie, rapportera vn Castor, & tu mangeras; quand elles [293] l'entendoient reuenir, allez voir, disoiẽt elles aux enfans, s'il n'a point tué vne Orignac se gaussant de luy comme d'vn mauuais chasseur, qui est vn grand blasme parmy les Sauuages: car ces gens là ne sçauroient trouuer ou retenir des femmes, l'Apostat en a desia eu quatre ou cinq à la faueur de ses freres, toutes l'ont quitté, celle qu'il auoit cét hyuer me disoit qu'elle le quitteroit au Prin-temps, & si elle eust esté de ce païs, elle l'auroit quitté dés lors; i'apprends qu'en effect elle l'a quitté.

174 Certain iour nos chasseurs estans tous dehors, il se tint vn conseil des femmes dans nostre cabane: or comme elles ne croyoient pas que ie les peusse entendre, elles parloient tout haut, & tout librement, déchirant en pieces ce pauure Apostat, l'occasion estoit que le iour precedent il n'auoit rien rapporté à sa femme d'vn festin où il auoit esté inuité, & qui n'estoit pas à tout manger, ô le gourmand, disoient-elles, qui ne donne point à manger à sa femme! encore s'il pouuoit tuer quelque chose, il n'a point d'esprit, il mange tout [294] comme vn chien: il y eut vne grande rumeur entre les femmes sur ce sujet: car comme elles ne vont point ordinairement aux festins, elles seroient bien affligées, si leurs marys perdoient la bonne coustume qu'ils ont de rapporter leurs restes à leurs familles, le Renegát suruenant pendant que cés femmes le depeignoient, elles sceurent fort bien dissimuler leur ieu, luy témoignant vn aussi bon vsage qu'à l'ordinaire, voire mesme celle qui en disoit plus de mal, luy donna vn bout de petun, qui estoit pour lors vn grand present.

Le neufiesme de Ianuier, vn Sauuage nous venant visiter nous dit, qu'vn homme & vne femme du lieu dont il venoit estoient morts de faim, & que plusieurs n'en pouuoient plus, le pauure homme ieusna le iour de sa venuë aussi bien que nous, pource qu'il ny auoit rien à manger, encore fallut-il attendre iusques au lendemain à dix heures de nuit, que mon hoste rapporta deux Castors qui nous firent grand bien.

[295] Le iour suiuant nos gens tuerent le second Orignac, ce qui causa par tout vne grande ioye, il est vray qu'elle fut vn peu troublée par l'arriuée d'vn Sauuage, & de deux ou trois femmes, & d'vn enfant 176 que la famine alloit bien tost égorger, s'ils n'eussent fait rencontre de nostre cabane, ils estoient fort hideux, l'homme particulierement plus que les femmes, dont l'vne auoit accouché depuis dix iours dans les neiges, & dans la famine, ayant passé plusieurs iours sans manger.

Mais admirez s'il vous plaist l'amour que ces barbares se portent les vns aux autres, on ne demanda point a ces nouueaux hostes pourquoy ils venoient sur nos limites, s'ils ne sçauoient pas bien que nous estions en aussi grand danger qu'eux, qu'ils nous venoient oster le morceau de la bouche; ains au contraire on les receut, non de paroles, mais d'effect, sans courtoisie exterieure, car les Sauuages n'en ont point, mais non pas sans charité: on leur ietta de grandes pieces de l'Orignac nouuellement tué, [296] sans leur dire autre parole, mitisoukou mangez, aussi leur eust on fait grand tort d'appliquer pour lors leurs bouches à autre vsage: pendant qu'ils mangeoient on prepara vn festin, auquel ils furent traictez à grand plat, ie vous en réponds: car la portion qu'on leur donna à chacun, sortoit beaucoup hors de leurs ouragans qui sont tres capables.

Le seiziesme du mesme mois nous battismes la campagne, & ne pouuans arriuer au lieu où nous pretendions, nous ne fismes que gister dans vne hostelerie que nous dressasmes à la haste, & le lendemain nous poursuiuismes nostre chemin passans sur vne montagne si haute, qu'encore que nous ne montassions point iusques au sommet, qui me paroissoit armé d'horribles rochers, neantmoins le Sorcier me dit, que si le Ciel obscurcy d'vn broüillard eust esté serain nous eussions veu à mesme tẽps Kebec & Tadoussac, esloignez 178 l'vn de l'autre de quarante lieuës pour le moins, ie voyois au dessous de moy auec horreur des precipices, qui me [297] faisoient trembler, i'apperceuois des montagnes au milieu de quelques plaines qui me paroissoient comme des petites tours, ou plustost comme de petits chasteaux, quoy qu'en effect elles fussent fort grandes & fort hautes: figurez vous quelle peine ont ces barbares de traisner si haut leur bagage, i'auois de la peine à monter, i'en trouuois encore plus à descendre: car quoy que ie m'esloignasse des precipices, neantmoins la pante estoit si roide, qu'il estoit fort aisé de rouler à bas, & de s'aller fendre la teste contre vn arbre.

Le vingt neufiesme nous acheuasmes de descendre ceste montagne portant nostre maison sur la pante d'vne autre où nous allasmes: voila le terme de nostre pelerinage, nous commencerons d'oresnauant à tourner bride & à tirer vers l'Isle où nous auons laissé nostre Chaloupe, nous vismes icy les sources de deux petits fleuues, qui se vont rendre dans vn fleuue aussi grand au dire de nos Sauuages, que le fleuue de S. Laurens, ils l'appellent Oueraouachticou.

[298] Ceste douziesme demeure nous a deliuré de la famine, car les neiges se trouuant hautes assez pour arrester les grandes iambes de l'Elan, nous eusmes dequoy manger. Au commencement ce n'estoient que festins & que danses, mais cela ne dura pas, car on se mit bientost à faire seicherie passant de la famine dans la bonne nourriture, ie me portay bien: mais passant de la chair fraische au boucan ie tombay malade, & ne recouuray point entierement la santé que trois semaines apres mon retour en nostre petite maisonnette. Il est vray que depuis le commencement 180 de Feurier iusques en Auril nous eusmes tousiours dequoy manger, mais d'vn boucan si dur & si sale & en si petite quantité, horsmis quelques iours d'abondance qui se passoient en festins que nos Sauuages contoient ces derniers, mois aussi bien que les precedens entre les mois & les hyuers de leurs famines. Ils me disoient que pour estre traicté mediocrement & sans patir, il nous falloit vn Elan gros comme vn boeuf en deux iours, tant à raison du [299] nombre que nous estions, comme aussi qu'on mange beaucoup de chair quand on n'a ny pain ny autre chose pour faire durer la viande, adioustez qu'ils sont grands disneurs, & que la chair d'Elan ne demeure pas long-temps dans l'estomach.

Ie me suis oublié de dire ailleurs que les Sauuages content les années par les hyuers, pour dire quel aage as-tu, ils disent combien d'hyuers as-tu passé? ils content aussi par les nuicts comme nous faisons par les iours, au lieu que nous disons, il est arriué depuis trois iours, ils disent depuis trois nuicts.

Le cinquiesme de Feurier nous quittasmes nostre douziesme demeure pour aller faire la treiziesme, ie me trouuois fort mal, le Sorcier me tuoit auec ses cris, ses hurlemens, & son tambour, il me reprochoit incessamment que ie faisois l'orgueilleux, & que le Manitou m'auoit fait malade aussi bien que les autres. Ce n'est pas, luy disois-je, le Manitou ou le diable qui m'a causé ceste maladie, mais la mauuaise nourriture qui m'a gasté l'estomach, & les [300] autres trauaux qui m'ont debilité, tout cela ne le contentoit point, il ne laissoit pas de m'attaquer, notamment en la presence des Sauuages, disant que ie m'estois mocqué du Manitou, & qu'il s'estoit vangé de moy comme d'vn 182 superbe. Vn iour comme il me faisoit ces reproches ie me leue en mon seant, ie luy dis, afin que tu sçache que ce n'est point ton Manitou qui cause les maladies & qui tuë les hommes, escoute comme ie luy parleray, ie m'escrie en leur langue grossissant ma voix, approche Manitou, vien demon, massacre moy si tu as le pouuoir, ie te deffie, ie me mocque de toy, ie ne te crains point, tu n'as point de pouuoir sur ceux qui croyent & qui ayment Dieu, viens & me tuë si tu as les mains libres, tu as plus de peur de moy que ie n'ay de toy, le Sorcier fut espouuenté, & me dit pourquoy l'appelle tu? puis que tu ne le crains pas, c'est signe que tu l'appelle afin qu'il te tuë, non pas luy dis-je, mais ie l'appelle afin que tu ayes cognoissance qu'il n'a point de puissance sur ceux qui adorent le vray Dieu, & pour te faire [301] voir qu'il n'est pas la seule cause des maladies comme tu crois.

Le neufiesme du mesme mois de Feurier nous battismes la campagne, le Sorcier nonobstant ma maladie me vouloit faire porter du bagage à toute force, mais mon hoste eust pitié de moy, voire mesme m'ayant rencontré en chemin que ie n'en pouuois quasi plus, il prit de son bon gré ce que ie portois, & le mit sur sa traisne.

Le quatorziesme & quinziesme nous fismes de longues traictes pour aller planter nostre cabane proche de deux petits Orignaux que mon hoste auoit tué: faisant chemin on reconneust la piste d'vn troisiesme, mon hoste fit arrester le camp pour l'aller descouurir; i'estois en l'arriere garde de nostre armée, c'est à dire que ie venois doucement derriere les autres quand tout à coup ie vis paroistre cét Elan qui couroit droit à moy, & mon hoste apres, qui luy donnoit 184 la chasse, la neige estoit fort haute, voila pourquoy il ne fit qu'enuiron cinq cens pas deuant que d'estre mis à mort, nous cabanames aupres & en fismes curée.

[302] L'Apostat continuant icy ses blasphemes, me demandoit deuant ses freres pour les animer contre Dieu, pourquoy ie priois celuy qui n'entendoit ny ne voyoit rien, ie le repris fort vertement & luy imposay silence.

Le sixiesme iour de Mars nous changeasmes de demeure, le Sorcier, le Renegat, & deux ieunes chasseurs tirerent deuant nous droit aux riues du grand fleuue, l'occasion de cette separation fut que mon hoste braue chasseur ayant descouuert quatre Orignaux, & quantité de cabanes de Castors, ne pouuant luy seul en mesme temps chasser en tant d'endroits fort separez, le Sorcier mena ces ieunes chasseurs pour courre les Orignaux, & luy demeura pour les Castors: cette separation me fit du bien & du mal. Du bien, pource que ie fus deliuré du Sorcier, ie n'ay point de paroles pour declarer l'importunité de ce meschant homme. Du mal, pource que mon hoste ne prenant point d'Orignaux nous ne mangions que du boucan qui m'estoit fort contraire, que s'il prenoit des Castors on en faisoit seicherie, [303] excepté des petits que nous mangions, les plus beaux & les meilleurs estoient reseruez pour les festins qu'ils deuoient faire au Printemps, au lieu où ils s'estoient donnez le rendez-vous.

Le treiziesme du mesme mois nous fismes nostre dix-huictiesme demeure proche d'vn fleuue dont les eaux me sembloient sucrées apres la saleté des neiges fonduës que nous beuuions és stations precedentes 186 dans vn chauderon gras & enfumé, ie commençay à ressentir en ce lieu l'incommodité du coucher sur la terre bien froide pendant l'hyuer & fort humide au Printemps, car le costé droit sur lequel ie reposois s'estourdit tellement par la froidure qu'il n'auoit quasi plus de sentiment: or craignant de ne remporter que la moitié de moy-mesme dans nostre petite maison, l'autre demeurante paralytique, ie promis vne chemise & vne petite robbe à vn enfant pour vn meschãt bout de peau d'Orignac que sa mere me donna, ceste peau non passée estoit bien aussi dure que la terre, mais non pas si humide, [304] i'en fis mon lict qui se trouua si court que la terre qui auoit iusques alors pris possession de tout mon corps en retint encore la moitié.

Depuis le depart du Sorcier, mon hoste prenoit plaisir à me faire des questions, notamment des choses naturelles, il me demanda vn iour comme la terre estoit faite, & m'apportant vne écorce & vn charbon, il me la fit décrire, ie luy despeins donc les deux Hemispheres, & apres luy auoir tracé l'Europe, l'Asia, & l'Affrique, ie vins à nostre Amerique, luy monstrant comme elle est vne grande Isle, ie luy d'écriuy la coste de l'Acadie, la grande Isle de Terre-neufue, l'entrée & golfe de nostre grand fleuue de sainct Laurens, les peuples qui habitent ses riues, le lieu où nous estions pour lors, ie montay iusques aux Algonquains, aux Hiroquois, aux Hurons, à la nation neutre, &c. luy designant les endroits plus & moins peuplez, ie passay à la Floride, au Perou, au Brasil, &c. luy parlant en mon jargon de ces contrées le mieux qu'il m'estoit possible, il m'interrogea [305] plus particulierement des païs dont il a connoissance, puis m'ayans 188 escouté fort patiemment, il s'escria prononçant vne de leurs grandes admirations Amonitatinaniouikhi! Ceste robbe noire dit vray! parlant à vn vieillard qui me regardoit, puis se tournant deuers moy il me dit, nicanis, mon bien aymé tu nous donne en verité de l'admiration, car nous connoissons la plus part de ces terres & de ces peuples, & tu les a descrit comme ils sont, i'insiste là dessus, comme tu vois que ie dis vray parlant de ton pays, aussi dois-tu croire que ie ne ments pas parlant des autres, ie le croy ainsi, me repartit-il, ie poursuy ma pointe, comme ie suis veritable en parlant des choses de la terre, aussi tu dois te persuader que ie ne voudrois pas mentir quand ie te parle des choses du Ciel, & partant tu dois croire ce que ie t'ay dit de l'autre vie: il s'arresta vn peu de temps tout court, puis ayant vn peu pensé à part soy, Ie te croiray, dit-il quand tu sçauras bien parler, nous auons maintenant trop de peine à nous faire entendre.

[306] Il m'a fait mille autres questions, du Soleil, de la rondeur de la terre, des Antipodes, de la France, & fort souuent il me parloit de nostre bon Roy, il admiroit quand ie luy disois que la France estoit remplie de Capitaines, & que le Roy estoit le Capitaine de tous les Capitaines, il me prioit de le mener en France pour le voir, & qu'il luy feroit des presens, ie me mis à rire luy disant que toutes leurs richesses n'estoient que pauureté à comparaisson des grandeurs du Roy, Ie veux dire, me fit-il, que ie feray des presens à ceux de sa suitte, pour luy ie me contenteray de le voir, il racontoit par apres aux autres ce qu'il m'auoit ouy dire. Il me demanda vne autrefois s'il y auoit de grands saults dans la mer, c'est à dire des cheutes d'eau, il y en a beaucoup dans les fleuues de 190 ce païs cy, vous verrez vne belle riuiere coulant fort doucement tomber tout à coup dans vn lit plus bas, les terres ne s'abbaissant pas également, mais comme par degrez en certains endroits, nous voyons vn de ces sauts proche de Kebec nommé le saut de [307] Montmorency, c'est vne riuiere qui vient des terres, & qui se precipite de fort haut dans le grand fleuue de sainct Laurens, les riues qui le bornent estans fort releuées en cét endroit: Or quelques Sauuages croyoient que la mer a de ces cheutes d'eau dans lesquelles se perdent quantité de nauires ie luy ostay cét erreur, ces inegalitez ne se retrouuans point dans l'Ocean.

Le vingt-troisiesme de Mars nous repassames le fleuue Capititetchioueth, que nous auions passé le troisiesme de Decembre.

Le trentiesme du mesme mois, nous vinsmes cabaner sur vn fort beau lac, en ayant passé vn autre plus petit en nostre chemin, ils estoient encore autant glacez qu'au milieu de l'hyuer, mon hoste me consoloit icy me voyant fort foible & fort abbatu, ne t'attriste point, me disoit-il, si tu t'attriste tu seras encore plus malade, si ta maladie augmente tu mourras, considere que voicy vn beau pays, ayme-le, si tu l'ayme, tu t'y plairas, si tu t'y plais tu te resioüiras, si tu te resioüis tu guariras, ie [308] prenois plaisir d'entendre le discours de ce pauure barbare.

Le premier iour d'Auril nous quittasmes ce beau lac & tirasmes à grande erre vers nostre rendez vous, nous passames la nuit dans vn meschant trou enfumé & dés le matin continuasmes nostre chemin faisant plus en ces deux iournées que nous n'auions faict en cinq, Dieu nous fauorisa d'vn beau temps: car il gela 192 bien fort, & l'air fut serain, s'il eust fait vn degel comme les iours precedens, & que nous eussions enfoncé dans la neige, comme quelques fois il nous est arriué, ou il m'eust fallu traisner, ou ie fusse demeuré en chemin tant i'estois mal. Il est bien vray que la nature a plus de force qu'elle ne s'en fait accroire, ie l'experimentay en ceste iournée en laquelle i'estois si foible, que m'asseant de temps en temps sur la neige pour me reposer, tous les membres me trembloient, non pas de froid, mais par vne debilité qui me causoit vne sueur au front. Or comme i'estois alteré voulant puiser de l'eau dans vn torrent [309] que nous rencontrasmes, la glace que ie cassois auec mon baston tomba dessous moy, & fit vn grand escarre: quand ie me vis auec mes raquettes aux pieds sur ceste glace flottante sur vne eau fort rapide, ie sautay plustost sur le bord du torrent, que ie n'eu consulté si ie le deuois faire, & la nature qui suoit de foiblesse trouua assez de force pour sortir de ceste grande eau n'en voulant pas tant boire à la fois, ie n'eus que la peur d'vn peril qui fut plustost esuité que recognu.

Le danger passé ie poursuiuis mon chemin assez lentement, aussi ne pouuois-ie pas estre bien fort, car outre la maladie qui ne m'auoit point quitté parfaitement depuis le dernier iour de Ianuier, ie ne mangeois ces derniers iours que trois bouchées de boucan le matin, & cheminois quasi tout le reste du iour sans autre rafraichissement qu'vn peu d'eau quand i'en pouuois rencontrer. Enfin i'arriuay apres les autres sur les riues du grand fleuue, & trois iours apres nostre [310] arriuée, sçauoir est le quatriesme du mesme mois d'Auril nous sismes nostre vingt-troisiesme station allant planter nostre cabane dans l'Isle où 194 nous auions laissé nostre Chalouppe, nous y fusmes tres-mal logez: car outre que le Sorcier s'estoit remis auec nous, nous estions si remplis de fumée que nous n'en pouuions plus, d'ailleurs le grand fleuue estant icy falé, & l'Isle n'ayant aucune fontaine nous ne beuuions que des eaux de neige, ou de pluye encore tres sale. Ie ne fis pas long sejour en ce lieu, mon hoste voyant que ie ne guerissois point, prit resolution de me remener en nostre maisonnette, le Sorcier l'en voulut detourner, mais ie rompis ses menées, i'obmets mille particularitez pour tirer à la fin.

Le cinquiesme du mois d'Auril, mon hoste, l'Apostat, & moy, nous embarquasmes dans vn petit canot pour tirer à Kebec fur le grand fleuue, apres auoir pris congé de tous les Sauuages: or comme il faisoit encore froid nous ne fusmes pas loin que [311] nous trouuasmes vne petite glace formée pendant la nuict, qui feruoit de superficie aux eaux, voyant qu'elle s'estendoit fort loing, nous donnons dedans, l'Apostat qui estoit deuant, la brifant auec son auiron: or soit qu'elle fut trop trenchante, ou l'écorce de nostre gòndole trop foible, il se fit vne ouuerture qui donna entrée à l'eau dans nostre canot & à la crainte dans nostre cœur, nous voila aussi tost tous trois en action, mes deux Sauuages de ramer, & moy de ietter l'eau, nous tirons à force de rames dans vne Isle que nous rencontrasmes fort à propos, & mettant pied à terre les Sauuages empoignent leur canot, le tirent de l'eau, le renuerfent, battent leur fusil, font du feu, recousent l'escorce fenduë, y appliquent de leur bray, qui est vne espece d'encens qui decoule des arbres, remettent le canot à l'eau, nous nous rembarquons & continuons nostre chemin: ie leur dy voyant 196 ce peril que s'ils croyoient rencontrer souuent de ces glaces tranchantes, [312] qu'il valloit mieux retourner d'où nous estions partis, & attendre que le temps fut plus chaud, il est vray me fit mon hoste que nous auons pensé perir, si l'ouuerture eust esté vn peu plus grande c'estoit fait de nous, poursuiuons neantmoins nostre chemin ces petites glaces ne m'estonnent pas. Sur les trois heures du soir nous apperceusmes deuant nous vn banc de glaces espouuentables qui nous bouchoit le chemin, s'estendant au trauers de ce fleuue à plus de quatre lieuës loin: nous fusmes vn peu estonnez, mes gens ne laissent pas pourtant de les aborder ayant remarqué vne petite esclaircie, ils se glissent là dedans faisant tournoyer nostre petite gondole, tantost d'vn costé & puis tantost de l'autre pour gaigner tousjours païs, en fin nous trouuasmes ces glaces si fort serrées qu'il fut impossible d'auancer ny de reculer, car le mouuement de l'eau nous enferma de toutes parts, au milieu de ces glaces s'il y fut suruenu vn vent vn peu violent nous estions froissez & brisez & [313] nous & nostre canot comme le grain entre les deux pierres du moulin, car figurez-vous que ces glaces sont plus grandes & plus espaisses que les meules & la tremuë tout ensemble, mes Sauuages nous voyant si empressez sautent de glaces en glaces comme vn ecririeux d'arbres en arbres, & les repoussant auec leurs auirons font passage au canot dans lequel i'estois tout seul plus prest de mourir par les eaux que de maladie, nous combattismes en cette sorte iusques à cinq heures du soir que nous prismes terre: ces barbares sont tres habiles en ces rencontres, ils me demandoient par fois dans la plus grande presse des glaces si ie ne craignois point, veritablement 198 la nature n'ayme point à ioüer à ce jeu là, & leurs sauts de glaces en glaces me sembloient des sauts perilleux & pour eux & pour moy, veu mesmes que leür pere, à ce qu'ils me disoient, s'est autrefois noyé en semblable occasion. Il est vray que Dieu dont la bonté est par tout aymable, se trouue aussi bien dessus les eaux [314] & parmy les glaces que dessus la terre, nous eschappasmes encore de ce danger qui ne leur sembla pas si grand que le premier.

Arriuez que nous fusmes à terre nostre maison fut de nous coucher au pied d'vn arbre, nous mangeasmes vn peu de boucan, beusmes vn peu d'eau de neige fonduë, ie fis mes petites prieres & me couchay aupres d'vn bon feu qui contrequarra la gelée & le froid de la nuict.

Le lendemain nous nous embarquasmes de bonne heure, la marée qui nous auoit amené ces armées de glaces les porta la nuict d'vn autre costé, nous fismes donc quelque chemin deliurés de cette importunité, mais le vent s'animant & nostre petite gondole, commençant à dancer sur les vagues nous nous iettasmes incontinant à terre. I'auois prié mes gens de prendre auec eux des escorces pour nous faire la nuict vne cabane & des viures pour quelques iours n'estant pas asseurez du retardement que le mauuais temps nous pourroit apporter, ils ne firent [315] ny l'vn ny l'autre, si bien, qu'il fallut coucher à l'air, & manger en quatre iours les viures d'vne iournée, ils s'attendoient d'aller à la chasse, mais les neiges se fondans ils ne pouuoient courre, le temps faisant mine de s'appaiser nous nous rembarquasmes, mais à peine auions nous faict trois lieuës que le vent se renforcant nous va ietter dans des glaces que la marée nous ramenoit, 200 & nous d'enfiler viste vn petit ruisseau, de sauter tous trois sur ces grandes glaces qui estoient aux bords, & de gagner la terre, nos Sauuages portant sur les espaules nostre nauire d'écorce.

Nous voila donc logez à vne pointe de terre exposée à tous vents, nous mettons nostre canot derriere nous pour nous abrier, & comme nous craignions la pluye ou la neige mon hoste iette vne meschante peau sur des perches, & voila nostre maison faicte. Les vents furent si violens toute la nuict qu'ils nous penserent enleuer nostre canot, le lendemain la [316] tempeste continuant dessus l'eau, mes gens n'ayant dequoy manger vont à la chasse par vn tres mauuais temps, le Renegat ne prit rien, mon hoste rapporta vn perdreau qui nous seruit de deieusner, de disner, & de soupper, vray que i'auois mangé quelques fueilles de fraisiers, que la terre nouuellement descouuerte de neige en quelques endroits me donna, nous passasmes donc cette iournée sans faire chemin, la nuict les tempestes, les foudres de vent, & le froid nous assaillirent auec telle furie qu'il fallut ceder à la force, nous estions couchez à platte terre, car ils n'auoient pas pris la peine de la couurir de branches de pin, nous nous leuasmes tout glassez pour entrer dans le bois & emprunter des arbres l'abry contre le vent & le couuert contre le Ciel, nous fismes vn bon feu, & nous nous endormismes sur la terre encore toute humide pour auoir seruy de lict à la neige peut-estre la nuict precedente, Dieu soit beny sa prouidence est adorable, nous mettions ce [317] iour & ceste nuict dans le catalogue des iours & des nuicts mal-heureux, & ce nous fut vn temps de bon-heur, car si ces tempestes & ces vents ne nous eussent tenus prisonniers 202 sur terre pendant qu'ils escartoient les glaces les poussant à val la riuiere, elles se fussent reserrées au trauers des Isles où nous deuions passer, & nous eussent faict mourir de trop boire ecrasant nostre canot, ou de trop peu manger, nous arrestans dans quelque Isle deserte. Bref si nous fussions eschappez c'eust esté à grand peine, de plus i'estois si debile & si malade quand ie m'embarquay, que si i'eusse preueu les trauaux du chemin i'aurois creu deuoir mourir cent fois, & neantmoins Nostre Seigneur commença à me fortifier dans ces difficultez, en sorte que i'ayday mes Sauuages à ramer notamment sur la fin de nostre voyage.

Le iour qui suiuit ces tempestes paroissant encor animé de vents, mon hoste & l'Apostat s'en allerent à la chasse, vne heure apres leur depart le [318] Soleil paroist beau, l'air serein, les vents s'appaisent, les vagues cessent, la mer se calme, en vn mot il abonit pour parler en matelot, me voila bien en peine de vouloir suiure mes Sauuages à la trace pour les appeller, c'estoit mettre vn tortuë apres des leuriers, ie iette les yeux au Ciel comme au lieu de refuge les abbaissant vers la terre ie vy mes gens courir comme des cerfs sur l'orée du bois, tirans vers moy, aussi-tost ie me leue portant nostre petit bagage vers la riuiere, mon hoste arriuant eco, eco, pousitau, pousitau, viste, viste, embarquons nous, embarquons nous, plustost fait qu'il n'est dit, le vent & la marée nous fauorisent, nous allons à rames & à voile, nostre petit vaisseau d'escorce fendant les ondes d'vne vitesse incomparable, nous arriuasmes en fin sur les dix heures du soir à la pointe de la grande Isle d'Orleans, il n'y auoit plus que deux lieuës iusques à nostre petite 204 maison, mes gens n'auoient point mangé tout le iour, ie leur donne courage, nous nous [319] efforçons de passer outre, mais le courant de la marée qui descendoit encor estant fort rapide, il fallut attendre le flot pour trauerser la grande riuiere, nous entrasmes cependant dans vne anse de terre, & nous nous endormismes sur le sable aupres d'vn bon feu que nous allumasmes.

Sur la minuit le flot retournant nous nous embarquasmes, la Lune nous éclairant, le vent & la marée nous faisoient voler, mon hoste n'ayant pas voulu tirer du costé que ie luy dis, nous pensasmes nous perdre dans le port, car comme nous vinsmes pour entrer dans nostre petite riuiere nous la trouuasmes encore toute glacée, nous voulusmes approcher du riuage, mais le vent y auoit rangé vn grand banc de glace, qui se choquoient les vnes les autres nous menaçoient de mort si nous les abordions, si bien qu'il fallut tourner bride, mettre le cap au vent & se roidir contre la marée, c'est icy que ie vy les vaillances de mon hoste, il s'estoit [320] mis deuant comme au lieu le plus important dans les grands perils, ie le voyois au trauers de l'obscurité de la nuict qui nous donnoit de l'horreur & augmentait nostre danger, bander ses nerfs, se roidir contre la mort, tenir nostre petit canot en estat dans des vagues capables d'engloutir vn grand vaisseau, ie luy crie Nicanis ouabichtigoueiaKhi ouabichtigoueiakhi, mon bien-aymé à Kebec, à Kebec, tirons là. Quand nous vismes à doubler le saut au Matelot, c'est le detour de nostre riuiere dans le grand fleuue, vous l'eussiez veu ceder à vne vague, en couper vne autre par le milieu, éuiter vne glace, en repousser vne autre, combattre incessamment contre vn furieux vent de Nordest qu'il auoit en teste.

206 Ayans éuité ce danger nous voulumes aborder la terre, mais vne armée de glaces animée par la fureur des vents nous en deffendoit l'entrée: nous allõs donc iusques deuant le fort costoyant le riuage, cherchant dans les tenebres [323 i.e., 321] vn petit iour ou vne petite eclaircie parmy ces glaces; mon hoste ayant apperceu vn rerin on detour qui est au bas du fort, où les glaces ne branloiẽt point pour estre à l'abry du vent, en detourne auec son auiron trois on quatre furieuses qu'il rencontre, & vous iette là dedans, il saute viste hors du Canot, craignant le retour des glaces, criant Capatau, desembarquons nous; le mal estoit que les glaces estoient si hautes & si épaisses sur le riuage, qu'à peine y pouuois-ie atteindre auec les mains; ie ne sçauois à quoy m'aggraffer pour sortir du Canot, & monter sur ces riues glacées; ie prends mon hoste par le pied d'vne main, & de l'autre vn coing de glace que ie rencontre, & ie me iette en sauueté, vn auec les deux autres, vn lourdaut deuient habille homme en ces occasions: estant sorty du Canot, ils l'enleuent par les deux bouts, & le mettent en lieu d'asseurance: cela fait nous nous regardons tous trois, & mon hoste reprenant son haleine, me dit, nicanis khegat nipiacou, mon grand amy, nous auons pensé mourir: il auoit encore horreur, de la grandeur du peril. Il est vray que [324 i.e., 322] s'il n'eust eu des bras de Geant (il est homme grand & puissant) & vne industrie non commune, ny aux François ny aux Sauuages, ou vne vague nous eust englouty, ou le vent nous eust renuersé, ou vne glace nous eust escrasé; disons plustost que si Dieu n'eust esté nostre Nocher, les ondes qui battent les riues de nostre demeure auroient esté nostre sepulchre. De 208 verité quiconque habite parmy ces peuples, peut bien dire auec le Roy Prophete, anima mea in manibus meis semper: depuis peu vn de nos François s'est noyé en semblable occasion, & encore moindre, car il ny auoit plus de glaces.

Estant échappez de tant de périls, nous trauersâmes nostre riuiere sur la glace, qui n'estoit point encore partie; & sur les trois heures apres minuict, le Dimanche de Pasques fleurie 9. d'Auril, ie r'entray dans nostre petite maisonnette, Dieu sçait auec quelle ioye de part & d'autre, ie trouuay la maison remplie de paix & de benediction, tout le monde en bonne santé par la grace de nostre Seigneur. Monsieur le Gouuerneur sçachant mon retour, m'enuoya [323] deux des principaux de nos François pour sçauoir de ma santé, son affection nous est tres sensible; l'vn des chefs de l'ancienne famille du pays accourut aussi pour se resioüyr de mon retour, ils auoient connu par le peu de neige qu'il y a eu cét Hiuer, moins rigoureux que les autres, que les Sauuages & moy par consequent estions pressez de la faim; c'est ce qui en resioüit quelques-vns iusques aux larmes, me voyant reschappé d'vn si grand danger; nostre Seigneur soit beny dans les temps & dans l'eternité.

I'ay bien voulu d'escrire ce voyage, pour faire voir à V. R. les grands trauaux qu'il faut souffrir en la suitte des Sauuages, mais ie supplie pour la derniere fois ceux qui auroient enuie de les ayder, de ne point prendre l'espouuente, non seulement pource que Dieu se faict sentir plus puissamment dans la disette, & dans les delaissements des creatures, mais aussi pource qu'il ne sera plus de besoin de faire ces courses, quãd on aura la connoissance des langues, & qu'on les aura 210 reduites en preceptes: I'ay rapporté quelques particularitez [324] qui se pouuoient obmettre, i'en ay passé beaucoup sous silence, qu'on auroit peu lire auec plaisir, mais la crainte d'estre long, & mon peu de loisir, me fait tomber dans le desordre; il est vray que i'escris à vne personne, quæ ordinabit me charitatem, les autres qui verront cette Relation par son entremise, me feront la mesme faueur. Ie dirois volontiers ces deux mots, à quiconque lira ces escrits, ama & fac quod vis, retournons à nostre journal.

Le 31. de May, arriua vne chalouppe de Tadoussac, qui apportoit nouuelle que trois vaisseaux de Messieurs les Associez estoient arriuez, deux estoient dans le port, & le troisiéme au Moulin Baude, c'est vn lieu proche de Tadoussac, que les François ont ainsi nommé: on attendoit le quatriéme, dans lequel commandoit Monsieur du Plessis, general de la flotte, qui vint bien-tost apres, & loüa grandement le Capitaine Bontemps, pour s'estre rendu fort recommandable en la prise du nauire Anglois, dont i'ay parlé cy-dessus; si tost que ces bonnes nouuelles furent portées à Mõsieur de Champlain, comme il n'obmet [325] aucune occasion de nous tesmoigner son affection, il nous en fit donner aduis par homme exprés, nous enuoyans en outre les lettres du R. P. Lallement qui m'escriuoit qu'il estoit arriué auec N. F. Iean Ligeois en bonne santé, & qu'au premier vent il seroit des nostres, il est aisé à conjecturer auec quelle ioye nous benismes & remerciasmes nostre Seigneur de ces bonnes & si fauorables nouuelles; il arriua deux iours apres dans la barque que commandoit Monsieur Castillon, qu'on dit s'estre fort bien comporté en la prise de l'Anglois.

Le quatriéme iour de Iuin Feste de la Pentecoste le 212 Capitaine de Nesle arriua à Kebec, dans son vaisseau estoit Mõsieur Giffard, & toute sa famille, composée de plusieurs personnes qu'il ameine, pour habiter le pays, sa femme s'est mõstrée fort courageuse à suiure son mary: elle estoit enceinte quand elle s'embarqua; ce qui luy faisoit apprehender ses couches, mais nostre Seigneur la grandement fauorisée, car huict iours apres son arriuée, sçauoir est le Dimanche de la Saincte Trinité, elle s'est deliurée fort heureusement d'vne fille qui se porte [326] fort bien, & que le Pere Lallement baptisa le lendemain.

Le 24. du mesme mois, feste de S. Iean Baptiste, le vaisseau de l'Anglois commandé par le Capitaine de Lormel, monta iusques icy, & nous apporta le P. Iacques Buteux en assez bonne santé, Monsieur le General nous honorant de ses lettres, me manda que ce bon Pere auoit esté fort malade pendant la trauersée, & le Pere nous dit qu'il auoit esté secouru & assisté si puissamment, & si charitablement de Monsieur le General & de son Chirurgien, qu'il en restoit tout confus, maintenant il se porte mieux que iamais il n'a fait.

Le premier de Iuillet le P. Breboeuf & le P. Daniel partirent dans vne barque, pour s'en aller aux trois Riuieres, au deuant des Hurons, la barque alloit commencer vne nouuelle habitation en ce quartier là, le P. Dauost qui estoit descendu de Tadoussac, pour l'assistance de nos François, suiuit nos Peres trois iours apres, en la compagnie de Monsieur le General, qui se vouloit trouuer à la traite auec ces peuples. Ils attendoient là quelque temps les Hurons, qui ne sont point descendus en si grand nombre cette année qu'à l'ordinaire, à raison que les Hiroquois estans aduertis 214 que cinq cens hommes de cette nation tiroient en leur pays, pour leur faire la guerre, leurs allerent au deuant au nombre de quinze cens dit on, & ayant surpris ceux qui les vouloient surprendre: ils en ont tué enuiron deux cens, & pris plus d'vne centaine de prisonniers, dont Louys Amantacha est du nombre; on disoit que son pere estoit mis à mort, mais le bruit est maintenant qu'il s'est sauué des mains de l'ennemy. On nous rapporte que ces Hiroquois [327] triomphans ont renuoyé quelques Capitaines aux Hurons pour traitter de paix, retenans par deuers eux les plus apparens, apres auoir cruellement massacré les autres.

Cette perte a esté cause que les Hurons sont venus en petites trouppes, au commencement ils ne sont descendus que sept Canots: Le Pere Brebœuf en ayant eu nouuelle, les aborde, & fait tout ce qu'il peut pour les engager à le receuoir, & ses compagnons, & les porter en leur pays, ils s'y accordent volontiers. Là dessus [328] vn Capitaine Algonquain, nommé la Perdrix, qui demeure en ville, fit vne harangue, par laquelle il recommandoit qu'on n'embarquast aucun François: Voila les Hurons qui doiuent passer par le pays de ce Capitaine, à leur retour entierement refroidis: sur ces entrefaites arriue Monsieur du Plessis, tout cecy se passoit en vn lieu nommé les trois Riuieres, trente lieuës plus haut que Kebec; comme il desiroit ardemment que nos Peres penetrassent dans ces nations, il fit assembler les Algonquains en Conseil, notamment ce Capitaine, pour luy faire rendre raison de sa deffence; il en apporte plusieurs, on luy satisfaict sur le chãp, il insistoit, comme ie le conjecture, des lettres du Pere Brebœuf, sur le 216 desordre qui arriueroit, au cas que quelque François mourut aux Hurons; on luy repart que les Peres n'estans point en son pays, la paix entre les François, & ses Compatriotes, ne seroit point rompue, quoy qu'ils mourussent d'vne mort naturelle ou violente. Voila les Algonquains contents: mais les Hurons commencerent à s'excuser sur leur [329] petit nombre, qui ne sçauroit passer tant de François sur la petitesse de leurs Canots, & sur leurs maladies; en vn mot ils eussent bien voulu embarquer quelques François bien armez, mais non pas de ces longues robbes, qui ne portent point d'arquebuses. Monsieur du Plessis presse tant qu'il peut, prent nostre cause en main, on trouue place pour quelques vns; vn certain Sauuage s'adresse au Pere, & luy dit, fais moy traiter mon petun pour de la porcelaine, & mon Canot estant deschargé; ie prendray vn François, le Pere n'en auoit point, mais Monsieur du Plessis sçachãt cela, & Monsieur de l'Espinay acheterent ce petun; voila donc place pour six personnes, quand se vint à s'embarquer, les Sauuages qui estoient malades en effect, disent qu'ils n'en sçauroient porter que trois, deux ieunes hommes Frãçois, & vn Pere; les Peres promettẽt qu'ils rameront, ils font des presents, Monsieur du Plessis en fait aussi, insiste tant qu'il peut, ils n'en veulent point receuoir dauantage.

Le Pere Brebœuf a recours à Dieu, [330] voicy comme il parle en sa lettre: Iamais ie ne veys embarquement tant balotté & plus trauersé par les menées, comme ie croy de l'ennemy commun du salut des hommes, c'est vn coup du Ciel que nous soyons passé outre, & en effect du pouuoir du Glorieux sainct Ioseph, auquel Dieu m'inspira dans le desespoir de 218 toutes choses, de promettre 20. sacrifices en son honneur; ce veu fait, le Sauuage qui auoit embarqué Petit Pré, l'vn de nos François, le quitta pour me prendre, veu mesme que Monsieur du Plessis insistoit fort que cela se fist. Et ainsi le Pere Brebœuf, le Pere Daniel, & vn ieune homme nommé le Baron, furent acceptez de ces Barbares qui les portent en leur pays dans des Canots d'escorce. Restoient le Pere Dauost, & cinq de nos François, ne demandez pas si le Pere estoit triste: voyant partir ses compagnons sans luy, & sans quasi rien porter des choses necessaires pour leur vie, & pour leurs habits: De verité ils ont monstré qu'ils auoient vn grand cœur! car le desir d'entrer dans le pays de la Croix, leur fit quitter leur petit bagage, pour ne point chercher [331] leurs Sauuages qui se trouuoient mal, se contentants des ornements de l'Autel, & se confiant du reste en la prouidence de nostre Seigneur, leur depart de trois Riuieres fut si precipité, qu'ils ne peurent pas nous rescrire: mais estant arriuez au lõg Sault, à quelque quatre vingts lieuës de Kebec, & rencontrant des Hurons qui descendoient, ils nous enuoyerent quelques lettres, dans l'vne desquelles le Pere Brebœuf ayant raconté les difficultez de son embarquement, parle ainsi: Ie prie V. R. de remercier, mais de bonne façon Monsieur du Plessis, auquel apres Dieu nous deuons grandement en nostre embarquement: car outre les presents qu'il a fait aux Sauuages, tant publics que particuliers, & la Porcelaine qu'il a traittée, il a tenu autant de conseils que nous auons desiré, il nous a fourny de viures au depart, & nous a honorez de plusieurs coups de Canon; & le tout auec vn grand soing & vn tesmoignage d'vne tres-particuliere affection.

220 Nous nous en allons à petites iournées bien sains, quand à nous, mais nos Sauuages sont tous malades, nous ramons [332] continuellement, & ce d'autant plus que nos gens sont malades pour Dieu & pour les ames racheptés du sang du Fils de Dieu, que ne faut-il faire! tous nos Sauuages sõt tres-cõtents de nous, & ne voudroiẽt pas en auoir embarqué d'autres; ils disent tant de biẽ de nous à ceux qu'ils rẽcõtrent, qu'ils leurs persuadent de n'en embarquer point d'autres, Dieu soit beny. V. R. excuse à l'escriture & l'ordre, & le tout: nous partons si matin, gistons si tard, & ramons si continuellement, que nous n'auons quasi pas le loisir de satisfaire à nos prieres; de sorte qu'il m'a fallu acheuer la presente à la lueur du feu, ce sont les propres paroles du Pere, qui adjouste en vn autre endroit, que les peuples par où ils passent sont quasi tous malades, & meurent en grand nombre. Il y a eu quelque espece d'Epidimie cette année, qui s'est mesme communiquée aux François, mais Dieu mercy personne n'en est mort, c'estoit vne façon de rougeolle, & vne oppression d'estomach; reuenons aux trois Riuieres.

Ceux qui attendoient quelque autre occasion pour s'embarquer, furent consolez [333] par la venuë de trois Canots, dans lesquels Monsieur du Plessis fit embarquer le Pere Dauost, & deux de nos François, auec vne vigilance incomparable, comme m'escrit le Pere. A quelque temps de là vindrent encore d'autres Hurons, il plaça dans leurs Canots & hommes & bagage; en vn mot tout ce qui restoit, si bien que trois de nos Peres, & six de nos François, sont montez aux Hurons.

Ils ont trois cents lieuës à faire dans des chemins 222 qui font horreur à en ouyr parler les Hurons, auec lesquels ils vous cachent de deux iours en deux iours de leur farine pour manger au retour, il n'y a point d'autres hostelleries que ces cachettes, s'ils manquent à les retrouuer, ou si quelqu'vn les desrobe, car ils sont larrons au dernier point, il se faut passer de manger, s'ils les retrouuent; ils ne font pas pour cela grande chere, le matin ils detrempent vn peu de cette farine auec de l'eau, & chacun en mange enuiron vne ecuellée; là dessus ils ioüent de leur auiron tout le iour & sur la nuit: ils mangent comme [334] au point du iour, c'est la vie que doiuent mener nos Peres iusques à ce qu'ils soient arriués au païs de ces barbares, où estants, ils se feront bastir vne maison d'escorce, dans laquelle ils viuront du bled & de farine d'inde, de poisson en certain temps: pour la chair, comme il n'y a point de chasse ou ils sont, ils n'en mangent pas six fois l'an, s'ils ne veulent manger leurs chiens, comme fait le peuple qui en nourrit, comme on fait des moutons en Frãce; leur boisson c'est de l'eau. Voila les delices du païs, pour les sains & pour les malades, le pain, le vin, les diuerses sortes de viandes, les fruits, & mille raffraichissements qui sõt en France, ne sont point encore entrés dans ces contrées.

La mõnoye dõt ils acheteront leurs viures, leur bois, leur maisõ d'écorce, & autres necessités, sont des petits canons ou tuiaux de verre, des couteaux, des alesnes, des castelognes, des chaudieres, des haches: & choses semblables, c'est l'argent qu'il faut porter auec soy: si la paix se fait entre les Hurons, & les Hiroquois, ie preuoy vne grande porte ouuerte à l'Euangile, [33 i.e., 335] nous disons alors auec ioye & 224 auec tristesse messis, quidem multa operarij vero pauci: car on ver[r]a la disette de personnes qui entendent les langues. I'apprend qu'en 25 ou 30 lieuës de pays qu'occupent les Hurons, d'autres en mettent bien moins; il se trouue plus de trente mille ames, la nation neutre est bien plus peuplée, les Hiroquois le sont grandement, les Algonquains ont vn pays de fort grande estenduë. Ie ne souhaitterois maintenant que cinq ou six de nos Peres en chaqu'vne de ces nations, & cependant ie n'oserois les demander quoy que pour vn qu'on desire, il s'en presente dix toute prests de mourir dans ces trois: mais i'apprend que tout ce que nous auons en France pour cette mission est peu: comme donc prendrons nous les enfans, notamment de ces nations peuplées, pour les nourrir & les instruire, las! faut il que les biens de la terre, empeschent les biens du Ciel! que n'auons nous tant seulement les mies de pain qui tombent de la table des riches du monde, pour donner à ces petits enfans! Ie ne me plains [336] point, ie ne demande rien à qui que ce soit: mais ie ne puis tenir mes sentiments, quand ie voy que la fange (que sont autres choses les biens d'icy bas) empesche que Dieu ne soit conneu & adoré de ces peuples. Et si quelqu'vn trouue estrange que ie parle en cette sorte, qu'il vienne, qu'il ouure les yeux, qu'ils voyent ces peuples crier apres le pain de la parole de Dieu, & s'il n'est touché de compassion, & s'il ne crie plus haut que moy, ie me condam[ne]ray à vn perpetuel silence.

Le troisiesme d'Aoust Monsieur de Champlain retournant des trois Riuieres où il estoit allé apres le depart de nos Peres, nous dit qu'vn truchement François pour la nation Algonquine venant d'auec les 226 Hurons, auoit rapporté nouuelle que le Pere Brebeuf souffroit grãdement, que ses Sauuages estoient malades, qu'il ramoit incessamment pour les soulager: que le Pere Daniel estoit mort de faim, où en grand danger d'en mourir, à raison que les Sauuages qui l'ont embarqué quittans le chemin ordinaire où ils auoient faict les chaches [337] de leurs viures, auoient tiré dans les bois, esperant trouuer vne certaine nation qui leur dõneroit à manger, mais n'ayant point trouué ce peuple errant qui s'estoit transporté ailleurs, on conjecture qu'ils sont tous, Sauuages & François en danger de mort; veu mesmement qu'il n'y a point de chasse en ce quartier là, & que la pluspart de ces Barbares sont malades, Dieu soit beny de tout. Ceux qui meurent allants au martyre, ne laissent pas d'estre martyrs. Quand au Pere Dauost, il se porte bien; mais les Sauuages qui le menent luy ont desrobé vne partie de son bagage; i'ay desia dit qu'estre Huron & Larron, ce n'est qu'vne mesme chose; voila ce qu'a rapporté ce truchement. Les Peres nous escrirons l'an qui vient, s'il plaist à Dieu, toutes les particularitez de leur voyage, nous ne sçaurions pas auoir de leurs nouuelles deuant ce temps-là: si leur petit equipage est perdu ou volé, ils sont pour beaucoup endurer en ces contrée[s], si esloignées de tout secours.

Le quatrième, Monsieur du Plessis descendit des trois Riuieres comme ie [338] l'allay saluër, il me dit qu'il nous amenoit vn petit Sauuage orphelin, nous en faisant present, pour luy seruir de pere; si tost qu'on aura moyen de recueillir ces pauures enfans, on en pourra auoir quelque nombre, qui seruiront par apres à la conuersion de leurs Compatriottes. Il 228 nous dit encore qu'on trauailloit fort & ferme au lieu nommé les trois Riuieres, si bien que nos François ont maintenant trois habitations sur le grand fleuue de sainct Laurens, vne à Kebec fortifiée de nouueau, l'autre à quinze lieuës plus haut dans l'Isle de saincte Croix, où Monsieur de Champlain a faict bastir le fort de Richelieu. La troisiéme demeure se bastit aux trois Riuieres, quinze autres lieuës plus haut, c'est à dire a trente lieuës de Kebec. Incontinent apres le depart des vaisseaux, le Pere Iacques Buteux & moy irons là demeurer pour assister nos François, les nouuelles habitations estant ordinairement dangereuses, ie n'ay pas veu qu'il fut à propos d'y exposer le Pere Charles Lallemant, ny autres, le Pere Buteux y vient auec moy [339] pour estudier à la langue.

V. R. connoistra maintenant, que la crainte qu'ont eu quelques vns que l'estranger ne vint vne autre fois rauager le pays, & empescher la conuersion de ces pauures Barbares n'est pas bien fondée; puis que les familles s'habituent icy, puis qu'on y bastit des forts & des demeures en plusieurs endroits, & que Monseigneur le Cardinal fauorise cette entreprise honorable deuant Dieu, & deuant les hommes. Cet esprit capable d'animer quatre corps, à ce que i'apprend, void de bien loing, ie le confesse, mais i'ay quelque creance, qu'il n'attend point de nos Sauuages qui entendent la parole de Dieu, & les veritez du Ciel par son entremise, car c'est luy qui nous a honorez de ses cõmandements; nous renuoyant en ces contrées auec la bien-veillance de Messieurs les Associez: Ie croy, dis-je, qu'il n'attend point de cette vigne, qu'il arrouse de ses soings les fruicts qu'elle luy presentera en terre, & qu'il les goustera vn iour dedans 230 les Cieux. Pleust à Dieu qu'il veist cinq ou six cens Hurons, hommes [340] grands, forts, & bien faits, prester l'oreille aux bonnes nouuelles de l'Euangile qu'on leur va porter cette année: Ie me figure qu'il honoreroit par fois la nouuelle France d'vn de ses regards, & que cette veuë luy donneroit autant de contentement, que ces grandes actions dont il remplit l'Europe; car de procurer que le sang de Iesus-Christ soit appliqué aux ames pour lesquelles il est respandu, c'est vne gloire peu connuë des hommes, mais enuiée des grandes intelligences du Ciel & de la terre.

Il est temps de sonner la retraitte, les vaisseaux sont prests à partir, & cependant ie n'ay pas encore releu ny interponctué cette grãde Relation, qui peut suffir pour trois années: V. R. iugera par la necessité que i'ay eu d'emprunter la main d'autruy, pour luy escrire que ie n'ay pas tout le loisir que ie pourrois desirer. Ie ne sçay cõme cela se fait, que les nouuelles s'escriuent tousiours auec empressement, aussi n'y recherche-on pas tant de politesse que la verité & la naïfueté, mon cœur a plus parlé que mes lettres, & n'estoit la pensée que i'ay, [341] qu'en escriuant à vne personne, ie parle à plusieurs, il se respandroit bien dauantage.

Encore ce mot, puisque V. R. nous ayme si tendrement, & que ses soins nous viennent si puissamment secourir iusques au bout du mõde, dõnez nous, mon R. P. s'il vous plaist des personnes capables d'apprendre les langues, nous pensions nous y appliquer, cette année, le Pere Lallemant, le Pere Buteux & moy, cette nouuelle habitation nous separe. Qui sçait si le Pere Daniel est encore en vie? & si le Pere Dauost 232 arriuera auec les Hurons: car ses Sauuages ayans commencé à le derober, luy pourront bien iouër vn autre plus mauuais traict. Depuis la mort d'vn pauure miserable François massacré aux Hurons, on a découuert que ces Barbares auoiẽt fait noyer le R. P. Nicolas Recolect, tenu pour vn grand homme de bien; tout cecy nous fait voir qu'il est besoing de tenir icy le plus de Peres qu'on pourra; car si par exemple le Pere Brebœuf & moy venions à mourir, tout le peu que nous sçauons de la langue Huronne [342] & Montagnaise se perdroit, & ainsi ce seroit tousiours à recommencer & à retarder le fruict que l'on desire recueillir de cette Mission, Dieu suscitera des personnes qui auront compassion de tant d'ames, secourãs ceux qui les viennent chercher parmy tant de dangers; c'est en luy que nous remercions tous V. R. de son affection si cordiale, & de son assistance, la suppliant tres-humblement de se souuenir à l'Autel & à l'Oratoire de ses enfans, & de ses subjets, notamment de celuy qui en a plus de besoin; lequel se dira confidemment ce qu'il est de tout son cœur.

Mon R. PERE.

Vostre tres-humble & tres-obeïssant
seruiteur en N. S. Iesvs-Christ.

PAVL LE IEVNE.

De la petite Maison de
N. Dame des Anges,
en la Nouuelle
France, ce 7, d'Aoust
1634.

V. R. Nous permettera, s'il luy plaist, d'implorer prieres de tous nos Peres, & de tous nos freres de sa Prouince. Nostre grand secours doit venir du Ciel.

234

Table des Chapitres contenvs en cette Relation.

238

Lettre de Paul Lejeune, de la C^ie de Jésus, à Monseigneur le Cardinal.

MONSEIGNEUR,

Très humble salut en celuy qui est le salut de tous les hommes. Je ne scay pas si je deviens sauvage conversant tous les jours avec les sauvages, mais je scay bien que ce n'est pas tant la communication de leur barbarie que le respect que je dois à Votre Grandeur qui m'a empesché jusques icy de me donner l'honne[u]r de vous escrire. Or je crains que cette retenue ne me jette dans l'ingratitude veu mesme qu'il est bien difficile de demeurer tous les jours dans l'estonnement de vos grandes actions et de vos bienfaits sans que la langue rende quelque témoignage du sentiment de son cœur. Toute l'Europe, voire tout l'ancien monde, vous regarde avec admiration. L'Eglise vous chérit et vous honore comme l'un de ses plus grands princes toute ravie de joie de voir l'orgueil de ses enemis terrassés par vostre conduite. Toute la France vous doit sa guérison ayant dissipé le venin qui luy gagnoit le cœur. hélas! que de malheurs luy seroient arrivés depuis quelques années si ce poison fut demeuré en sa force au milieu de l'Etat. Les amis et les alliés de la plus noble couronne de l'univers n'ont pas assez de paroles pour recognoistre vos bienfaits et ses ennemis n'ont plus de cœur devant vous. Vous scavez donner la paix et la guerre comme vous possédez également la 240 bonté et la Justice. La terre est trop petite pour vos soins. Les mers recognoissent vostre puissance c'est vous qui alliez la N^elle France à l'ancienne et tous ces peuples qui ne cognoissent pas encore le vray Dieu commencent à cognoistre et admirer vostre authorité et jouir des doux fruits de vostre bienveillance. Je contemple tout cecy avec étonnement, mais je suis ravy quand je voy vostre esprit sans quitter le soin des grandes affaires prendre des pensées et des affections si douces et si fortes pour un petit nombre de personnes logées au bout du monde. Je parle des religieux de nostre compagnie que vous honorés d'une affection particulière en ces dernières contrées. Je ne scaurois lire sans admirer vostre bonté la recommandation que ie garde encore signée de vostre propre main par laquelle nous prenant soubs vostre protection vous commandiez à ceux qui suivant vos ordres venoient retirer le pays d'entre les mains des Anglois de nous traiter favorablement sur peine d'en repondre en leur propre personne. Il eut fallu avoir un cœur de bronze pour n'avoir point de sentiment à la veue de cette recommandation qui nous fut apportée en la N^elle France de vostre part et qui essuia une bonne partie de la tristesse que nous avions de voir ce païs en la déplorable estat depuis un si longtems que nos François le possédoient mais il va tous les jours changeant de face depuis que vous le daignés honorer de vos soins. Ces Messieurs de la N^velle Compagnie y ont plus faict de bien en un an que ceux qui les ont devancés en toute leur vie. Les familles commencent à s'y multiplier et nous pressent déjà d'ouvrir quelque escole pour instruire leurs enfans et que nous commencerons bientost Dieu aidant. 242 Je ne crains qu'un malheur que ces Messieurs qui font à n'en point mentir de très grandes dépenses comme il appert par les beaux équipages qu'ils mettent en mer ne perdent ou ne diminuent quelque chose de ce grand courage qu'ils font maintenant paroistre. Si par malheur leur traite de pelleteries ne leur succédoit pas tousjours, Monseigneur, vous êtes tout puissant en ce point comme en plusieurs autres un seul regard de vos yeux les peut protéger et animer et secourir encore toutes ces contrées d'ou la France peut tirer un jour de grands avantages. On scait assez par l'expérience et par la lecture des historiens et des géographes qu'il sort tous les ans très grand nombre de personnes de la France se jettant qui de çà qui de là chez l'estranger pour n'avoir de quoy s'employer dans leur pays. Je me suis laissé dire et ne l'ay pas entendu qu'avec un grand regret qu'une bonne partie des artisans qui sont en Espagne sont François. Quoy donc faut-il que nous donnions des hommes à nos ennemis pour nous faire la guerre et nous avons icy tant de terres si belles si bonnes où l'on peut jeter des colonies qui seront fidèles à sa Majesté et à Vostre Grandeur. Le fils d'un artisan françois nay en Espagne est Espagnol, naissant en la N^elle France il sera François. Tout gist à emploier forces hommes à déserter et desfricher les bois pour distribuer la terre aux familles qu'on fait et qu'on fera passer. Messieurs de la Compagnie font merveille en ce point mais les frais sont si excessifs que je ne douterois quasi de leur persévérance s'ils n'estoient appuyés de Votre Grandeur. Monseigneur vous estes le cœur et l'âme de cette compagnie et de toute la N^elle France vous pouvez non seullement donner la vie du corps à une infinité de pauvres artisans françois 244 qui la vont mendier chez l'étranger faute de terre, mais vous pouvez encore donner la vie de l'âme à une infinité de peuples barbares qui meurent tous les jours dans l'esclavage de Satan, faute de prédicateurs de l'Evangile. Si vostre Grandeur nous continue sa faveur et ces Messieurs leur bienveillance j'espère qu'aussytost que nous saurons la langue que vous verrez et gouterés les fruits d'une nouvelle Eglise d'auttant plus doux et savoureux que ces pauvres barbares sont maintenant dans un Estat pitoiable. Nous avons desjà dans nos premiers begaimens envoié quelques âmes au ciel lavées dans le sang de l'agneau. Ce sont des fruits d'une vigne que vous plantez, Monseigneur, et que vous arrousez de vos faveurs. Aussi est-il bien raisonable que cette nouvelle Eglise prenne ses commencemens et ses progrès soubs l'authorité et soubs l'assistance d'un Prince de l'Eglise, mais je m'égare dans la longueur de mes discours ne me souvenant pas que parlant aux Grands il faut plustot tenir du Laconien que de l'Athénien. Je ne tiens ni de l'un ni de l'autre, je relesve de vostre douceur et de vostre bonté qui me donne et faict accès auprès de Sa Grandeur et qui me permettera s'il luy plaist de porter en ce nouveau monde le tiltre et la qualité

Monseigneur

De Vostre très humble
très obéissant et très
obligé serviteur en
nostre Seigneur.
Paul Lejeune, de la
Compagnie de Jésus.

A Kebek en la N'^elle France, le 1^er Jour d'Aoust 1635.

RELATION
DE CE QVI SEST PASSÉ
EN LA
NOVVELLE FRANCE
EN L'ANNÉE 1635.

Enuoyée au
R. PERE PROVINCIAL
de la Compagnie de Iesvs
en la Prouince de France.

Par le P. Paul le Ieune de la mesme Compagnie,
Superieur de la residence de Kebec.

A PARIS.

Chez Sebastien Cramoisy, Imprimeur
ordinaire du Roy, ruë sainct Iacques,
aux Cicognes,

M. DC. XXXVI.

AVEC PRIVILEGE DV ROI.

252

[iii] Table des Chapitres contenus en ce liure.

254

[1] Relation de ce qui s'est passé en la Novvelle France, en l'année 1635.

MON R. Pere,

Dieu soit beny pour vn iamais. C'est à ce coup que la Nouuelle Frãce se va ressentir des benedictions de l'ancienne, & que l'équité triomphant de l'iniustice, fera que ces contrées cesseront d'estre ce qu'elles ont esté depuis tant de siecles; vne forest sans limites; la demeure de la [2] barbarie; le pays de l'infidelité. Nous commençons à voir l'ouuerture de quelques campagnes, par les défrichements qu'on fait en diuers endroits; Les familles qui passent chaque année, changent la barbarie des Sauuages en la courtoisie naturelle aux François; & le petit aduancement que nous faisons par nos begayements, nous fait coniecturer que la foy bannira l'infidelité de son Empire. Bref, i'espere qu'on verra vn iour ces paroles accomplies dans nos grands deserts, Multi filij desertæ, magis quàm eius quæ habet virum. Il est bien conuenable que sous le Regne d'vn Roy si sainct, la vertu entre dans l'vne des grandes Seigneuries de sa Couronne: Que sous la faueur & la conduite d'vn Prince de l'Eglise, on voye naistre vne nouuelle Eglise, quæ extendet palmites suos vsque ad mare, & vsque ad flumen [3] propagines eius; qui étendra ses pampres iusques à la mer, & prouignera ses seps du long des riues du premier de tous les fleuues. Mille raisons nous donnent ces pensées, & nous font entrer dans ces attentes. Cette entreprise est appuyée 256 de personnes de merite & de condition, dont la vertu regardée des yeux de toute la France, reçoit vne approbation generale, & vn applaudissement mesme de la bouche de nostre grand Roy. Le rebut qu'on a fait de ceux, qui ayans succé le bien qu'on peut recueillir en ces contrées, les ont laissées sans peuplades & sans culture, n'ayans pas en tant d'années qu'ils en ont iouy, fait défricher vn seul arpent de terre: Les grãdes dépenses que font Messieurs de la Compagnie de la Nouuelle France, soit sur le pays, soit en leurs équipages; l'affection que nous [4] voyons en plusieurs personnes de fauoriser ce dessein, les vns de leurs moyens, les autres par leurs propres trauaux, nous font conclure que Dieu conduit cét affaire.

Ie ne diray rien du zele de ceux, dont l'ardeur nous échaufe & confond tout ensemble, dont les secours nous réiouyssent & nous renforcent. Ie ne parleray non plus des desirs brulans d'vn tres-grand nombre de nos Peres, qui trouuent l'air de la Nouuelle France vn air du Ciel, puis qu'on y peut souffrir pour le Ciel, & qu'on y peut ayder les ames à trouuer le Ciel. Ie passe sous silence quantité d'autres Religieux, qui ont les mesmes sentiments, & les mesmes volontez. Mais ce qui m'étonne, c'est qu'vn grand nombre de filles Religieuses, consacrées à nostre Seigneur, veulent estre de la partie; surmontant la crainte naturelle [5] à leur sexe, pour venir secourir les pauures filles, & les pauures femmes des Sauuages. Il y en a tant qui nous écriuent, & de tant de Monasteres, & de diuers Ordres tres-reformez en l'Eglise; que vous diriez que c'est à qui se mocquera la premiere des difficultez de la Mer, des mutineries de l'Ocean, & de la barbarie de ces contrées. On me mande que la 258 Superieure d'vne Maison tres-reglée, sollicitée de donner de ses Filles pour fonder vn Conuent de son Ordre en quelque ville de France, a respondu qu'elle n'auoit point de Filles, sinon pour la Nouuelle France, & pour l'Angleterre, au cas que Dieu y fist rentrer la foy Catholique. Vne autre non moins zelée, m'ayant déduit les grandes deuotions qu'on fait en sa Maison, pour l'heureuse conuersion de ces Peuples, dit que la Relation [6] de l'an passé, capable d'étonner vn courage assez fort, non seulement n'a point ébranlé le cœur de ses Filles, ains au contraire les a tellement animées, que treize d'entre elles ont signé de leur propre main vn vœu, qu'elles ont fait à Dieu de passer en la Nouuelle France, pour y exercer les fonctions de leur Institut, s'il plaist à leurs Superieurs de leur permettre. I'ay receu, veu, & leu ce vœu auec étonnement. I'en sçay vne autre, qui apres auoir étably plusieurs Monasteres de son Ordre en France, tiendroit à vne grande faueur de Dieu, si elle venoit finir ses iours dans vne petite maisonnette, dediée au seruice des petites Sauuages, qui vont errantes parmy ces grands bois. A tout cela ie ne dis rien autre chose, sinon que Digitus Dei est hîc, que la main de Dieu conduit cette entreprise.

[7] Mais il faut que ie donne cét aduis en passant à toutes ces bonnes Filles, qu'elles se donnent bien de garde de presser leur depart, qu'elles n'ayent icy vne bonne Maison, bien bastie, & bien rentée, autrement elles seroient à charge à nos Francois, & feroient peu de choses pour ces Peuples. Les hommes se tirent bien mieux des difficultez: mais pour des Religieuses, il leur faut vne bonne Maison, quelques terres défrichées, & vn bon reuenu pour se põuuoir nourrir; & 260 soulager la pauureté des femmes & des filles Sauuages.

Helas mon Dieu! si les excés, si les superfluitez de quelquez Dames de France s'employoient à cét œuure si sainct; quelle grande benediction feroient-elles fondre sur leur famille? Quelle gloire en la face des Anges, d'auoir recueilly le sang du [8] Fils de Dieu, pour l'appliquer à ces pauures infidelles? Se peut-il faire que les biens de la terre nous touchent de plus prés que la propre vie? Voila des Vierges tendres & delicates, toutes prestes à ietter leur vie au hazard sur les ondes de l'Ocean; de venir chercher de petites ames dans les rigueurs d'vn air bien plus froid que l'air de la France; de subir des trauaux qui étonnent des hommes mesmes, & on ne trouuera point quelque braue Dame qui donne vn Passeport à ces Amazones du grand Dieu, leur dotant vne Maison, pour loüer & seruir sa diuine Majesté en cét autre monde? Ie ne sçaurois me persuader que nostre Seigneur n'en dispose quelqu'vne pour ce sujet.

Mais changeons de discours, & déduisons briéuement le peu que i'ay à dire pour cette année. Ie diuiseray [9] cette Relation en quatre Chapitres seulement.

262

CHAPITRE I.

DE L'ESTAT, & DE L'EMPLOY DE NOSTRE COMPAGNIE EN LA NOUUELLE FRANCE.

NOVS auons six Residences en la Nouuelle France. La premiere, commençant par les premieres terres qu'on rencontre venant en ces pays, se nomme la Residence de Saincte Anne; elle est au Cap Breton. La seconde la Residence de Sainct Charles, à Miskou. La troisiéme, que nous allons habiter cette Automne, la Residence de Nostredame de Recouurance, à Kebec, proche du Fort. La quatriéme, la Residence de Nostredame des Anges, à vne demie lieuë de Kebec. La cinquiéme, la Residence de la Conception, aux trois Riuieres. La sixiéme, la Residence de Sainct Ioseph, [10] à Ihonatiria, aux Hurons; i'espere que nous en aurons bien-tost vne septiéme au mesme pays, mais dans vne Bourgade differente d'Ihonatiria. Or comme les Vaisseaux qui vont au Cap Breton & à Miskou, ne montent point iusques à Kebec, de là vient que nous n'auons aucune communication auec nos Peres qui sont és Residences de Saincte Anne, & de Sainct Charles, si ce n'est par la voye de France: & par consequent il ne faut point nous adresser ny lettres, ny autres choses pour leur faire tenir, ains les donner aux Vaisseaux qui vont en ces habitations de nos François. Il s'ensuit encor que ie ne puis rien dire des choses qui se passent en ces Residences, pour la distance des lieux, & le peu de 264 commerce que nous auons auec elles. Toutes ces Residences sont entretenuës par Messieurs de la Compagnie [11] de la Nouuelle France, qui font dresser des Forteresses, & des demeures pour nos François en diuers endroits de ces contrées, excepté la Residence de Nostredame des Anges, appuyée principalement sur les liberalitez de Monsieur le Marquis de Gamache. Cette Residence a trois grands desseins pour la gloire de nostre Seigneur; Le premier, de dresser vn College pour instruire les enfans des familles qui se vont tous les iours multipliant. Le second, d'établir vn Seminaire de petits Sauuages, pour les éleuer en la foy Chrestienne. Le troisiéme, de secourir puissamment la Mission de nos Peres aux Hurons, & autres Peuples sedentaires. Pour le College, bien qu'il ne soit pas encor erigé, si est-ce que nous commencerons dés cette année à enseigner quelques enfans. Toutes choses ont leur commencement, [12] les plus doctes n'ont sceu autrefois que les premiers elements de l'Alphabet.

Quant au Seminaire, nous le faisons bastir: il sera pour vn temps en la Residence de Nostredame des Anges: mais s'il se trouue quelque personne de pieté qui le veüille fonder, & nourrir de pauures petits barbares, pour les rendre enfans de Iesus Christ, il le faudra transporter plus haut; & là les Sauuages ne seront point de difficulté d'amener leurs enfans. I'en enuoye vn petit à V.R. laquelle s'il luy plaist nous le renuoyera dans vne couple d'années; il seruira à arrester & instruire ses petits compatriotes; celuy que i'auois enuoyé, & qu'on nous a ramené, nous contente fort. Les Sauuages commencent à ouurir les yeux, & à connoistre que les enfans sont bien instruits auec nous.

266 [13] Reste pour la Mission des Hurons & d'autres Peuples stables, elle est de tres-grande importance pour le seruice de nostre Seigneur; Messieurs de la Compagnie la cherissent & la soulagent: C'est de ces Peuples que nous attendons de plus grandes conuersions; c'est là où il faudra enuoyer grand nombre d'ouuriers, si la foy commence à éclairer ces ames plongées dans les tenebres depuis tant de mille ans. Que si on ne peut trouuer quelque fondation pour l'entretenir, ie quitterois quasi volontiers, & le soin d'vn College & d'vn Seminaire, pour la faire reüssir. Mais des personnes qui ayment mieux que leurs noms soient écrits au Liure de vie que sur ce papier, nous defendent bien fort de rien quitter de nos desseins, nous asseurant d'vne verité bien certaine, que Dieu a plus de force, & plus de volonté [14] de nous secourir, que nous n'auons de cœur d'entreprendre pour sa gloire.

Or pour ne m'éloigner de nos Residences, nous exerçons en icelles toutes les fonctions de Curé ou de Pasteur, n'y en ayant point d'autres que nous; nous annonçons la parole de Dieu; nous administrons les Sacrements de Baptesme, de l'Autel, & de Penitence, de l'Extréme-Onction; nous assistons au Sacrement de Mariage; nous enterrons & enseuelissons par fois les morts; nous allons visiter les malades; nous enseignons la Doctrine Chrestienne aux enfans, & comme ils se vont multipliant par la venuë des familles, nous leur donnerons bien-tost la premiere teinture des lettres, comme i'ay dit. Que si les commencemens sont petits, la fin en peut estre grande & bien-heureuse.

[15] Outre cela vne partie de nous estudie fort & ferme à la langue, occupation qui sera vn iour d'autant 268 plus vtile, qu'elle est maintenant épineuse: Nous visitons encor les Sauuages, & par nos begayements nous tâchons de ietter dans leurs ames quelque petit grain de la semence Euangelique, qui fructifiera en son temps s'il plaist à Dieu. Voila nos exercices plus ordinaires, outre les obseruances de la Religion, qui ne se doiuent iamais obmettre. Pour nos François ils s'occupent à se fortifier, à bastir, à défricher, à cultiuer la terre: mais ie ne pretends pas d'écrire tout ce qui se fait en ce pays, ains seulement ce qui tend au bien de la foy, & de la Religion. Cét hyuer passé, la maladie de terre ou de scurbut, s'estant iettée dans la nouuelle habitation des trois Riuieres, où le Pere Buteux [16] & moy estions allez, nous a donné nouuelle occupation meflée de ioye & de tristesse. Nous estions marris d'vn costé, de voir souffrir quasi tous nos pauures François, & d'en voir mourir quelques vns: de l'autre nous nous réiouyssions de voir des effects tout à fait admirables de la grace de nostre Seigneur dedans leurs ames; bon nombre des malades n'ont iamais voulu demander la santé à Dieu, disans ces paroles auec vne grande resignation; Il est nostre Pere, il sçait mieux ce qui nous est bon que non pas nous, laissons le faire, sa saincte volonté soit faite. Ie croy qu'il n'y en a qu'vn seul de ceux qui sont passez en l'autre vie, qui n'aye fait vne confession generale deuant sa mort. Comme i'auois grand desir que l'vn d'eux, pour estre vn ieune homme de fort bonnes mœurs, retournast [17] en santé, ie luy conseillay de faire vn vœu au glorieux Patriarche S. Ioseph, pour impetrer la deliurance de son mal, Ie vous obeyray, me fist-il, mais si vous me laissez en ma liberté, ie prieray seulement le bon S. Ioseph, de m'obtenir de 270 nostre Seigneur la grace d'accomplir sa tres-saincte volonté. Vne autrefois vn ieune garçon fort & robuste se pourmenant dans la chambre des malades, leur demánda ce qu'ils voudroient bien donner pour iouyr d'vne aussi forte santé que la sienne; l'vn d'eux repartit fort sainctement, Ie ne voudrois pas détourner la teste d'vn costé pour iouyr de toute la santé du monde, si bien pour acquiescer au bon plaisir de Dieu. Cette repartie fit veoir combien la grace operoit fortement dans ceste ame. Vn autre qui auoit esté heretique, & d'vne vie assez libertine, estonna [18] tous ses compagnons à la mort: car apres auoir rendu des preuues de sa croyance, apres s'estre reconcilié auec vne grande douleur de ses offenses, comme ie luy presentois le saint Viatique, Ie croy en vous mon Sauueur, disoit-il, ouy ie croy en vous, venez, faites moy misericorde, vous estes assez puissant pour me pardonner tous mes pechez: & se sentant affoiblir il nous pressa sur l'heure mesme de luy donner l'Extreme-Onction, ce que nous fismes; l'ayant receuë auec beaucoup de sentimens de douleur, il apostrophe tous ses Camarades, & leur dit, Adieu mes Camarades, Adieu mes compagnõs, il faut partir, ie vous demande pardon, ie vous crie mercy à tous, ie suis bien marry d'auoir si mal vescu; mais i'espere que Dieu me fera misericorde, mon Dieu ayez pitié de moy. Proferant ces paroles il expira. [19] Qu'on mette la maladie tant qu'on voudra au rang des mal heurs de ceste vie, ie tiens celle qui a emporté ces ieunes gens, pour l'vne des plus signalées faueurs, qu'ils ayent iamais receu de la main de Dieu. Pour conclusion la santé est maintenant par toutes nos habitations, mais non pas encore la saincteté.

272 Ie crains fort que le vice ne se glisse dans ces nouuelles peuplades, si neantmoins ceux qui tiendront les resnes du gouuernement en main, sont zelez pour la gloire de nostre bon Dieu, suiuant les desirs & les intentions de Messieurs les Directeurs & Associez de la Compagnie, il se dressera icy vne Hierusalem benite de Dieu, composée de Citoyens destinez pour le Ciel. Il est bien aisé dans vn pays nouueau, où les familles arriuent toutes disposées à receuoir les loix qu'on y establira, de [20] bannir les méchantes coustumes de quelques endroi[t]s de l'ancienne France, & d'en introduire de meilleures. Ces Messieurs qui s'interessent dauantage dans la cause de Dieu, & dans la vertu que dans le commerce, n'ont point de vaisseaux pour passer icy les yurongneries, les ieux & les dissolutions du Carneual, non plus que les saletez, & les blasphemes: la Nouuelle France ne veut point de ces habitans de Cedar, & de Babylone, qui ne laisseront pas de s'y glisser, si ceux qui peuuent tout ne leur font teste; les dissimulations en cet endroit, & en ces commencemens, sont fort dangereuses, & Dieu demandera compte des obmissions aussi bien que des fautes commises.

274

[21] CHAPITRE II.

DE LA CONUERSION & DE LA MORT DE QUELQUES SAUUAGES.

VINGT-DEVX sauuages ont esté baptisez ceste année, si nous auions la cognoissance des langues, ie croy que la foy prendroit de grands accroissemens: nous n'osons encor confier le baptesme qu'à ceux que nous voyons en danger de mort, ou à des enfans qui nous sont asseurez: Car ne pouuant encore plainement instruire ces Barbares, ils mépriseroîent bien-tost nos saincts Mysteres, s'ils n'en auoient qu'vne legere cognoissance. Il est bien vray que si ce peuple estoit curieux de sçauoir, comme sont toutes les nations policées, que quelques-vns [22] d'entre nous ont vne assez grande cognoissance de leur lãgue, pour les instruire: mais comme ils sont profession de viure, & non pas de sçauoir; leur plus grand soucy est de boire & de manger, & non pas de cognoistre. Quand vous leur parlez de nos veritez, ils vous écoutent paisiblement; mais au lieu de vous interroguer sur ce sujet, ils se iettent incontinent sur les moyens de trouuer dequoy viure, monstrans leur estomach tousiours vuide, & tousiours affamé. Que si on sçauoit haranguer comme eux, & qu'on se trouuast en leurs assemblées, ie croy qu'on y seroit bien puissant, la bonté de Dieu sera tout reussir en son temps: venons à nos Neophytes. Le 16. d'Aoust de l'année passée 1634. vn peu apres le depart des vaisseaux, ie baptisay 276 à la mort vn ieune garçon aagé d'enuiron 12. ou 14. ans, les [23] Saunages le nommoient Akhikouch, nous luy auions destiné le nom de Dieudonné. Monsieur du Plessis Bochard General de la flotte l'auoit amené des trois Riuieres tout malade, & nous l'auoit donné pour luy sauuer si on pouuoit la vie du corps, & luy donner celle de l'ame: il n'a vescu chez nous que le temps necessaire pour estre sommairement instruit.

Le 3. de Nouembre de la mesme année, le Pere Charles l'Allemant baptisa vn ieune Sauuage aagé d'enuirõ vingt cinq ans, nommé de ceux de sa nation Matchonon, surnommé des François Martin, il receut le nom de Ioseph en son baptesme. Les iugemens de Dieu sont épouuantables, ce pauure miserable a fait vne mort horrible. C'est celuy dont ie parle au Chapitre deuxiesme de la Relation de l'an passé, lequel eust volontiers [24] diuerty s'il eust peu le bon François Sasousmat de receuoir la Foy, & qui disputant certain iour contre le Pere Brebeuf, profera ce blaspheme, qui luy a fait perdre la vie du corps, & peut-estre de l'ame. Tu nous conte, que c'est par la conduite de ton Dieu, que nous trouuons dequoy manger, dis luy qu'il m'empesche tant qu'il pourra de prendre des Castors, & des Elans, & tu verras que ie ne laisseray pas d'en prẽdre malgré luy. Vn de nos François saisy d'vn grand zele, entendant ceste impieté, fut tout prest de se ietter sur luy, & l'auroit bien battu n'eust esté la presence du Pere. Ce pauure impie n'a onques depuis ce blaspheme, tué ny Castor ny Elan. Il s'en alla au dessus des trois Riuieres, où la maladie le terrassa. Le Pere Brebeuf montant aux Hurons l'an passé le rencontra, & le 278 voyant dans [25] vn estat pitoyable luy demanda combien il auoit tué d'animaux depuis son blaspheme; le pauure homme demeura tout confus: le Pere en eut compassion, & luy dit qu'il m'écriroit ce rencontre, & qu'il se promettoit bien qu'on le secoureroit s'il vouloit demander à Dieu pardon, & receuoir sa creance; quelque temps apres que i'eu receu la lettre du Pere, nous nous en allasmes le Pere Buteux & moy en la nouuelle habitation des trois Riuieres, pour commencer la Residence de la Conception: nous trouuasmes ce blasphemateur nud comme vn ver, tout malade, couché sur la terre, n'ayant pour toutes richesses qu'vne méchante écorce, vne cabane de Sauuages qui estoient là luy refusant le couuert. Son frere l'auoit amené proche de l'habitation de nos François, & l'auoit quitté là, [26] nous luy demandasmes s'il ne recognoissoit pas la vengeance de Dieu, n'ayant peu rien prendre depuis son impieté, Ie n'ay garde, fit-il, d'auoir peû rien prendre, car i'ay tousiours esté malade. Mais ne vois tu pas que c'est Dieu qui t'a chastié par ceste maladie? Peut-estre que tu dis vray, me respond-il. Ie luy voulu dire que son frere n'auoit point de compassion de luy, il l'excusa bien à propos. Que veux tu qu'il face, comment me traisnera-il dans ce bois, où il va chercher sa vie? Mais encor si ta nation auoit pitié de toy? Que ne dis-tu à ces Sauuages qu'ils te reçoiuent en leur cabane, ou bien qu'ils te donnent vn peu d'écorce pour en faire vne petite? Il n'osa iamais leur parler tant ils sont honteux de s'importuner les vns les autres: mais il me dit tout bas que ie leur demandasse: ie le fis tout sur l'heure en sa presence: au [27] commencement ils ne me donnerent aucune response, en fin vne femme me dit, 280 qu'ils s'en alloient biẽ tost cabaner en vn autre endroit, & qu'ils n'auoient point trop d'escorce pour eux. Bref ce mal-heureux voyant que la barque qui nous auoit amené retournoit à Kebec, me pria de luy faire porter. Car nous ne le pouuiõs pas loger, nostre maison en ce premier commencement n'estoit que quelques busches de bois iointes les vnes auprés les autres, enduites par les ouuertures d'vn peu de terre, & couuertes d'herbes, nous auions en tout douze pieds en carré pour la Chapelle, & pour nostre demeure, attendant qu'vn bastiment de charpente qu'on dressoit fust acheué. Voyant donc qu'il estoit impossible de le secourir, ie prie qu'on le reçoiue dans la barque, ce qui fut fait; on l'apporte à Kebec, où les [28] Sauuages le delaisserẽt. Le Pere l'Allemant le voyant abandonné le fait venir en nostre maison, ce qu'il souhaitoit grandement; Tous les iours vn de nos Freres le pansoit, & le Pere l'instruisoit pour le rendre capable du baptesme. Or comme on le iugeoit en danger de mort le Pere le baptisa, & l'a fait nourrir & panser tout l'hyuer. Retournant sur le Printemps des trois Riuieres, ie fus bien aise de le voir, esperant qu'il m'instruiroit en la cognoissance de sa langue, & que ie luy enseignerois plus à loisir les veritez de nostre creance. A peine estois-je arriué que son frere suruint, luy bien ioyeux de voir me demande permission de s'en aller auec luy aux trois Riuieres, ie l'en détournay le plus qu'il me fut possible, preuoyant bien sa ruine s'il retournoit parmy les Sauuages: ie luy promets toute [29] assistance s'il vouloit demeurer: Non, me fit-il, ie desire d'aller voir la haut mes parens. Or comme ie cognois bien le genie de ces Barbares, ie luy dis que les Sauuages le ietteroient bientost 282 hors de leurs cabanes, qu'ils ne luy donneroient gueres à manger, & en fin se lassans de luy, qu'ils le tueroient. Il se mit à rire, me disant qu'ils n'en viendroient pas là. Ie le menace que s'il s'en va, que nous ne le receurons plus iamais; il n'y eut pas moyen de l'arrester. Estant aux trois Riuieres, le Pere Buteux qui estoit là, luy voulut faire recognoistre le mal qu'il luy pouuoit arriuer de nous auoir quitté; il s'en mocqua; il le menaça des iugemens de Dieu, il repartit qu'il endureroit aussi bien les feux dans l'enfer, qu'il auoit souffert le froid pendant l'hyuer. Au commencement les Sauuages le tenoient [30] dans leurs cabanes, mais venans à s'en lasser ils le placẽt dehors, le voila abbrié du Ciel & d'vne escorce, on ne luy donne plus qu'vn peu de poisson, & peu souuent: luy se doutãt quasi de ce que ie luy auois predit; car il n'ignore pas les coustumes de sa nation, dit au Pere Buteux qui s'en reuenoit faire vn tour à Kebec, Ton frere m'a dit que si ie sortois de vostre maison, qu'il ne m'y receuroit iamais, i'y voudrois bien estre maintenant, dis-luy, que s'il m'y veut receuoir, qu'il en écriue à quelque François, & que ie m'y feray transporter à la premiere occasion. Le Pere estãt arriué, & m'ayant donné cet aduis, nous-nous transportasmes incontinent au fort de Kebec pour chercher quelque occasion de le mander, desirans sauuer ce pauure miserable, puis qu'il portoit le charactere de Chrestien: mais [31] ô iuste & épouuantable vengeance du grand Dieu! nous trouuasmes en chemin vn Montagnais, qui nous dit qu'incontinent apres le depart du Pere Buteux, vn Sauuage auoit donné vn coup de hache à ce deplorable homme pẽdant la nuict, qui luy auoit fait voler la ceruelle de 284 la teste. Voila comme il est passé en l'autre monde.

Le huictiéme du mesme mois de Nouembre Monsieur Giffart baptisa vn petit enfant sauuage aagé d'enuiron six mois, le croyant si prés de la mort qu'on n'auroit peu nous appeller, il surueseut encor quelque temps, sa femme allaictoit ce pauure petit, & en auoit vn soin comme s'il eust esté son propre enfant. Certaine nuict s'éueillant toute pleine d'étonnement & de ioye, elle dit à son mary, qu'elle croyoit que ce petit Ange estoit passé au [32] Ciel: Non, repart-il, ie le viens tout maintenant de veoir, il vit encore. Ie vous supplie, replique-elle d'y regarder encore vne fois, ie ne puis croire qu'il ne soit mort, d'autant que ie viens de voir tout maintenant dans mon sommeil vne grande troupe d'Anges qui le venoient querir. Ils le visitent donc, & le trouuent trépassé, bien ioyeux d'auoir aydé à mettre au Ciel vne ame qui benira Dieu dans toute l'estendue de l'eternité. Le sixiéme iour de Ianuier de cette année mil six cens trente cinq, le Pere Lallemant laua des eaux du sainct Baptesme vne petite fille aagée d'enuiron neuf à dix ans, qu'vne famille Françoise éleue en sa maison: cette enfant ayant fait prier le Pere de luy donner l'entrée en l'Eglise, l'examina sur sa croyance, & la voyant suffisamment instruite, cognoissant d'ailleurs qu'elle [33] n'auoit aucuns parens qui la peussent retirer des mains de nos François, il en fit vn present au petit Iesus le iour des Roys: elle a touiours continué depuis à bien faire, fuyant tellement les Sauuages, qu'on ne luy sçauroit faire parler.

Le deuxiesme iour de Feurier la petite Sauuage qu'on porta en France l'an passé, fut baptisée au Monastere des filles de la Misericorde, c'est à dire, en 286 l'Hospital de Dieppe: puis qu'elle estoit née en la Nouuelle France, ie luy donneray place entre ceux de sa patrie, qui ont esté faits enfans de Dieu ceste année. On l'auoit mise en pension chez ces bonnes filles. Voicy ce que m'en écrit leur Mere Superieure, aussi zelée & toute sa maison, pour le salut des pauures Sauuages, que pas vne autre. Nostre petite Canadienne deceda le iour de la Purification [34] de nostre Dame, de la petite verole qu'on ne pût faire sortir, quoy qu'on y apportast tous les remedes possibles: elle receut le baptesme demie heure auant sa mort, c'est quasi vn miracle que nous ne fusmes point surprises, à raison que comme elle estoit robuste pour son aage, elle ne paroissoit point si voisine de la mort comme elle estoit ses funerailles furent honorées de belles ceremonies, & de chants d'allegresse au lieu de l'Office des morts, puis que son decés auoit suiuy de si prés son baptesme. Ceste enfant se faisoit aimer d'vn chacun, elle estoit fort officieuse, tres-obeyssante, aussi exacte à ne point entrer aux lieux defendus qu'vne Religieuse; & quand on luy vouloit faire entrer, soit par mégarde, ou pour faire preuue de son obeyssance, elle respondoit fort gentilement, Ie n'ay point permission, [35] la Mere Superieure ne le veut pas. Elle sçauoit desia plusieurs leçons de son Catechisme, & entendoit beaucoup de la lãgue Françoise; c'est pourquoy nous luy auions fait conceuoir les trois Articles principaux de nostre creance. Elle sçauoit fort bien dire que le Manitou ne valoit rien, qu'elle ne vouloit plus retourner en Canada; mais qu'elle vouloit estre Chrestienne & baptisée, sçachant bien qu'on ne pouuoit aller au Ciel sans cela. Nous prenions toutes grand plaisir en ces discours: pour trancher 288 court, suffit de dire qu'elle taschoit d'imiter tout le bien qu'elle voyoit faire selon sa capacité. Ce sont les propres termes de la Reuerende Mere Elizabeth de sainct François Superieure de cét Hospital, l'vn des mieux reglez de l'Europe; il ne faut qu'entrer dans la sale des pauures, contempler [36] la modestie des filles qui les seruent, considerer leur charité dans les plus fascheuses maladies, ietter les yeux sur la netteté de ceste maison, pour en sortir tout affectionné, & donner mille loüanges à nostre Seigneur. Si vn Monastere semblable à celuy-là, estoit en la Nouuelle France, leur charité feroit plus pour la conuersion des Sauuages, que toutes nos courses & nos paroles.

Le dix-huictiesme du mesme mois de Feurier, le Pere Buteux & moy receumes au nombre ches Chrestiens, vne bonne femme Sauuage, qui fut solemnellement baptisée en nostre Chapelle de la Conception aux trois Riuieres. Elle s'appelloit Ouetata Samakheou, & nous luy donnasmes le nom d'Anne. Les Sauuages s'en allans l'auoient delaissée auprés de nostre Habitation toute malade, & couchée sur la terre dure, [37] d'autres estans suruenus, nous la fismes entrer dans leur Cabane; ceux-cy décampans apres quelque seiour, nous la logeasmes encore dans vne autre qui resta seule: mais ceste Cabane s'en voulant aller apres les autres, nous priasmes les Sauuages de laisser quelques rouleaux de leur escorce pour faire vn méchant todis à ceste pauure creature; ils font la sourde oreille. Or comme nous ne pouuuions point faire entrer ceste femme dans le fort, où il n'y auoit que des hommes, & que d'ailleurs nous ne la voulions pas voir mourir deuant nos yeux par la rigueur du froid, n'ayans pas 290 dequoy luy faire vne maison, nous priasmes nos François d'intimider ces Barbares, si cruels enuers leur nation; les voyla aussi-tost le pistolet au poing, qui se saisissent par force de quelques escorces; leur disant que ceste [38] femme mourroit ou gueriroit bien-tost, & qu'ils reprendroient ce qu'ils luy auroient presté; cela les fascha fort, mais neantmoins comme ceste violence estoit raisonnable, l'vn d'eux pour expier leur cruauté, retourna du bois où ils s'estoient allez cabanner, & luy dressa luy mesme vne petite cabanne, où tous les iours nous luy portions à manger, & en suitte nous l'instruisions. Cõiecturez, s'il vous plaist, la grande necessité qu'il y a icy d'vn Hospital, & quel fruit il pourroit produire. Trois choses me consolerẽt fort, en luy déduisant les Articles de nostre creance. La 1. fut que luy voulant faire exercer quelque acte de douleur de ses pechez pour la disposer au baptesme; ie luy rapportay le nom de plusieurs offenses, la menaçant du feu d'enfer, si ayant commis ces crimes, elle n'estoit lauée des eaux Sacramentales; [39] ceste pauure malade épouuantée, commence à nommer tout haut ses offenses, disant, Ie n'ay point commis ces pechez que tu dis: mais bien ceux-là, s'accusant de plusieurs choses bien vergongneuses. Ie luy dis qu'il suffisoit d'en demander pardon en son cœur sans les nommer, la Confession n'estant point necessaire qu'apres le Baptesme; elle ne laissa pas de poursuiure, & d'en crier mercy à celuy qui a tout fait. En second lieu, luy parlant vn iour de la mort apres son baptesme, elle se mit à pleurer, se faschant contre moy de ce que ie luy parlois d'vne chose si horrible; cela m'estonna vn petit, i'estois quasi fasché de l'auoir baptisée, nous la recommandasmes à nostre Seigneur, 292 qui luy toucha le cœur: car l'estant retourné voir, elle me fit plusieurs interrogations: Mon ame, disoit-elle, [40] aura-elle de l'esprit quand elle sera sortie de mon corps? verra-elle? parlera-elle? ie l'asseuray qu'en effet elle ne perdroit rien de ces facultez, qu'au contraire elle les auroit d'vne façon bien plus parfaite, & que si elle croyoit en Iesus-Christ sans feintise, qu'elle cognoistroit des merueilles, & iouyroit de tres-grands contentemens. Tu m'as dit que ie resusciteray quelque iour, seray-ie semblable, me dit-elle, à moy-mesme, à celle que ie suis maintenant, ou bien à vne autre? C'est toy-mesme, c'est ton propre corps qui reprendra vie, & qui sera beau comme le iour, si tu as eu la Foy; sinon il sera horrible, & tout difforme, & destiné aux flammes eternelles. Que mangera mon ame apres ma mort? Ton ame n'est point corporelle, elle n'a point besoin des viandes d'icy bas, elle se repaistra [41] de plaisirs qu'on ne peut conceuoir. Que verray-ie si ie vay au Ciel? Tu verras ce qui se fait ça bas, la bestise de ceux de ta nation qui ne veulent pas receuoir la Foy, la beauté & la grandeur de celuy qui a tout fait, tu le prieras pour moy. Que luy diray-ie, me repart-elle? Dis luy qu'il me face misericorde, qu'il aye pitié de moy, & qu'il m'appelle bien-tost pour aller auec luy au Ciel. C'est donc, fit-elle, vne chose bien bonne d'estre, là haut, puis que tu voudrois bien mourir pour y aller. Mais peut-estre que ie m'oublieray de ce que tu me dis. Non, tu ne t'en oublieras point, si tu crois en verité & sans mensonge. Que fera-on de mon corps quand ie seray morte? On le mettra dans vn beau cercueil, & tous les François le porteront auec honneur au lieu où nous enterrons nos 294 morts. Dis moy encore [42] vn coup, mon ame aura elle de l'esprit quand elle sera sortie de son corps? Ouy elle en aura, elle verra, elle entendra, elle conceura fort bien, & parlera d'vne façon plus noble que ne font tes leures. Escoutant mes réponses, son visage s'alloit espanoüissant. En fin elle me dit d'vn accent tout gay, Nitapoueten, nitapoueten, ie croy, ie croy, & pour preuue de ma creãce, tu ne me verras iamais craindre la mort; iusques icy ie tremblois quand tu m'en venois parler; mais doresnauant ie la souhaitteray pour aller veoir celuy qui a tout fait; ie luy disois tousiours en mes prieres, gueris moy, tu me peux guerir; ie luy diray cy-apres, ie ne me soucie plus de la vie, ie suis contente de mourir pour te veoir. Et en effect le reste du temps qu'elle a vescu apres ces demandes, ie n'ay iamais remarqué en elle aucun petit indice [43] de la crainte de la mort. La troisiesme chose qui nous resioüit fort, fut qu'vn Sauuage nommé Sakapouan la voulut diuertir de nostre creance, disant que nous estions des conteurs, & qu'il ne falloit pas nous croire, puis que nous ne sçaurions monstrer ny faire veoir à personne ce que nous enseignons: ceste pauure Neophyte fortifiée de l'esprit de Dieu tint bon, & repartit fort bien, qu'elle croyoit que nous disions la verité, & ainsi elle est morte fort bonne Chrestienne. Pour le Sauuage qui vouloit mettre obstacle à sa creance, il ne la fit pas longue, Dieu en tira vne vengeance bien rigoureuse: ce miserable se trouuoit desia mal, bien-tost apres son impieté il tomba en phrenesie & mourut insensé. Nous l'auions assez bien instruit, mais les respects humains qui regnent puissamment [44] parmy ces peuples, l'ont empesché de professer la Foy. Il nous a dit plusieurs 296 fois, Ie croy bien que tout ce que vous dites est veritable, mais si ie vous obeï, quãd ie me trouueray aux festins de mes Compatriotes, tout le monde se mocquera de moy, Fais sorte, me disoit-il qu'Outaouau (c'est l'vn des grands discoureurs d'entre les Sauuages) reçoiue la Foy quand il viendra icy, & pour lors ie ne feray plus aucune difficulté de vous croire. Outaouau l'a trouué mort & enterré à son retour.

Le septiesme d'Auril le petit Sauuage que nous auions enuoyé en France, & que le Pere Lallemant nous ramena, fut fait Chrestien, & baptisé solemnellement par le mesme Pere. Monsieur de Champlain nostre Gouuerneur luy donna nom Bonauenture. Tous les matins venant donner le bon iour au Pere, [45] qui prenoit le soin de l'instruire, il ne manquoit pas de luy demander le baptesme; il fait maintenant fort bien Dieu mercy, se rendant fort docile. I'espere qu'il nous seruira grandement pour nostre Seminaire.

Le treiziesme de May ie baptisay le fils de ceste bonne femme, que i'auois fait Chrestienne & nommé Marie l'an passé, laquelle ie laissay malade proche de nostre Maison, m'en allant hyuerner aux trois Riuieres. Sa maladie se rengregeant le Pere Lallemant luy donna l'Extreme-Onction, & venant à mourir l'enterra solemnellement dans nostre Cimetiere. Elle laissa pour tout heritage sa maladie à son petit enfant, qu'vne fieure lente a faict passer au Ciel apres le baptesme; il portoit en sa langue le nom d'Aouetitin, qui luy fut changé au nom de Pierre.

[46] Le dix-neufiesme d'Aoust le Pere Lallemant a baptisé vne fille aagée d'enuiron quatre ans; elle est née au païs des Bissiriniens; on la mene en France pour estre esleuée & instruite en la Foy Chrestienne.

298 Le reste des personnes faites Chrestiennes depuis que nous n'auons escrit en France, ont esté baptisées aux païs des Hurons, comme V.R. pourra voir par la Relation que nos Peres m'ont enuoyée, que ie luy addresse. Ils ont entre autres conferé ce Sacrement à vn bon homme, dont le Pere de Nouë qui l'a cogneu en ces païs si esloignez, me parle en tres-bons termes. Nous auons, dit-il, tousiours creu que cet homme mourroit Chrestien, & que Dieu luy feroit misericorde; car il estoit fort porté au bien, il faisoit volontiers l'aumosne secourant ses Compatriotes, voire mesme nous [47] autres qui estions estrangers. Retournant de la pesche il nous apportoit tousiours quelque poisson, non à la façon des autres Sauuages, qui ne donnent que pour auoir le reciproque, mais gratuitement; il nous venoit visiter vne fois ou deux la semaine, & apres s'estre entretenu quelque tẽps auec nous, voyant que nous estions en bonne santé, il s'en alloit tout content. Or comme il gardoit passablement la Loy que la nature a graué dans le cœur de tous les hommes, Dieu luy a donné auant son trespas, la cognoissance de la Loy de son fils.

Ie rapporteray en ce lieu le chastiment manifeste que Dieu a tiré du miserable Sorcier, & de son frere, dont i'ay parlé bien amplement dans la Relation de l'an passé. Ce méchant homme pour me déplaire [48] s'attaquoit par fois à Dieu comme i'ay dit. Il disoit certain iour aux Sauuages en ma presence, Ie me suis auiourd'huy bien mocqué de celuy que la robbe noire nous dit qui a tout fait. Ie ne pûs supporter ce blaspheme, ie luy dis tout haut, que s'il estoit en France on le feroit mourir. Au reste qu'il se mocquast de moy tant qu'il voudroit, que ie le souffrirois: mais 300 qu'il me tueroit & massacreroit plustost, que d'endurer qu'il se rist de mon Dieu où ie ferois present; qu'il ne porteroit pas loing ceste impudence, Dieu estant assez puissant pour le brusler, & le ietter dans les enfers, s'il continuoit ses blasphemes. Il ne tint iamais plus ces discours deuãt moy; mais en mon absence, il ne relaschoit rien de ses boufonneries & de ses impietez. Dieu n'a pas manqué de l'attraper; car l'année n'estoit pas [49] encore expirée, que le feu s'estant mis en sa cabane, ie ne sçay par quel accident, il a esté tout grillé, rosty, & miserablement bruslé, à ce que m'ont rapporté les Sauuages, non sans estonnement.

Ils m'ont dit encor que Mestigoü lequel i'auois pris pour mon hoste a esté noyé; i'aurois bien plus souhaitté que Dieu leur eust touché le cœur; i'ay esté marry particulierement de mon hoste; car il auoit de bonnes inclinations; mais s'estant mocqué en quelque compagnie de Sauuages des prieres que ie leur auois fait faire en nostre extremité, il a esté enueloppé dans la mesme vengeance, tombant dans vne maladie qui luy fit perdre l'esprit, si bien qu'il couroit çà & là tout nud comme vn fol; s'estant trouué de basse mer sur le bord du grand fleuue, la marée montante l'a etouffé [50] dans ses eaux.

Quasi tous ceux qui estoient dans la cabanne où le Sorcier m'a assez mal traité, font morts qui d'vn costé, qui de l'autre, & tous d'vne mort deplorable. Il n'y a que trois iours qu'on m'a amené le fils du Sorcier pour le mettre dans vn Seminaire que nous voulons commencer; i'auois grand desir de le prendre, & de luy faire autant de bien, que son pere m'a fait de mal; mais comme il a les escroüelles d'vne façon 302 fort horrible auprés de l'oreille, la crainte que nous auons en qu'il ne donnast ce mal aux petits garçons, que nous tenons en nostre Maison, nous l'a fait éconduire. Monsieur Gand, homme tout a fait charitable, fait penser & pense luy-mesme cét enfant; s'il guerit nous le mettrons en nostre Seminaire.

Quant à l'Apostat, il nous est venu [51] voir, faisãt mine de se vouloir recõcilier à l'Eglise; nous luy auons demandé quelques preuues de sa bonne volõté; sçauoir est qu'il nous vint voir non dans la famine des Sauuages, qui luy fait rechercher les François, mais dans leur abondance: que s'il retourne en ce temps-là, nous le receurons & retiendrons quelques mois auant que de luy donner l'entrée de l'Eglise.